Read Tshiluba Sira 20 Bible Online

Sira 20 - Tshiluba bible

Sira 20

¹Kudi mibelu idi kayiyi pa diba diayi. Muntu udi upuwa, misangu mivule udi uleja mudiye ne lungenyi.

²Mbimpe kubela muntu pa mutu pa kulama tshiji munda.

³Muntu udi utonda bubi buende, udi wepuka dikenga.

⁴Bu mudi muntu mutungu, ukeba mua kuangata mukaji ku makanda, ke mudi muntu udi musue kukosa bilumbu bia bantu ku bukole.

⁵Bamue bantu mbapuwe, bamueneka ne badi ne meji, bakuabu badi ne buakulavi, badi babadiwula.

⁶Kudi mishindu ibidi ya bantu badi kabayi bakula: kudi bantu badi kabayi ne tshia kuandamuna, kudi bantu badi bindila diba dia kuandamuna.

⁷Muntu wa meji udi upuwa too ne padiye ufika tshikondu tshia kuakula. Kadi muena tshiakulakula ne mutshimbakane kena mumanye diba didiye mua kuakula.

⁸Bantu badi badiwula muntu udi wakula upitshisha. Muntu udi ukimina kuakula, kabena mua kumunanga.

⁹Misangu mikuabu dikenga didi mua kupetesha muntu disanka, bu mudi disanka mua kukudimuka dikenga.

¹⁰Kudi kupa kuudi upa muntu bua kumusankisha kakuyi mua kukupetesha tshintu. Kadi kudi kupa kukuabu, kudi mua kukupetesha bintu bia bungi.

¹¹Muntu udibu batumbisha, badi mua kumupuekesha, kadi muntu udibu bapuekesha, badi mua kumutumbisha.

¹²Kudi muntu usumba bintu bia bungi ku mushinga mukese, kadi pashishe bidi bimueneka ne mmubisumbe ku mushinga mukole mupite.

¹³Badi bananga muntu wa meji ku meyi makese adiye wakula, kadi meyi mimpe a batshimbakane adi ajimina.

¹⁴Kupa kudi muntu mutshimbakane ukupa bua kukusankisha, kakuena mua kukuambuluisha, bualu amu biudi mua kumupingajila ke bidiye mutekemene.

¹⁵Udi ukupesha bintu bikese, kadi ukuamba bia bungi, udi uteka mutoyi bu mudi muntu udi usumbisha mu tshisalu. Lelu udi ukusombesha tshintu, butshia udi utshinana. Bantu ba nanku mbantu babi.

¹⁶Muntu mutshimbakane udi wamba ne: “Tshibi ne mulunda to, kakuena muntu udi muanyishe bimpe bindi ngenza to. Bonsu bandiadia nabu, kabena bammanya kabidi.”

¹⁷Bantu bonsu badi baseka bikole muntu wa nanku.

¹⁸Mbimpe kudishinda tshibuta pa mutu pa kuakula meyi mabi. Muntu mubi udi udishinda ubutuka lukasa.

¹⁹Muntu mukolesha bibi udi bu diyuki dia tshianana, didi bantu batshimbakane bakula amu kuakula.

²⁰Kabatu bangata ne mushinga lusumuinu ludi muntu mupote wela, bualu kena uluela pa diba dialu.

²¹Kudi bamue bantu bapele, badi babayi mua kuenza malu mabi, nanku badi balala, kondu kabu ka munda amu ne ditalala.

²²Kudi bantu badi bajimija mioyi yabu bua bundu, batshina mua kubela muntu mutshimbakane.

²³Kudi bakuabu badi babutuka padibu balaya mulunda wabu tshintu bua tshiena bundu. Pashishe badi bakinangana.

²⁴Dishima ntshilema tshibi kudi muntu, badi nadi misangu mivule kudi bantu batshimbakane.

²⁵Muivi muimpe mupite muena dishima wa kalanda musenga. Kadi bubidi buabu mbena kabutu.

²⁶Bantu kabena basue muena dishima, muena dishima udi ne bundu matuku onsu.

²⁷Muntu wa meji udi ukengela amu miaku mikese menemene, bua bantu bamuanyishe padiye wakula; muntu wa lungenyi udi usankisha bamfumu.

²⁸Tshidime muimpe udi ne ntete ya bukula ya bungi, muntu yonsu udi usankisha bamfumu, badi bamutuila luse, bua bilema biende bidiye wenza.

²⁹Milambu ne mabuejila bidi bipangisha bena meji mua kumonabu bulelela. Kabena mua kubela muntu, bualu badi bu mbua udi ne tshiseba tshisuika ku mbanga.

³⁰Meji masokoka nansha biuma bijika mu buloba, bidi mua kuambuluisha ku tshinyi? Bubidi buabi kakuena tshidi ne mushinga to.

³¹Muntu udi usokoka bupote buende, mmupite muntu udi usokoka meji ende.