Read Tshiluba Meji 5 Bible Online

Meji 5 - Tshiluba bible

Meji 5

¹Muntu muakane neajuke ne dikima, kumpala kua bavua bamuseke, bamukengeshe kabidi.

²Nebikale ne bowa buvule padibu bamumona. Nebapapuke pamumonyibu mupande, bualu bavua bamanye ne: neajimine.

³Nebanyingalale, batua mikemu bua ngenzelu yabu mibi, bamba ne:

⁴“Nyeye, muntu utuvua baseke, bapetule bua budingidingi buetu! Tuvua batangile nsombelu wende bu wa bupale, lufu luende luvua lutufuisha bundu!

⁵Mpindiewu udi musombe munkatshi mua bana ba Mvidi Mukulu. Udi mu lumu pamue ne batumibue.[24]

⁶Nenku tuetu bavua bapambuke mu njila mulelela, bulelela kabuena bututokesha mu miidima ya bubi, diba kadiena dituambuluisha nansha.

⁷Tuvua babuele mu meba a mingonga[25] mu bubi ne mu tshinyangu, tulalakana mu mpata kamuyi njila. Kadi katuvua basue kumanya njila ivua mfumu mutuleje.

⁸“Tuvua biditambisha tuetu bine, tudisua bua patudi bena biuma.

⁹Kadi bionsu ebi biatujiminyi bu mundidimbi, katuyi mua kubivuluka kabidi,

¹⁰bu majuwa adi apandulula mavuala a mayi manene, adi aya tshifundu katshiyi tshimueneka miaba ivua majuwa mapitshile mu mavuala.

¹¹Nansha nyunyi udi upita mulu, kena ushiya tshifundu tshidi tshileja muaba uvuaye mupitshile. Udi ubuka ne mapuapua, upita mu lupepela ne tshiona tshikole. Kadi kabena mua kusangana mufunduwa muaba uvuaye mupitshile.

¹²Bidi bu mudi muketa muele tshintu, upanda lupepela, lubuikakane diakamue, kabena mua kujadika muaba uvua muketa mupitshile.

¹³Ke mutudi petu, amu batutshilelelaku, tuetu kujimina, katuena bashiye tshimanyinu tshia malu malenga atuvua benze, bubi buetu kabuena butupetesha bualu buimpe nansha bumue.”

¹⁴Muntu udi upepeja Mvidi Mukulu, udi bu tshisosa tshiambula kudi lupepela, nansha bu ntutu ya mayi idi ijimina ku lupepela,[26] nansha bu muinshi udi lupepela lujimija. Bionsu ebi bidi bijimina lukasa bu mudi muntu muena luendu mulale mu nzubu wa benyi dituku dimue.

¹⁵Bakane badi ne muoyi wa kashidi. Difutu diabu didi kudi Maweja-Nangila, ne Muena Kulu udi ubakuba.

¹⁶Mu tshianza tshiende nebapete nzala wa kalumbandi, tshimanyinu tshia mu bukalenga. Mvidi Mukulu neabalame, abepule ku njiwu.

¹⁷Disuminyina diende nedibambuluishe mua kutshimuna nwita. Bidiye mufuke nebimuambuluishe mua kuipata baluishi bende bonsu.

¹⁸Neavuale buakane bu kazaku ka tshiamu. Neakose nsambu pa yoyi bu tshifulu tshia tshiamu.

¹⁹Bulenga buende budi bu ngabu, udibu kabayi mua kutshimuna.

²⁰Tshiji tshiende tshikole netshikale bu muele mupite kutua.[27] Buloba bujima nebudisange nende, bua kuluisha bantu batshimbakane.

²¹Udi wangata mavuba abu, mudi buta bunana bua kuela nabu, bua miela ya mvula imone mua kukuata bantu badiye uyiludikila, bu mudi miketa miludikila tshintu itshiasa.

²²Mabue a mvula neapone muaba udi baluishi baatuuta bikole. Mayi manene ne misulu nebibuikile baluishi ba Mvidi Mukulu, bibabutula kamuyi luse.

²³Lupepela lukole[28] nelubabuikile, lubakoke bu mudi mvunde. Nenku, buloba bujima nebuandamuke tshipela, bua ngenzelu mibi ya bantu. Nebatonkole nkuasa ya bamfumu bua buenzayi bua bantu babi.