Read Tshiluba Sira 16 Bible Online

Sira 16 - Tshiluba bible

Sira 16

¹Kujingi mua kuikala ne bana ba bungi, padibu kabayi ne ngenzelu milenga. Kusanki ne ndi ne bana ba balume nansha, padibu kabayi batshina Mvidi Mukulu.

²Kusanki to, nansha bobu bavule, padibu kabayi batshina Maweja-Nangila.

³Kutekemenyi ne: nebalale panu matuku a bungi, kuedi meji ne: nebenze bualu kampanda. Mbimpe kuikala ne muana umue, udi unemeka Mvidi Mukulu, pa mutu pa kuikala ne bana tshinunu badi kabayi ne ngenzelu mimpe. Mbimpe nansha kufua nkumba, pa mutu pa kutela bana kabayi batshina Maweja-Nangila.

⁴Muntu wa meji umue udi mua kutantshisha ditunga, kadi ditunga dia bantu babi nedishale tshipela.

⁵Mvua mudimuene ne mesu anyi bilejilu bia bungi, ne mudiumvuile ne matshi anyi malu a kukema kabidi.

⁶Mu mitanda ya bantu babi mudi mutuka kapia ka Mvidi Mukulu, kadi katemamu, Mvidi Mukulu ubutula bantomboji.

⁷Mvidi Mukulu kavua mufuile bantu banene ba mfiondu ba kale luse, bavua baditemba, bamutombokela bua bukole buabu.

⁸Maweja-Nangila uvua mubutule tshimenga tshivua Lote musombe, uvua mudiwule bena tshimenga etshi bua diditambisha diabu.

⁹Kavua mufuile bena Kenaane luse, bantu abu kubutuka, kujika amu bua bubi buabu.

¹⁰Dinyoka dia nanku adi, divua dikuata bena Izrayele mu tshipela, binunu nkama isambombu, kufuabu amu bua buntomboji buabu.

¹¹Nansha ntomboji muikale amu umue, bivua mua kutukemesha bua pavua Maweja-Nangila kayi mumunyoke to. Bualu Maweja-Nangila udi ne luse, ne tshiji kabidi. Udi ne bukole bua kutuila bantu luse, ne bua kubanyoka.

¹²Udi ne lonji, udi kabidi ne luse. Udi ukosa nsambu ya bantu bilondeshile malu adibu benza.

¹³Mvidi Mukulu kena upanga kunyoka muenji wa bibi, kakunyema ne bintu bidiye mupawule. Kena ufuisha muntu muakane bundu.

¹⁴Mvidi Mukulu udi ne muoyi wa kutuila bantu luse matuku onsu, kadi udi ufuta muntu yonsu ku bionsu bidiye wenza.

¹⁷Kuambi ne: “Ndi nsokoma Maweja-Nangila, muntu mulu muamua, kena umvuluka to. Kena mua kummanya munkatshi mua bantu bavule. Meme munkatshi mua bifukibua bungi nenku, ndi panyi nganyi?

¹⁸Padi Maweja-Nangila ukenketa bifukibua biende bidi kule menemene, muinshi mua mayi manene ne mua buloba, bionsu bidi bizakala.

¹⁹Mikuna ne bitaku bia buloba, bidi bizakala padiye ubitangila.

²⁰Nanku kena untangila, kabidi ngenzelu yanyi kena nayi ne bualu to.

²¹Meme muenze bibi, muntu kena mua kummona. Nansha meme nshima mu musokoku, muntu kena mua kubumanya to.

²²Udi mua kumulondela bimpe bindi muenze nnganyi? Pandi nkumbaja mikenji yende tshindi ntekemena ntshinyi?”

²³Bua kuela meji nanku, wikale ne lungenyi nansha lukese! Muntu mupote udi lungenyi lunyanguke, udi wela amu meji a nanku. TSHITUPA TSHIBIDI

²⁴Muananyi, nteleja upete meji. Umvua ne ntema tshindi ngamba.

²⁵Nenkulongeshe malu andi mujadike. Neukumanyishe malu amu mudiwu.

²⁶Pavua Maweja-Nangila mufuke bintu biende ku tshibangidilu, uvua mupeshe tshintu tshionsu muaba watshi.

²⁷Kulongololaye luendu lua mabulunge musangu umue bua kashidi, kabidi kuelelaye mikenji matuku awu onsu. Kaena mua kumvua nzala, kaena mua kupungila to. Kaena alekela mudimu wawu mu njila.

²⁸Dibulunge nansha dimue kadiena ditutakana ne dikuabu. Bonsu buawu adi atumikila Maweja-Nangila.

²⁹Pashishe Maweja-Nangila kutangila buloba, kubuwujaye ne bilenga biende.

³⁰Kutekaye nyama ya mishindu ne mishindu pa buloba. Kadi neyifue, yandamuka amu buloba.