Read Tshiluba Sira 1 Bible Online

Sira 1 - Tshiluba bible

Sira 1

¹Diumvuija — Bavua bafunde mukanda ewu kudi Yezu (Yoshuwa) kampande, muana wa Sirake (mu buena ebrewu Ben Sira). Ke mudi bena lelu binyika mukanda ewu ne ngua muana wa Sira. Ku kale bavua baubikila ne: mmukanda wa muena Ekeleziya, imue misangu bualu bavua baubala mu bisangilu bia bena ditaba. Mufundi uvua musombe mu Yerushalayime kumpala kua ndululu ya mu tshikondu tshia Bamakabe. Uvua mumanye bimpe bitambe Mikanda ya tshijila ya bena Izrayele. Uvua muendakane kabidi bikole, muikale wa mu tshisumbu tshia bena Meji. Nansha yeye muikale muntu uvua muanyishe meji mimpe a kudi bantu bonsu, nansha a bantu benyi, kavua muanyishe malu makuabu avua bena Ngreke bakeba kubueja mu ditunga, katshia Aleksandre munene wadikuata. Bualu malu aa avua mafuane kunyanga ditaba dia bena Yuda. Ke mudi muana wa Sira ukeba kuleja bena tshisamba tshiabu ne: Katuena ne bua kubaaba bantu ba bisamba bikuabu: bua malu adibu benza, bua bibidilu biabu, nansha bua ditendelela diabu dia nwidie. Bitudi tuetu nabi, bivua b(...)

²Nganyi udi mua kubala lusenga lua ku mayi manene, mamata a mvula nansha matuku a muoyi wa kashidi?

³Udi mua kupima butumbuke bua diulu, bualabale bua buloba, nansha buondoke bua mayi manene malabale, nnganyi?

⁴Mbafuke Meji kumpala kua bintu bionsu.

⁵Biangatshile ku ntuadijilu, lungenyi luvuaku.

⁶Udibu baleja muvua meji matuadija nnganyi? Udi mua kumanya tshidi Meji enza nnganyi?

⁸Muena meji udi amu Maweja-Nangila. Utudi ne bua kutshina udi amu umue. Ke yeye udi usomba mu nkuasa wende wa bumfumu.

⁹Maweja-Nangila ke udi mufuke Meji. Yeye ke uvua muamone, muapime, muuwuje mu bintu bionsu bidiye mufuke.

¹⁰Mmuapeshe muntu yonsu bu mudiye musue. Mmuapeshe badi bamunanga yeye Maweja-Nangila.

¹¹Muntu udi unemeka Maweja-Nangila udi upeta lumu ne butumbi, udi udiumvua ne diakalenga kabidi ne musangelu.

¹²Muntu udi unemeka Maweja-Nangila udi wenda ne disanka tente mu muoyi wende, uleja mpala wa mimuemue, ulala matuku a bungi pa buloba.

¹³Muntu udi utshina Maweja-Nangila malu ende onsu neajike amu bimpe. Dituku dia lufu luende, Mvidi Mukulu neamuele lupemba.

¹⁴Muntu udi utshina Maweja-Nangila ke udi ne meji. Bantu bakane badi baapetela munda mua bamamuabu.

¹⁵Meji adi munkatshi mua bantu, mmashindamemu kashidi, neashale kudi ndelanganyi yabu.

¹⁶Udi utshina Maweja-Nangila udi ne meji mapite bungi. Bantu badi nawu badi bapeta mapa awu mavule.

¹⁷Meji adi uwuja nzubu yabu ne mayeba abu ne bintu bionsu bidibu bajinga.

¹⁸Muntu udi utshina Maweja-Nangila udi ne Meji. Meji adi amupa bupole ne bukole bua mubidi.

¹⁹Meji adi afila lungenyi ne dimanya dijalame kudi bantu. Bantu badi bakidila meji bimpe badi bapeta lumu.

²⁰Kutshina Maweja-Nangila ke muji wa Meji. Mapa a Meji nkulala panu kuboboka. Tuikale ne lutulu, tudikande

²²Muntu udi ufika munda kakuyi bualu, udi muena tshibawu. Bualu tshiji tshiende tshidi mua kumufikisha ku kabutu.

²³Muntu muena lutulu udi mumanye mua kutukija, pashishe neapete disanka diende tshiakabidi.

²⁴Nealame ngenyi yende too ne ku diba didiye mua kuyimanyisha bakuabu. Nanku bantu bonsu nebatumbishe lungenyi luende.

²⁵Mu biuma bidi nabi Meji, mudi nsumuinu idi itulongesha malu. Kadi kunemeka Mvidi Mukulu, mbualu budi muenji wa bubi kayi musue.

²⁶Wewe musue kupeta meji, lama mikenji ya Maweja-Nangila. Nanku yeye neakupeshewu.

²⁷Muntu udi utshina Maweja-Nangila udi ne meji, mmupete dilongesha dimpe. Mvidi Mukulu udi unanga muntu udi umulamata ne udi usomba ne bupole.

²⁸Leja muebe muonsu muudi utshina Maweja-Nangila. Paudi umutendelela, kutumi muoyi webe ku bunga bualu.

²⁹Paudi uyukila ne bakuebe, kuikadi muena mpala ibidi. Manya bimpe tshiudi wamba.

³⁰Kuditambishi, bualu udi mua kupona, bantu bakupepeja. Maweja-Nangila neasokolole malu ebe masokome, kabidi neakufuishe bundu munkatshi mua bantu. Bualu kuvua mutshine Maweja-Nangila, kabidi uvua ne lubombu munda muebe.