Read Tshiluba Sira 11 Bible Online

Sira 11 - Tshiluba bible

Sira 11

¹Pikala mupele muntu wa meji, neikale ne lumu. Neapete muanzu mu bantu banene. Kuanyishi muntu bua biudi umona

²Lekela kutumbisha muntu bua malu audi umona. Kupepeji muntu bua mushindu udiye umueneka ku mesu.

³Lubulubulu ludi lukese kudi nyunyi, kadi ludi luenza buitshi busheme bupite bionsu bia panu.

⁴Kuena mua kuseka muvualavi. Kuena mua kuseka muntu udi mu dikenga. Bualu Maweja-Nangila udi wenza malu a kukema, kakuena muntu udi udianza kuajingulula.

⁵Bamfumu ba bungi mbashiye nkuasa ya bukalenga, muntu wa tshianana udi ubapingana mu bukalenga buabu.

⁶Balombodi ba bungi kabatshiena ne mianzu yabu. Bantu bavuabu banemeka mbashale bapika.

⁷Bangabanga kuanji kumvua mudi bualu, ki mbimpe kuanji kububipisha.

⁸Lekela kuandamuna kuyi muanji kuteleja. Lekela kupuwisha muntu patshidiye wakula.

⁹Lekela kutanda bua bualu budi kabuyi bukutangila. Lekela kubuelakana mu matandu a benji ba bibi.

¹⁰Muananyi, kubangi malu a bungi musangu umue. Pawikala muavudije kuena mua kuakokesha bimpe. Nansha wewe muenze bishi, kuena mua kupeta kantu to, kusamisha mutu ne malu nkudibutuisha.

¹¹Kudi bantu badi bakuata mudimu, bapututuka, bapungila, kadi kabayi bapeta tshintu tshiyuabu bipatshila.

¹²Bamue badi bateketa, bakeba diambuluisha, kabayi ne bintu, bakenga amu kukenga. Kadi Maweja-Nangila udi ubananga, udi ubapatula mu dikenga diabu.

¹³Maweja-Nangila udi ubapa lumu, bantu ba bungi bakema.

¹⁴Buimpe ne bubi, muoyi ne lufu, bupele ne bubanji, bionsu bidi bifumina kudi Maweja-Nangila.

¹⁷Bantu bakane badi bapeta mapa a Maweja-Nangila. Bulenga bua Maweja-Nangila budi bubalombola kashidi.

¹⁸Bamue bantu badi banema bua kulama kua makuta, kabayi ne butulavi. Kadi, telejayi tshidi tshibindila:

¹⁹Dituku didibu bamba ne: “Ndi mupete dikisha, ndi mua kuya kusanka ne bindi nabi”, diba nedikumbane, didibu kabayi belela meji, nanku, nebafue, bashile bantu bakuabu bintu.

²⁰Suminyina mudimu webe, uwenze bimpe. Ukulakajile amu ku mudimu webe!

²¹Kukemi bua dikasa dimpe didi muena malu mabi mupete. Tekemena kudi Maweja-Nangila, unanukile mu mudimu webe. Bualu mbitekete kudi Maweja-Nangila bua kunemesha mupele amu diakamue.

²²Maweja-Nangila udi wela muntu muakane lupemba, umufuta. Diakalenga diende didi dimueneka amu lukasa.

²³Kuambi ne: Tshindi tshiyi natshi kabidi ntshinyi? Nansha ne: tshindi kabidi mua kupeta ntshinyi?

²⁴Kuambi ne: “Ndi ne bionsu bindi nkengela. Dikenga mpindiewu didi mua kunkuata meme bishi?”

²⁵Badi bapua makenga muoyi dituku dia disanka, bapua masanka muoyi dituku dia dikenga.

²⁶Bualu mbitekete kudi Mvidi Mukulu bua kufuta muntu, bilondeshile malu ende, dituku dia lufu luende.

²⁷Muntu udi upua disanka muoyi diba dia dikenga. Mushinga wa midimu yende ivuaye mukuate, udi umueneka dituku dia ndekelu.

²⁸Muntu kayi muanji kufua, kuena mua kumuamba ne: mmuena diakalenga. Badi bamanyina muntu amu ku lufu luende.

²⁹Kuena mua kuakidila muntu yonsu mu nzubu muebe, bualu bantu badimuke badi ne budimu bua bungi.

³⁰Muena ditambisha udi bu nyunyi wa nkuadi muela mu nsanji, bua kulobeshabu nende nkuadi mukuabu, udi windila diba didiye mua kukukuata.

³¹Udi ushintakaja bibi ku bimpe, wela masoka ende, ujana muntu nansha yeye wenza bimpe bipite.

³²Kantolentole ka kapia kadi katemesha mbabula. Muntu mubi udi umatshisha mashi a bantu panshi.

³³Umuka mu njila ya bantu babi, bualu badi bela tshitungu bua kuenzela bantu bibi, badi bakunyangila lumu kashidi.

³⁴Paudi muteke muenyi ku nzubu kuebe, udi mua kukukebela bilumbu, neakukufikishe ku mbipishilu ne ba mu nzubu muebe.