Read Tshiluba Meji 9 Bible Online

Meji 9 - Tshiluba bible

Meji 9

¹“Mvidi Mukulu wa bankambua banyi, Maweja-Nangila wa luse! Wewe ufukile bionsu amu ku muaku webe.

²Ufukile muntu ku Meji ebe bua ikale mfumu wa bifukibua biebe bionsu,[42]

³bua alombole bantu mu njila wa buakane ne wa tshijila, bua akose nsambu ne muoyi wa kalolu.

⁴Mpeshaku Meji adi pabuipi ne nkuasa webe wa butumbi, mpeshaku muaba munkatshi mua bana bebe.

⁵Ndi muena mudimu webe mulela kudi mukaji muena mudimu webe.[43] Ndi amu muntu muena butekete, matuku anyi a panu mmakese. Tshiena ne bukole bua kulama meyi ebe ne kukumbaja mikenji yebe.

⁶Udi kayi ne Meji mafuma kuudi, nansha yeye muntu muakane, awu udi patupu.

⁷Wewe wakunsungula munkatshi mua bantu bakuabu, bua ngikale mfumu wa bantu bebe, kabidi mulumbuluishi wa bana bebe ba balume ne ba bakaji.[44]

⁸Uvua mungambile bua nkuibakile nzubu pa mukuna webe wa tshijila, ngibake kabidi tshilambuilu mu tshimenga tshiudi usomba. Nzubu ewu mmutentula ku ntenta wa tshijila, uuvua mulongolole ku tshibangidilu.[45]

⁹“Maweja-Nangila, Meji adi pabuipi nebe. Adi mamanye bionsu biudi wenza. Meji avuaku pauvua ufuka bantu.[46] Adi amanya tshidi tshikulengelela, tshidi tshiakane, tshidi tshimvuangana ne mikenji yebe.

¹⁰Tulula Meji mu diulu, mu muaba webe wa tshijila. Ntumina Meji a ku nkuasa webe wa lumu, bua pandi nawu, akuate nanyi mudimu, kabidi bua angambile tshidi tshikulengelela.

¹¹Bualu adi mamanye ne nujingulule bionsu. Neandombole bua ngenze bionsu mu buakane. Mu butoke buawu bua lumu, neandame ku bubi buonsu.

¹²Nanku Maweja-Nangila, midimu yanyi neyikulengelele, nendombole bantu bebe mu buakane, nengakanyine mua kusomba mu nkuasa wa bumfumu bua tatu wanyi.

¹³“Muntu kaayi udi mua kumanya disua diebe, wewe Mvidi Mukulu? Nganyi udi mua kujingulula tshiudi ujinga mua kuenza, wewe Maweja-Nangila?

¹⁴Meji etu makese kaena a bulelela. Ngenyi yetu kayena mijalame.

¹⁵Mubidi wetu wa lufu udi unemesha muoyi bujitu, usaka lungenyi luetu bua lutate ku malu a mu bantu.

¹⁶Tudi tumvua kakese ne lutatu malu a pa buloba, tuenza ne muetu muonsu bua kumanya bitudi mua kuambula ne bianza, kadi bilenga bidi mu diulu, wabijingulula nganyi?

¹⁷Pawikala kuyi mupa muntu bangabanga Meji, nansha pawikala kuyi mumupa Mueyelu webe wa tshijila, mufume mu diulu, udi mua kumanya tshiudi musue nnganyi?

¹⁸Ku diambuluisha dia Meji ebe, tudi tumona ne: udi muleje bantu ba pa buloba njila mululame wa kulonda. Ke padi bantu bamanye tshidi tshikulengelela, bapeta lupandu ku diambuluisha dia Meji.”