Read Tshiluba Sira 18 Bible Online

Sira 18 - Tshiluba bible

Sira 18

¹Maweja-Nangila udi ne muoyi kashidi, wakafuka bintu bionsu.

²Yeye nkayende ke muena buakane.

⁴Maweja-Nangila kena mupeshe muntu nansha umue bumfumu, bua kumanyisha bidiye mua kulua kuenza. Udi mua kutandula malu a dikema adiye muenze, udiku anyi?

⁵Kudi nansha muntu udi mua kupima bukole budiye nabu anyi? Kudi kabidi muntu udi mua kuambilangana bionsu bia dikema bidiye muenze anyi?

⁶Kabena mua kumbusha nansha kusakidila kantu ku malu a dikema adi Maweja-Nangila muenze. Kabena mua kujingulula malu a dikema masokome a Maweja-Nangila!

⁷Padi muntu mumane kuitaba ne: malu aa mamane kujika, adi amu atuadija. Padiye wimana, udi upanga ne lungenyi.

⁸Muntu ntshinyi? Udi wambuluisha ku tshinyi? Bimpe nansha bibi bidiye wenza bidi ne mushinga kaayi?

⁹Yeye mulale bidimu bia bungi pa buloba, ndukama!

¹⁰Bidimu ebi, kubifuanyikija ne matuku a muoyi wa kashidi, bidi amu bu dimata dia mayi dipona mu mayi manene, nansha bu ditete dia lusenga mu mushiki wa lusenga.

¹¹Ke padi Mvidi Mukulu muikale ne lutulu kudi bantu, ubafuila luse lua bungi.

¹²Maweja-Nangila udi umona bantu, udi mumanye ne: nebafue lufu lua dikenga, ke padiye ubafuila luse lua bungi,

¹³Muntu udi ufuila mukuende udi nende pamue luse, kadi Mvidi Mukulu udi ufuila bantu bonsu luse. Udi ubela bantu, ubalengeja, ubalongesha. Udi ubapingaja kudiye bu mudi mulami wa mikoku upingaja mukoku mujimine kudiye.

¹⁴Udi ne luse kudi buonsu badi balonda diyi diende, badi bananukila bua kukumbaja tshidi Mvidi Mukulu musue.

¹⁵Muananyi, paudi wenzela muntu bimpe, kumutompuedi to. Paudi upesha muntu tshintu bua kumusankisha, kuena mua kumupeshatshi ne nsenda to.

¹⁶Bu mudi lumuma lutalaja luya, ke mudi diyi dimpe dia mukana dipite kupa.

¹⁷Bushuwa, diyi dimpe ndipite bintu bia kusankisha nabi muntu. Kadi tshipapayi udi ne diyi dimpe, kabidi udi upa.

¹⁸Muntu mutshimbakane utandisha muntu, upendangana. Dipa dia muena lukinu didi ditondeshangana.

¹⁹Bangabanga ne kuakula, umanye tshiudi usua kuamba. Uvuluke mubidi webe, kuyi muanji kusama.

²⁰Udikonke nkayebe, Mvidi Mukulu kayi muanji kukulumbuluisha. Nanku, diba diakulumbuluishaye, neakufuile luse.

²¹Kuena mua kuindila disama, bua umone mua kutonda bubi buebe. Kadi paudi muenze bubi, udilengeje.

²²Paudi ulaya Maweja-Nangila, ukumbaje malaya ebe diba didiwu akumbana. Kuindidi amu paudi ufua bua wewe kuakumbaja.

²³Udilongolole bangabanga ne wewe kulaya. Kuenji bu muntu udi uteta Maweja-Nangila.

²⁴Uvuluke ne dia nshikidilu Maweja-Nangila udi mua kukufikila munda, ku lufu luebe udi mua kukunyoka, kukubenga.

²⁵Paudi ne bintu bivule bia kudia, vuluka matuku adi tshiyole mua kufika. Paudi ne bubanji, vuluka ne udi mua kushala mupele kuyi ne kantu.

²⁶Kutuadija ku dinda ne ku dilolu, diba didi dienda dishintuluka. Maweja-Nangila udi mumanye mua kuenza nanku lukasa!

²⁷Muntu wa meji udi ne budimu mu malu onsu. Padi bualu bumueneka bubi, yeye udi wepuka.

²⁸Muntu yonsu wa lungenyi udi ne meji. Udi unemeka kabidi muntu yonsu udi nawu.

²⁹Bantu badi bumvua miaku ya badi ne lungenyi badi bashala pabu ne meji, bakula ne nsumuinu mimpe ya bungi.

³⁰Lekela kuya kudi majinga ebe mabi akutuma, udikandike.

³¹Wewe muanyishe tshionsu tshidi majinga ebe akeba, neudisekeshishe kudi baluishi bebe.

³²Kukebi mua kusanka amu ne bintu bia mushinga mukole. Kudibueji mu dikenga dia badi benza nanku.

³³Lekelayi kuenza tshibilu tshia disanka ne makuta masombe, paudi kuyi ne ebe a mu tshiebe tshibombi, bua kudivuiji mupele.