Read Tshiluba Sira 2 Bible Online

Sira 2 - Tshiluba bible

Sira 2

¹Muananyi, pawikala ukeba kukuatshila Meweja-Nangila mudimu, udianze kudilongolola padibu bakuteta.

²Ukoleshe muoyi, ujadike malu. Kupamakanyi diba didi dikenga dikukuata.

³Ulamate Mvidi Mukulu, kumulekeledi nansha. Neutshimune pawikila pa kufua.

⁴Anyisha bionsu bidi bikuenzekela. Ulame lutulu nansha bantu bakudiwula.

⁵Bantu badi bamanya tshiamu mpawungi, padibu batshiteka mu kapia. Badi Mvidi Mukulu mutokele munda badi babamanyina padibu babakengesha.

⁶Paudi utekemena kudi Mvidi Mukulu yeye udi ubambuluisha. Londa njila wa buakane, utekeme kudiye.

⁷Nuenu badi batshina Maweja-Nangila, tekemenayi luse luende. Kanumubengi bua kunuyi kubuela mu bubi.

⁸Nuenu bantu badi batshina Maweja-Nangila, tekemenayi kudiye. Kanuena nupanga dienu difutu.

⁹Nuenu bantu badi batshina Maweja-Nangila, tekemenayi diakalenga kudiye, disanka dia kashidi ne luse luende.

¹⁰Tangila bantu bavua badianjidile kumpala kuenu: Mvidi Mukulu ukadi mufuishe muntu uvua mutekemene kudiye bundu anyi? Mvidi Mukulu ukadiku utulekele muntu uvua umutshina muende muonsu anyi? Mvidi Mukulu ukadiku mulengulule muntu uvua umutendelela anyi? Mvidi Mukulu ukadi mubenge kuteleja bantu badi bamulomba diambuluisha anyi?

¹¹Bualu Maweja-Nangila, muena luse ne dinanga, udi ubafuila luse bua malu mabi abu, udi ubapandisha padibu mu dikenga.

¹²Bantu badi kabayi ne dikanda, kabayi ne muoyi mukole, mbena diakabi. Bantu badi ne mioyi ibidi, mbena diakabi.

¹³Muntu udi utekesha mu maboku kayi utekemena kudi Maweja-Nangila, mmuena diakabi! Maweja-Nangila kena umulama to.

¹⁴Nuenu bantu badi kabayi bananukila, nudi bena diakabi! Panukonka Maweja-Nangila nenuenze tshinyi?

¹⁵Bantu badi batshina Maweja-Nangila badi bumvua diyi diende. Badi bamunanga badi benza bidiye musue.

¹⁶Bantu badi batshina Maweja-Nangila badi bamusankisha, badi bamunanga badi balama meyi ende.

¹⁷Bantu badi batshina Maweja-Nangila badi badilongolola diba dionsu bua kumuenzela mudimu. Badi badipuekesha kumpala kuende, bamba ne:

¹⁸“Tudi basue kuditeka mu bianza bia Maweja-Nangila, pa mutu pa kuditeka mu bianza bia bantu. Bualu mudi bunene bua Maweja-Nangila, ke mudi bunene bua luse luende!”