Read Tshiluba Sira 19 Bible Online

Sira 19 - Tshiluba bible

Sira 19

¹Muena mudimu udi unua maluvu kena mua kunema to. Muntu udi upepeja makasa makese adiye upeta, ku kakese ku kakese udi udivuija mupele.

²Bunuavi bua maluvu ne dibuelela dia bakaji mu nzubu, bidi bitombola nansha bantu ba lungenyi. Muntu udi uyila amu kuyila bakaji bena buendenda, ku kakese ku kakese udi upeta dikamakama dipite.

³Dikamakama diende nedimufikishe ku lufu, neabole, bamudie kudi misanda.

⁴Muntu udi witaba amu lukasa bidibu bamuambila, kena ne lungenyi luvule. Yonsu udi wenza nanku, udi udienzela yeye nkayende bibi.

⁵Muntu udi usanka bua bualu bubi, bonsu nebamudiule.

⁶Yonsu udi ne tshiakulakula, kena ne lungenyi luvule.

⁷Lekela kuidikija muntu pa menu, nanku kuena mua kupeta tshilumbu.

⁸Kulondi bualu bua mulunda webe, nansha bua muluishi webe, nansha bua muntu kampanda. Kumanyishi bantu malu ende, pa kumusha adi mua kukupisha paudi upuwa.

⁹Bualu muena bualu abu udi mua kumvua, kukudiwulaye, dituku dikuabu neakujudile lukuna.

¹⁰Pawikala mumvue bualu kampanda, ubulamine munda, ukoleshe muoyi! Kuena utunduka to!

¹¹Bua kulama bualu munda, muntu mutshimbakane udi ukengakana, bu mudi mukaji ukengakana pa kulela.

¹²Bu mudi muketa muasa mu tshibelu usama muntu, ke mudi bualu busama muntu mutshimbakane munda.

¹³Paudi mumvue bajana mulunda webe, anji ebeja mulunda webe, bumue kena mua kuikala muenze tshilema. Pikalaye mutshienze, bumue kena mua kutshienza kabidi to.

¹⁴Pikalabu basonguela mutumba nebe ne: udi ujanangana, umuebeje, bumue kena muamba bualu bubi to. Pikalaye mubuambe, kakubuamba kabidi to.

¹⁵Ebeja mulunda webe, bualu bantu badi bashiminyinangana malu, kuitabi bionsu bidi bamue bantu bakuambila.

¹⁶Miaku mibi idi mua kupatuka, muntu kayi ne meji mabi. Udi kayi muanji kuakula meyi mabi nanku nnganyi?

¹⁷Ebeja mutumba nebe bualu bangabanga ne wewe kumutandisha, wewe wenza tshidi mikenji ya Muena Kulu yamba.

²⁰Kutshina Maweja-Nangila ke kuikala ne meji menemene. Muntu udi ne meji udi ulonda mikenji ya Maweja-Nangila.

²²Kuenza bualu bubi ki mmeji to. Kulonda mubelu wa benji ba malu mabi, ki ndungenyi to.

²³Kudi ditalama didi dibipila Mvidi Mukulu bikole. Muntu udi mubule meji, udi wenza malu bu muntu mutshimbakane.

²⁴Mbimpe kuikala muntu udi ne lungenyi, kadi utshina Maweja-Nangila, pa mutu pa kuikala muntu udi ne lungenyi lua bungi kadi ushipa mikenji ya Muena Kulu.

²⁵Kudi ditalama didi difikisha muntu ku bubi menemene. Bamue bantu badi bashimangana bulunda, bua kupeta tshidibu basue.

²⁶Kudi bantu benda biname bu badi ne dibungama, kadi badi munda muwule ne budimu.

²⁷Badi benda biname bu bantu badi kabayi bumvue. Kadi padi bantu kabayi babatalamukila, badi babapita bukole.

²⁸Bamue bantu badi babenga kuenza malu mabi, amu bualu kabena ne bukole. Kadi padibu bapeta mushindu, badi benzelamu.

²⁹Badi batangila mpala wa muntu, bua kumanya muende mudiye. Bidi bimpe kumutangila mu mpala menemene, bua kushindika ne udi lungenyi.

³⁰Mvuadilu wa muntu, tuseku tuende, ne luendu luende, bidi bileja mudiye.