Read Tshiluba Sira 15 Bible Online

Sira 15 - Tshiluba bible

Sira 15

¹Ke mudi muntu udi utshina Maweja-Nangila wenza nanku. Udi ulama mikenji yende, upeta meji.

²Meji neamuakidile bu mudi mamu wakidila muanende wa bakaji, bu mudi nsongakaji wakidila uvua mumusele.

³Diampa didiwu amutuadila, ke lungenyi, mayi a kunua adiwu amunuisha ke meji.

⁴Padi muntu ushindamena pa meji, kena upungila to. Muntu udi muatekemene kabena bamufuisha bundu.

⁵Meji adi amuvuija muntu wa mushinga wa bungi, mupite wa badiye nabu mutumba. Padiye wakula, adi aludika bidiye wamba.

⁶Udi upeta disanka divule, dina diende didi ditumba kashidi.

⁷Kadi bantu batshimbakane kabena mua kupeta meji to. Benji ba bibi kabakuamona nansha.

⁸Meji kaena pabuipi ne muena diditambisha, bena dishima kabena mua kuavuluka.

⁹Bantu babi nansha bobu batumbisha Maweja-Nangila, kabiena bielesha meji to. Bualu dimutumbisha didi difumina amu kudiye.

¹⁰Amu muntu udi ne Meji ke udi utumbisha Maweja-Nangila, bualu Maweja-Nangila ke udi umulombola.

¹¹Paudi umbuka mu njila mululame, kuambi ne: Mvidi Mukulu ke udi mumfikishe ku bubi, to. Bualu Maweja-Nangila kena wenza tshidiye ubenga to.

¹²Kuambi ne: “Maweja-Nangila ke udi mungendeshe dikasa dibi”, bualu yeye kena ukengela muenji wa bibi.

¹³Maweja-Nangila udi ubenga bubi bua mishindu yonsu. Bantu badi bamutshina kabena bananga bubi nansha bukese.

¹⁴Maweja-Nangila ke uvua mufuke muntu ku tshibangidilu, kumupaye bumfumu bua kuenza tshidiye musue.

¹⁵Paudi musue udi mua kulama mikenji ya Mvidi Mukulu. Kumulamata, ke bidi bikutangila wewe.

¹⁶Maweja-Nangila mmukutekele kapia ne mayi kumpala kuebe, wewe udi mua kujadika tshidi mua kusungula, tshiudi musue!

¹⁷Maweja-Nangila mmutekete muntu muoyi nansha lufu; bilondeshile muvuabu bajinga, badi mua kupeta muoyi nansha lufu.

¹⁸Bualu meji a Mvidi Mukulu mmapite. Udi muena bukole buonsu, udi umona bintu bionsu.

¹⁹Udi utabalela badi bamutshina, udi mumanye malu onsu adi bantu benza.

²⁰Kena utumina muntu nansha umue diyi bua kuikalaye mubi. Kena mupeshe muntu dianyisha dia kuenza bibi to.