Read Tshiluba Sira 17 Bible Online

Sira 17 - Tshiluba bible

Sira 17

¹Maweja-Nangila wakafuka muntu ne diambuluisha dia buloba. Kadi neamupingaje kabidi mu buloba.

²Wakafundila bantu tshikondu ne bungi bua matuku adibu mua kulala panu. Wakabapesha bumfumu bua bionsu bia pa buloba.

³Uvua mubafuke ku tshimfuanyi tshiende. Kubapeshaye bobu kabidi bukole.

⁴Uvua mubapeshe bukole bua kutangila nyama nansha nyunyi, ne bua kutshinyisha bionsu bidi ne muoyi pa buloba.

⁶Uvua mubafuke bua bakule, bamone ne bumvue. Kubapeshaye bongu bua kuela meji.

⁷Kubapeshaye meji ne lungenyi, kubaleja bidi bimpe ne bidi bibi.

⁸Mu mioyi yabu, kutekaye katupa ka butoke buende, bua kubaleja bukole budiye ukuata nabu midimu yende.

¹⁰Nanku nebatumbishe Dina diende dia tshijila, nebalondelangane bunene bua midimu yende.

¹¹Maweja-Nangila kena amu mupeshe bantu mushindu wa kujingulula malu, kadi mmubelele kabidi mikenji idi mua kubalombola bua bikale ne muoyi.

¹²Kutuaye nabu ndondu wa kashidi, kubalejaye tshidiye musue.

¹³Mesu abu kumonawu butumbi buende, matshi abu kumvuawu diyi diende dia bukalenga.

¹⁴Kubambilaye ne: “Nudilame ku bubi bonsu.” Kubambilaye tshidi muntu yonsu ne bua kuenzela mukuende.

¹⁵Maweja-Nangila udi umona diba dionsu malu adi bantu benza. Udi muamanye onsu, kakuena budi bumusokome.

¹⁷Maweja-Nangila udi mupeshe tshisamba tshionsu watshi mfumu. Kadi bena Izrayele mbantu ba Maweja-Nangila.

¹⁹Malu onsu adi bantu benza adi patoke kumpala kuende, udi utabalela ngenzelu yabu yonsu.

²⁰Maweja-Nangila kena mupange malu mabi adi bantu benza. Mibi yabu yonsu udi muyimone.

²²Dipa dia pa luse didi bu tshitampi ku mesu kua Maweja-Nangila. Udi uvuluka bualu buimpe, bu mudi muntu ukuba kamonyi ka disu diende.

²³Dituku dikuabu neafute bantu, amu mudi ngenzelu yabu.

²⁴Kadi, badi badilengeja neabape mushindu wa kupinganabu kudiye. Neakoleshe ku muoyi bantu badi kabayi ne ditekemena.

²⁵Pingana kudi Maweja-Nangila, benga mibi yebe. Umusengelele, ulekele bubi.

²⁶Pingana kudi Mvidi Mukulu, Muena Kulu, lekela malu mabi. Benga bualu bubi kashidi kashidi.

²⁷Udi mua kutumbisha Mvidi Mukulu ku bafue nnganyi? Amu bantu batshidi ne muoyi ke badi mua kumutumbisha!

²⁸Padi muntu ne muoyi ne makanda a mubidi, udi mua kutumbisha Maweja-Nangila. Yeye katshiyiku, mumane kufua, nkujika, kena mua kumuvuluka kabidi to!

²⁹Luse lua Maweja-Nangila nduvule. Udi ufuila bonsu badi baya kudiye luse!

³⁰Bualu muntu kena ne bukole bua kuenza malu onsu bimpe to, bualu muntu kakushala ne muoyi pa buloba kashidi.

³¹Kudi tshidi tshipita diba ku bukenke anyi? Kadi, diba didi dibuitshidila, dibuela. Ke mudi muntu udi wela meji a kuenza malu mabi.

³²Mvidi Mukulu udi uludika mabulunge a mulu. Kadi bantu bonsu badi amu buloba ne butu!