Read Tshiluba Meji 3 Bible Online

Meji 3 - Tshiluba bible

Meji 3

¹Bantu bakane badi mu tshianza tshia Mvidi Mukulu. Tshinyangu nansha tshimue katshiena tshibakuata.

²Batshimbakane badi batangila lufu lua muntu muakane bu lufu lua menemene, bamba ne: lufu luabu nkabutu.

³Badi bamona bantu bakane bavua batushiya bu badi babutuka kashidi. Bakane pabu badi mu bupole bua Mvidi Mukulu.

⁴Bantu mbambe ne: mbapete dinyoka,[13] kadi bobu bavua amu batekemena ne katuakufua kashidi to.

⁵Bakane badi bakenga bua katupa kipi, badi bindila diakalenga dia kashidi didibu mua kupeta.[14] Mvidi Mukulu udi ubateta, mmumanye mudibu mua kusanka pabuipi nende.

⁶Mvidi Mukulu udi ubumusha mikiya bu mpawungi udibu bela mu kapia bua kumuakaja. Uvua mubanyishe bu mudiye muanyishe milambu idibu bosha pa tshilambuilu.

⁷Pakumbana tshikondu tshidi Mvidi Mukulu ulumbuluisha bantu, nebakenke diakamue. Nebikale bu tuntolentole tua kapia tudi tutemesha kapia ku bisosa.

⁸Bakane nebalumbuluishe bukua matunga, badia bumfumu bua bisamba. Kadi Maweja-Nangila neashale mfumuabu kashidi.

⁹Nenku bonsu badi batekemena kudi Mvidi Mukulu, nebamanye ne Mvidi Mukulu udi muena bulelela; badi bamulamate, nebashale mu dinanga diende.[15] Bualu Maweja-Nangila mmunange badiye musungule, udi ubafuila luse.

¹⁰Kadi bantu babi badi bapepeja Mvidi Mukulu, nebapete dinyoka dibakumbanyine, bualu badi bapepeja bantu bakese,[16] babenga Maweja-Nangila.

¹¹Bantu badi kabayi balonda meji, badi kabayi bitaba meyi ne mikandu, mbena diakabi. Kabena mua kutekemena tshintu nansha tshimue. Bidibu benza kabiena bibapetesha tshintu. Midimu yabu idi amu tshianana.

¹²Bakaji badibu basela kabena ne lungenyi. Bana badibu balela, mbantu babi. Dikenga nedikuate ndelanganyi yabu.

¹³Diakalenga ndia mukaji udi kayi ne muana, kayi muena buenzayi,[17] kayi ne lumu lubi. Dituku dia tshilumbuluilu, Mvidi Mukulu neamufute.

¹⁴Diakalenga didi kabidi dia muntu mutungu, udi kayi wenza malu mabi, kayi ufikila Mvidi Mukulu munda. Bu mudiye mulamate Mvidi Mukulu, neapete difutu dia pa buadi, neapete muaba wa disanka mu nzubu wa Maweja-Nangila.[18]

¹⁵Udi ukuata mudimu bimpe, neapete difutu dilenga. Udi ulonda mudi meji amba, udi bu mutshi ku muelelu wa mayi, miji yawu kayiyi mua kuuma.

¹⁶Bana balele mu buendenda kabakupeta diakalenga to. Badibu balela mu bundumba nebajimine.[19]

¹⁷Nansha bobu balala panu bidimu bia bungi, kabakuikala ne lumu to. Nansha bobu bakulakaje, badi babapetula kashidi.

¹⁸Bobu bafue batshikale bansonga, mena abu bantu kabena mua kuinyikangana nansha. Dituku dia tshilumbuluilu, kabakubasamba to.

¹⁹Bantu badi benza bibi, ndekelu wabu nkabutu!