Read Tshiluba Meji 4 Bible Online

Meji 4 - Tshiluba bible

Meji 4

¹Pa mutu pa kulela bana, mbipite buimpe kuenza malu makane! Bantu badi benza nanku nebabavuluke kashidi. Badi babatumbisha kudi Mvidi Mukulu ne kudi bantu nabu.

²Patshidibu ne muoyi, bantu badi bidikija ngenzelu yabu. Padibu bafue, bantu badi babajinga. Mu muaba wa butumbi bua kashidi, badi bapeta nsala wa kalumbandi. Bualu mbatshimune mvita, bua kupetabu difutu dipite bulenga.[20]

³Bantu badi balengulula Mvidi Mukulu, bana babu nebikale bantu tshianana. Nansha bobu bavulangane, kabena batanta to, bualu mbakoleshe bibi.

⁴Nansha bobu kabayi banji kukola, badi bu matamba a mitshi idi kayiyi ne miji mikole, adi anyunga ku lupepele. Padilu lukuma bikole, matamba adi atshibuka.

⁵Malala a mabue neatshibuke kaayi manji kukola, ngaji mibishi kabena mua kuyidia, bualu kayena mimpe, muntu kena ne tshidiye mua kuenza nayi.

⁶Bana balela mu buendenda,[21] nebapangishe baledi babu diakalenga dituku dia tshilumbuluilu.

⁷Muntu muakane nansha yeye mufue kayi muanji kukola, udi upeta dikisha dia kashidi.

⁸Bukalakaja budi bukengela kanemu. Kadi kabena banemeka muntu bualu ukadi mukulakaje, nansha ukadi ne bidimu bia bungi to.

⁹Kuikala muntu wa meji, ki nkuikala ne nsuki mitoke to. Nsombelu wa muntu kayi kadiwu, mmupite bukulakaje.

¹⁰Muntu udi ne nsombelu mulenga, udi ulengelela Mvidi Mukulu. Nenku Mvidi Mukulu udi umunanga. Padi muntu awu munkatshi mua bantu babi Mvidi Mukulu udi umuambula mulu.[22]

¹¹Badi bamumusha bua ngenzelu mibi kayinyangi lungenyi luende, nansha bua dishima kadinyangi muoyi wende.

¹²Bualu bukole bua bubi budi bumusha ngenzelu mimpe, kabidi majinga mabi adi umusha lungenyi lulenga.

¹³Muntu ewu upetele buakane mu bidimu bikese, bupite buvuaye mua kupeta mu bidimu bivule.

¹⁴Nsombelu wende uvua usankisha Maweja-Nangila, ke pavuaye mumumushe lukasa munkatshi mua bantu babi. Bantu bakamona bionsu abi, kadi kabena bumvua, nansha bamanye tshidi bualu ebu buleja ne:

¹⁵Mvidi Mukulu udi ulengelela bantu bende, badiye musungule, kabidi udi ukuba bamulamatshi bende.[23]

¹⁶Nenku padi muntu muakane ufua, ngenzelu wende udi ubipila muntu mubi, udi mushale ne muoyi, utombokela Mvidi Mukulu. Ngenzelu milenga ya nsonga utshidi ne muoyi, idi ibipila mukulumpe muenzayi.

¹⁷Padi muena meji ufua, bantu kabena bamanye tshidi Maweja-Nangila musue kumuenzela bua kumufila mu muaba wa dikisha.

¹⁸Bantu badi baseka muena meji padiye ufua, kadi bobu ke badi Maweja-Nangila useka.

¹⁹Bobu bafue, tshitalu tshiabu kabakutshijika to. Mu muaba wa bafue nebabaseke amu kubaseka kashidi. Mvidi Mukulu neabumushe muaba udibu, alembeleje mitu yabu panshi bela mikolu mulu, bua bapange mua kuakula. Nebapange tshia kuenza, bashale mu dikenga dia kashidi, muntu nansha umue kayi mua kubavuluka.

²⁰Pikala Mvidi Mukulu ubalumbuluisha pa bubi buabu, bantu aba nebatshine mua kusemena pabuipi ne Mvidi Mukulu, bilema biabu bionsu nebibasonguele kabidi bibapisha.