Read Tshiluba Sira 14 Bible Online

Sira 14 - Tshiluba bible

Sira 14

¹Muntu udi udilama ku ngakuilu wende, mmuena diakalenga. Kabidi kena mua kukenga bua bilema biende to!

²Muena diakalenga mmuntu udi kondu kende ka munda kakayi ne bubi, kabidi upeta bidiye utekemena!

³Paudi muena buiminyi, biuma bidi mua kukuambuluisha ku tshinyi? Wewe mubanji, paudi kuyi utula biuma, bidi mua kukuambuluisha ku tshinyi?

⁴Udi ukunguja biuma kuyi ubidia, udi ukuatshila bantu bakuabu mudimu. Bualu bobu nebasanke ne biuma biende.

⁵Padi muntu udisuya nkayende, kudi muntu udiye mua kuleja muoyi mulenga anyi? Kena mua kudisankisha ne biuma biende.

⁶Muntu udi udikengesha yeye nkayende udi muntu mubi mupite, badi bamunyoka bua bubi buende.

⁷Padi muena buiminyi wenza bualu buimpe, mmubuenze ku mpukapuka. Kadi bubi buende nebumueneke patoke.

⁸Muntu muena lukuka udi muntu mubi, kena utangila bantu bu udi kayi mubamanye, udi ubapepeja.

⁹Muena bukonkotu kena usanka bua bidiye nabi, buiminyi budi bunyanga muoyi wende.

¹⁰Muena buiminyi kena upangana diampa, kadi ku ende mesa kudi lukota ne nzala!

¹¹Muananyi, paudi ne kantu, udiangata ne mushinga. Kadi paudi ne mushindu, ulambula Maweja-Nangila milambu idi mimuakanyina.

¹²Wamanya ne: lufu kaluena kule. Dituku diebe dia lufu kuena mudimanye.

¹³Kuyi muanji kufua, enzela mulunda webe bimpe, bilondeshile muebe muudi namu, wikale ne kalolu kudiye.

¹⁴Kuena mua kulekela diakalenga dia mu lupitapita. Kuena mua kubenga kusanka ne bintu biebe.

¹⁵Umanye ne: neushile bantu bakuabu bintu biebe. Bantu bakuabu badi babipiana, babitshinka, babiabanyangana.

¹⁶Upeshe bantu bintu, bobu bakupeshe biabu, usankishe muoyi webe, bualu ku bafue kabena basanka kabidi to.

¹⁷Muntu yonsu udi ukulakaja bu tshilamba. Ke mukenji wa kashidi udi ne: “Muntu udi ne bua kufua!”

¹⁸Padi mutshi muikale ne tshifufu, mabeji adi asasa, kadi makuabu adi apopoka. Ke mudi ndelanganyi ya bantu, aba bafue, balela bakuabu.

¹⁹Bionsu bidi muntu wenza bidi bijimina, muntu uvua mubienze udi ujimina kabidi momumue.

²⁰Muena diakalenga mmuntu udi ulonda tshidi meji amuambila, wenza bionsu ne lungenyi!

²¹Udi udikonka mu muoyi wende bua kumanya njila ya meji, udi wela meji a kulonda mudi meji amuambila.

²²Udi wipatshila Meji bu mudi tshilembi ulonda nyama, udi uatentekela miaba yonsu idiye uya.

²³Udi utangila pa madidishi awu, utelejila ku tshiibi tshiawu.

²⁴Udi usomba pabuipi ne nzubu wawu, udi uashila mutanda wende ku bimana bia nzubu wawu.

²⁵Udi wasa ntenta wende pabuipi nawu, udi usomba muaba wa disanka.

²⁶Udi wibakishila disua diende mu matamba awu, udi wikishila mu dileji diawu, usomba muinshi mua matamba awu.

²⁷Matamba awu adi amujika ku munya, ne yeye udi usomba mu muaba wa lumu.