Read Tshiluba Sira 10 Bible Online

Sira 10 - Tshiluba bible

Sira 10

¹Muludiki wa tshimenga udi uludika bantu ne meji. Padiye ne lungenyi bumfumu buende budi bushindama.

²Mudi mulombodi wa ditunga ke mudi kabidi ne balombodi bende ba bukalenga. Mudi mulombodi wa tshitupa tshia buloba, ke mudi kabidi ne bantu bende.

³Mukalenga udi kayi mulonge kalasa, udi ubutula ditunga; bamfumu ba lungenyi ke badi bashindika tshimenga.

⁴Bukalenga bua pa buloba budi bufumina kudi Maweja-Nangila. Yeye ke udi ujula muntu udi mubuakanyine mu tshikondu tshidiye musue.

⁵Dikasa dimpe dia muntu didi difumina kudi Maweja-Nangila. Yeye ke udi ufila bumfumu kudi muenji wa mikenji.

⁶Muntu mukuenzele bibi, kuena mua kumulamina lukuna, kuena mua kubinduluka bikole paudi ne tshiji.

⁷Ditambisha didi dibipila Maweja-Nangila, dibipila kabidi ne bantu. Tshinyangu tshidi tshikengesha Maweja-Nangila, tshikengesha kabidi ne bantu.

⁸Bukalenga budi buya ku tshisamba ne ku tshikuabu, amu bua tshinyangu, ditambisha ne buenzayi.

⁹Muntu udi buloba kabidi butu; mudiye uditambisha mbishi? Yeye utshidi ne muoyi, munda muende mukadi bintu bibole!

¹⁰Disama dikole didi dipangisha munganga tshia kuenzaye. Muntu udi lelu mukalenga, maloba udi ufua.

¹¹Padi muntu ufua tshidiye ushala natshi, ke bishi, nyama ne misanda.

¹²Muntu udi ubanga kuditambisha, padiye ubenga Maweja-Nangila, utombokela udi mumufuke.

¹³Muntu udi ubanga kuditemba, padiye kayi unemeka bumfumu bua Maweja-Nangila. Muntu udi utungunukilamu udi udikebela malu mabi a bungi. Ke padi Maweja-Nangila uvudijila bantu bakuabu makenga, ubabutula.

¹⁴Maweja-Nangila uvua mumbushe bamfumu mu nkuasa yabu ya bumfumu; uvua mupingajemu bantu bapuekele.

¹⁵Maweja-Nangila kubutula bisamba bia bena ditambisha, kupingajaye bisamba bia bantu bapuekele.

¹⁶Maweja-Nangila kunyanga matunga a bantu, kuabutulaye onsu butubutuu.

¹⁷Kujimijaye bisamba bia bantu ba bungi pa buloba, kubibutulaye kabatshiyi babivuluka kabidi.

¹⁸Maweja-Nangila kena mufuke bantu bua kuditambisha. Bantu abu kabena babalela bua kufikabu munda.

¹⁹Tshisamba kayi tshidibu mua kunemeka? — Ntshisamba tshia bantu badi batshina Maweja-Nangila. Tshisamba kayi tshidibu mua kupepeja? — Ntshisamba tshia bantu tshidi katshiyi tshinemeka mikenji ya Maweja-Nangila.

²⁰Mfumu badi bamunemeka kudi bantu bende. Kadi bantu badi batshina Maweja-Nangila, mfumu udi ubangata ne mushinga.

²²Kunemeka Maweja-Nangila, ndumu lua bamulamatshi bende bapiabapia, ndua benyi ne bapele.

²³Ki mbimpe kupetula muena meji udi kabidi mupele, bidi bibi bua kutumbisha muntu udi wenza bibi.

²⁴Bantu badibu batua makumbu, ke balombodi ne bantu ba mianzu. Kadi muntu udi utshina Maweja-Nangila udi mubatambe bonsu ku bunene.

²⁵Mupika wa meji neakuate bantu badi badienzela malu ku mudimu, bantu badimuke kabena mua kunungana.

²⁶Kuena mua kudileja bu udi ne meji paudi wenza mudimu. Kuditambishi paudi mu dikenga.

²⁷Bidi bimpe kuenza mudimu ne kuikala ne bintu bia bungi, pa mutu pa kuenda uditumbisha kuyi ne tshia kudia.

²⁸Muananyi, paudi udianyisha, udipuekeshe, uditue makumbu adi makuakanyine.

²⁹Muntu kena mua kuanyisha udi udienzela bibi, muntu nansha umue kena mua kuitaba muntu udi udipepeja.

³⁰Badi banemeka mupele bua meji adiye nawu, muena biuma bua biuma bidiye nabi.

³¹Muntu udibu banemeka padiye mupele, badi mua kumunemeka mushindu kaayi pikalaye mubanji? Kadi muntu udibu bapepeja padiye mubanji, badi mua kumupepeja mushindu kaayi pikalaye mupele?