Read Tshiluba Meji 6 Bible Online

Meji 6 - Tshiluba bible

Meji 6

¹Nuenu bakalenga, telejayi numvue. Nuikale bateya ntema, banulongeshe nuenu badi ne bumfumu munkatshi mua bantu.

²Teyayi matshi, nuenu balombodi ba bantu badi ne disanka[29] dia bisamba bia bantu binudi nukuba, kabidi nuenu badi badisua bua bungi bua matunga anudi nawu.

³Numanye ne: nudi bapete kudi Maweja-Nangila, Mvidi Mukulu Muena Kulu bumfitmu[30] ne bukalenga. Yeye ke wakakenketa ngenzelu yenu, kabidi neamone majinga enu.

⁴Nansha nuenu nukuatshile bukalenga buende mudimu ne bukole. Panuikala kanuyi nulumbuluisha mu buakane, kanuyi nulama mikenji, kanuyi nulonda mudi Mvidi Mukulu musue,

⁵nenupete diakamue dinyoka dikole lukasa luonsu, bualu bonsu badi ne mianzu nebabalumbuluishe ne disu dikole.

⁶Mvidi Mukulu neafuile bantu bapuekele luse, neabalekele mibi yabu, kadi ngenzelu ya bantu baneme, nebayitangile ne disu dikole.

⁷Maweja-Nangila, Mfumu wa bantu bonsu, nealumbuluishe muntu yonsu, kena ulekela muntu nansha yeye ne mianzu. Yeye ke wakabika baneme ne bakese, udi ubalama bonsu mushindu umue.[31]

⁸Kadi neakenkete bikole nsombelu wa badi ne mianzu.

⁹Nuenu bamfumu, ke bandi ngambila, bua nuikale bamanye mudi meji, kanuyi mua kupambuka.

¹⁰Badi balonda mikenji ya tshijila bu mudiyi, nebikale bantu ba tshijila. Badi balonga mudiyi yamba, nebadipandishe dituku dia tshilumbuluilu.

¹¹Nenku, telejayi miaku yanyi ne ntema, nuyilonge ne disanka, nenuikale bantu ba bushuwa.

¹²Meji adi abalakana kule, kaena abuitshidila to. Badi baananga badi baamona lukasa. Badi baakeba[32] badi baapeta kabidi.

¹³Badi baajinga, wowu adi adianza kudileja kudibu.

¹⁴Muntu udi ujuka mu dinda bua kuapeta, kakuikala ne lutatu, neaasangane mamuindile kumbelu.

¹⁵Udi uditatshisha bua kuapeta, udi ushala muntu wa lungenyi, udi ulonga bua kumanya mudiwu, kakuikala ne ntatu to.

¹⁶Bualu wowu mine adi akeba badi baakanyine. Adi aya kudibu ne disanka, kabidi adileja mu meji onsu adibu beela.

¹⁷Meji adi atuadija munda mua muntu diba didiye ne dijinga dia kulonga mudiwu.

¹⁸Kujinga mua kulonga mudi meji nkuananga. Kunanga meji nkulama mikenji yawu, kulama mikenji ya meji nkuepela bubi!

¹⁹Kuepela bubi, kudi kutusemeja pabuipi ne Mvidi Mukulu.

²⁰Badi bajinga Meji, badi bashala bakalenga ba bushuwa.[33]

²¹Nuenu balombodi ba bantu, panuikala nujinga kushala mu nkuasa wa bumfumu, nemekayi mudi Meji anuambila, nenudie bumfumu kashidi.

²²Ndi musue kumvuija tshidi Meji, mudiwu mapatuka. Tshiakunusokoka bualu nansha bumue. Kadi nendeje mudi Meji matuadija. Neanumanyishe patoke mushindu udiwu, tshia kulekela kalu nansha kamue ka ku malu a bulelela.

²³Tshiena musue kuikala ne muoyi mubi wa kulama bindi mumanye. Bualu dijinga dia mushindu ewu kadiena diumvuangana ne Meji to.

²⁴Buloba nebulengele pikala bena meji bavule, bualu mukalenga wa lungenyi udi mua kulama bantu bende bimpe.

²⁵Nenku anyishayi mibelu indi nnupa eyi, neinulengelele.