Read Tshiluba Meji 2 Bible Online

Meji 2 - Tshiluba bible

Meji 2

¹Bantu babi badi badishima bamba ne: “Matuku etu a panu adi makese, kabidi mmuwule ne makenga. Lufu ndukulu, buanga tshidingijilu! Katuena banji kumona muntu mufue, mualuke.[6]

²Tudi balele mu mpukapuka. Patuafua kakuena kushala tshintu. Mueyelu wetu udi upatuka bu muinshi. Lungenyi ludi lupatuka, muoyi wetu udi ukuma bu kantolentole ka kapia.

³Kantolentole aka koku kajima, mubidi udi wandamuka lupuishi ne muoyi wetu udi ujimina bu dibungi.

⁴Pashishe bantu nebatupue muoyi, kabena mua kuvuluka bituvua benze.[7] Matuku etu a panu adi apita bu mavuba, kaayi ashiya tshimanyinu, adi ajimina bu dibungi, didi nkenka ya diba itangalaja, padi munya utema.

⁵Matuku etu a panu adi apita bu mundidimbi. Katuena ne mushindu wa kualepesha, bualu mmamane kujadika. Nanku, muntu kena mua kuapingaja kabidi.

⁶“Nenku, patutshidi ne muoyi, tusankayi ne bintu bitudi nabi. Bia panu mbietu, tuenzayi nabi mutudi basue.

⁷Tunuayi maluvu mimpe patutshidi pa tuetu, tulabayi manananshi a dipembu, pa kudia mpautshidi wenda.

⁸Tuasayi bilongu ku nsuki yetu, padibi kabiyi bianji kufuba.

⁹Muntu kashadi mu tshibilu tshietu tshia masanka. Miaba yonsu bantu bamone mutuvua tusanka.[8] Ke luetu lumu! ke tshitudi mua kupeta!

¹⁰Tukengeshayi bapele nansha bobu bantu bakane. Katufuidi bakamba luse. Katunemeki bakulakaje, nansha bobu ne nsuki mitoke.

¹¹Bukole butudi nabu, budi butubingisha ku bionsu ebi. Butekete kabuena ne tshidibu mua kuenza.

¹²Tuluishayi bantu bakane, bualu badi batupuwisha, babenga bitudi tuenza. Badi batudiwula patudi tushipa mikenji.

¹³Bantu bakane badi bafuna mudibu bamanye Mvidi Mukulu, bamba mudibu bana ba Maweja-Nangila.[9]

¹⁴Bidibu bamba bikadi bitutonda, katuena basue kubamona kabidi.

¹⁵Malu adi bantu bakane benza mmashilangane ne a bantu bakuabu. Nsombelu wabu ngua pa buende.

¹⁶Tuetu katutshiena ne mushinga ku mesu abu. Badi batutshina bu bintu bibole. Kabidi badi baditambisha, bualu Mvidi Mukulu ke tatuabu. Badi bamba ne: ku ndekelu kua bionsu, bantu bakane nebasanke.

¹⁷Kadi diba dialejabu kudi bantu bakane aba, netumone ne bidibu bamba ebi mbia bushuwa anyi?

¹⁸Bantu bakane pikalabu bana ba Mvidi Mukulu bulelela, Mvidi Mukulu neabambuluishe, abanyenge mu bianza bia baluishi babu.

¹⁹Nanku, tubateyayi, nebakengeshe ne tshikisu,[10] tumone ne badi ne lutulu ne muoyi mukole.

²⁰Tubafundilayi lufu lubi, bualu badi bamba ne: Mvidi Mukulu neabasungidile.”

²¹Nansha bantu babi bela meji nanku, badi badidinga, bubi buabu budi bubavuija bampofu.

²²Kabena bamanye mudi Mvidi Mukulu wela meji. Kabena batekemena disanka didi Mvidi Mukulu upesha bantu badi benza malu mimpe, kabena banyisha lumu ludiye mulaye bantu bakane.

²³Mvidi Mukulu wakafuka muntu bua ashale ne muoyi kashidi. Wakamufuka pa tshimfuanyi tshiende, pa tshimfuanyi tshiende yeye Mvidi Mukulu.[11]

²⁴Lubabu lua Satane ke ludi lubueja lufu mu bantu.[12] Badi bamulamate badi bafhe bulelela.