Read Tshiluba Meji 17 Bible Online

Meji 17 - Tshiluba bible

Meji 17

¹Maweja-Nangila, nsambu yebe idi mikole ikemesha, bantu kabena mua kuyumvua lukasa to. Nenku bantu bavua kabayi balonge mudi malu ebe bavua bapambuke.

²Pavua bantu babi bela meji a kutokesha tshisamba tshiebe tshijidila, bashadile bobu bine mu miidima kayiyi ijika bu badi mu lukanu. Bavua babakangila mu nzubu yabu kabayi bapeta dinanga kuudi nansha dikese.[103]

³Bavua bela meji ne mibi yetu idi misokome, mmibuikila kudi tshilamba tshifiike tshia tshipua muoyi. Kadi bavua babalondakaja, babatangalaja kudi malu a dikema avua mabamuenekele.

⁴Nansha bobu basokome mu miaba kaayi, bayua amu ne bowa. Mitoyi ivua ibatshinyisha ivua mibanyunguluke, bintu bivua bienza bowa bivua bibamuenekela, bibatshinyisha.

⁵Kapia kakavua mua kutokesha miidima eyi to. Nansha mitotu kayivua ne bukole bua bukenkesha mu kandondu amu to.

⁶Kapia kavua kaditemena kakenke mu miidima, kabueja bowa miaba yonsu.[104] Bu muvuabu buume ne bowa, bivuabu bamona bivua bibakuatshisha bowa bupite ne miidima mene.

⁷Budimu bua bena majimbu babu kabuvua ne bukole. Dimanya divuabu bela meji ne tudi nadi divua patupu.[105]

⁸Bantu bavua bela meji ne: tudi ne bukole bua kupandisha bantu ku bowa ne luzakalu, bavua bobu bine bazakala patupu ne bowa kapayi kalu.

⁹Kadi kakuvua njiwu nansha mikese. Bavua bazakala bikole amu bualu bavua batshina nyama idi ipita, ne nyoka idi idila muadi.

¹⁰Bavua bafua ku bowa. Bavua ne bowa bua kutabala mesu mu miidima, kabavua kabidi ne bukole bua kunyema to.

¹¹Bubi budi bujadika mudibu butulumuka, budi budidiwula nkayabu. Muntu udi mumanye tshibawu tshiende, nansha malu mabi adiye muenze.

¹²Bionsu bikadi bimuzakeja, udi ne bowa, udi ubenga mua kuenza mudimu ne lungenyi luende.

¹³Padi meji adi muntu nawu, kaayi amuludika, udi wenda uzakala amu kuzakala, bualu kena nansha mumanye bidi bimufikisha ku bionsu abi.

¹⁴Butuku abu, buvua bufume mu kandondu ka bafue, buvua bubi bupite. Bantu bonsu aba, kabavua balala butuku bimpe to.

¹⁵Bavua babipata kudi bilengulengu, bavua amu bakanyanyanya, kabayi ne bukole bua kujuka, bavua ne bowa bukole.

¹⁶Bonsu bavua muaba awu kupona panshi, bu basuika ne nkanu kudi bowa buabu.

¹⁷Babidime, balami ba mikoku, bena mudimu ba mu mpata, bavua amu ne bowa bukole, muntu kayi mua kunyema.

¹⁸Bantu bonsu bavua basuika pamue mu miidima ne nkanu kayiyi imueneka. Bionsu bivua bibazakaja, tshipepela tshituuta tshiona, nansha miadi mimpe ya nyunyi mu bifufu bia mitshi, nansha mayi adi apueka ne muenji,

¹⁹nansha mabue avua abunguluka, nansha nyama idi ibunduka kayiyi imueneka, nansha mikunda ya nyama ya difu, nansha meyi adi atua to mukuna apingana kabidi muitu.

²⁰Miaba mikuabu yonsu bantu bavua bamona bionsu bibalengelela, muntu yonsu uvua wenza mudimu wende kamuyi lutatu.

²¹Bantu babi bavua bamanye amu ne: netukenge, butuku bubaleja lufu lukavua pa kubakuata. Kadi bowa buvua mu muoyi wabu, buvua bubakengesha bipite ne mu miidima.