Read Tshiluba Sira 12 Bible Online

Sira 12 - Tshiluba bible

Sira 12

¹Paudi musue bua bakuele tuasakidila bua bimpe biudi muenze, umanye muntu uudi mubienzele.

²Bantu badi balamata Mvidi Mukulu ubenzele bimpe. Padibu kabayi bakuenzela pabu bimpe, Mvidi Mukulu neakuambuluishe.

³Bantu badi batungunuka amu mu dienza dia bibi, kabidi babenga mua kuambuluisha bapele, kabena bapeta bualu bua nsongu to.

⁴Pesha muntu udi ulamata Mvidi Mukulu tshintu, kadi kuambuluishi muenji wa bibi nansha.

⁵Enzela muntu mupuekele bimpe. Kupeshi muntu udi upetula Mvidi Mukulu tshintu to, bualu bidi bu kumupa mukombu bua kukututaye, neakuenzele bibi kabidi bipite, bua bimpe bionsu biuvua mumuenzele.

⁶Muena Kulu udi udiwula muenji wa bibi, neamunyoke ne dinyoka didi dimukumbanyina.

⁷Upeshe muntu muimpe tshintu, kadi upale muntu mubi. Nudimukile balunda ba dishima

⁸Kabena bamanyina mulunda mu matuku a disanka. Kadi mu matuku a dikenga, muluishi udi umueneka patoke.

⁹Padi muntu mu disanka, baluishi bende badi ne dibungama. Kadi padiye mu dikenga, nansha mulunda wende mene udi umulekela.

¹⁰Kuena mua kutekemena kudi muluishi webe, bualu bubi buende budi bu mudi dimoma didi dikuata ku tshiamu.

¹¹Nansha yeye mudipuekeshe kumpala kuebe, wenda muiname, umudimukile, umumanye kabidi. Umuenzele bu mudi muntu usukula lumuenu, bua kujadika ne: dimona dialu kadiena mua kushala kashidi.

¹²Kusombi pamue nende, bua kavu kukutonkola, kukupingana mu nkuasa. Kashadi tshindonda tshiende, bualu udi mua kubaaba muaba webe. Kunyima kua wewe mumane kupeta kanyinganyinga, neumvue buimpe bua bindi nkuambila ebi.

¹³Muntu musuma kudi nyoka uvuaye unaya nende, muntu udi mua kumumvuila luse anyi? Nansha bantu bonsu badi babunda nyama ya tshisuku, badi mua kubumvuila luse anyi?

¹⁴Ke mudibi ne bua muntu udi wendakana ne muenji wa bibi, ubuelakana mu bubi buende.

¹⁵Patshidi muntu mubi wenda pamue nebe, kena uleja muende mudiye muonsu to. Kadi paudi upeta dikasa dibi udi ukushiya amu nanku. Paudi wimana kulu, udi usokoma, paudi upangila bualu, udi udileja patoke.

¹⁶Muluishi udi uyukila nebe ne miaku ya lubombu, kadi udi welangana meji a mua kukuela mu dijimba. Udi mua kumona muluishi upuekesha ne binsonji. Kadi padiye upeta mushindu wa kukushipa udi umatshisha mashi ebe panshi.

¹⁷Padi dikenga dikukuata, yeye udi ufika kumpala, udileja bu udi musue kukusamba, ukuteya.

¹⁸Nealeje muende muonsu mudiye, neakupe mutu, ukuseka, ukuma bikashi, wenza mutoyi muvule.