Read Tshiluba Meji 19 Bible Online

Meji 19 - Tshiluba bible

Meji 19

¹Kadi wakalondakaja bena lukuna bebe ne tshiji kuyi luse bua kubabutula. Ukavua mudianze kumanya tshivuabu ne bua kuenza.

²Ukavua mumanye ne: nansha bobu balekela tshisamba tshiebe tshiye lukasa, bena lukuna nebavue kukudimuna muoyi bua kutshilondakaja.[116]

³Bena Ejipitu bavua mu madilu, badila ku nkita ya bana babu bafue, kukumbajabu dipangadika dikuabu dia lukasa. Kutuadijabu kulondakaja bantu abu bu badi balondakaja bantu bavuabu bipata kumpala.

⁴Bavua bapua muoyi tshivua tshibabueja mu makenga, bualu bavua bakanyina dinyoka. Amu pa kubenga kuvuluka malu avua abenzekela ke pavuabu mua kupeta dinyoka dijima.

⁵Kadi apu bantu bebe bavua batungunuka ne luendu luabu bimpe, bualu baluishi babu bavua ne bua kufua mushindu wa pa buawu.

⁶Tshifukibua tshionsu, tshidi tshikuitaba, tshivua tshiandamuka bua tshimone mua kulengelela tshisamba tshiebe.

⁷Kumonabu divuba dibuikila mitanda. Kabidi buloba buume buvua bumueneka muaba uvua mayi. Njila munene kumueneka munkatshi mua Mayi manene makunze. Mavuala manene a mayi avua matangalaka munkatshi mua mpata wa bisosa.[117]

⁸Wewe kulama bantu bebe pamue. Ke kumonabu tshishima, kusabukabu. Ke muaba uvua bena tshisamba tshiebe basabukile. Uvua mubalame, benda bamona bishima bia dikema.

⁹Kusankabu bu tubalu tudia bisosa nansha bu tuana tua mikoku tutupika ne dinaya, bakusamuna wewe Maweja-Nangila bu muudi mubapandishe.[118]

¹⁰Kuvulukabu kabidi makenga akavuabu nawu patshivuabu ku ba bende. Ne muvua buloba bupatula tumue pamutu pa kupatula ngombe, muvua misulu ipatula ndimba[119] pa mutu pa kupatula mishipa.

¹¹Pashishe kumonabu nyunyi ya mushindu mukuabu. Pavuabu ne nzala, kulombabu biakudia.

¹²Nyunyi ya tulumbu kupatuka mu mayi manene[120] bua kutuyisha nzala yabu.

¹³Dinyoka divua dikuate bantu babi. Kadi makubakuba makole avua amanyisha dinyoka adi. Mbapete dinyoka pa bualu, bualu bavua bakina benyi ne tshikisu tshipite bubi.[121]

¹⁴Ke muvua bena Sodome babenga kuakidila benyi bavuabu kabayi bamanye. Kadi bobu bena Ejipitu bavua bandamuna benyi bavua babenzela bimpe, bavua bapika babu.[122]

¹⁵Ditunga dionsu didi dipanga kuakidila benyi bimpe, nebadinyoke.

¹⁶Kadi tshisamba etshi tshivua tshidianza kuakidila benyi ne disanka, babenzela bibilu. Kabidi bavua babanemeka bu bena mulongu. Kadi matuku apita kubakengeshabu ne midimu mipite bukole.[123]

¹⁷Bantu abu kupeta disama dia bupofu[124] bu bantu ba mu Sodome bavua bafika ku tshiibi tshia Lote, muntu muakane. Bavua badimona mu miidima menemene, muntu yonsu uvua ububuta bua kupeta mushiku wende wa mbelu.

¹⁸Ku lunzenze, nshinga yonsu udi ne diende diyi, kadi diyi padi didi ne bua kusangila ne makuabu bua kupetesha ntendu misheme kabidi mishilangane. Ke tshivua tshienzeka pavua bintu bisangila bua kuenza bikuabu. Tshivuaku ntshietshi:

¹⁹Nyama ya pa buloba kushala pa mayi. Bivua biowela mu mayi kubanda ku mpata.[125]

²⁰Kapia kavua ne bukole ne mu mayi muine. Kadi mayi kaavua mua kujima kapia bu pa tshibidilu to.[126]

²¹Nyama ivua yendakana mu kapia, kayivua ipia to. Ndimi ya kapia kayivua yengulula tshiakudia tshia kulu, patshi tshivua ne bua kuenguluka lukasa bu mabue a mayi.[127]

²²Maweja-Nangila, wavuiji tshisamba tshiebe tshinene, watshipi lumu, katshia kuena mutshilengulule. Matuku onsu, miaba yonsu, uvua amu pabuipi natshi.