Read Tshiluba Sira 21 Bible Online

Sira 21 - Tshiluba bible

Sira 21

¹Muananyi, pawikala muenze bualu bubi, kuenji kabidi. Kadi ulombe luse bua bubi buebe buuvua muenze.

²Tshina bubi bu muudi utshina nyoka wa ntoka. Bualu wewe musemene padiye, udi ukusuma. Bualu bubi budi ne menu bu a nyama wa ntambue, adi ashipa bantu.

³Bualu bubi buonsu budi bu muela wa nkanza. Kuenza bubi kudi kushiya mputa wa lubangu.

⁴Tshimvundu ne kukuatshisha bantu bowa bidi bifikisha bantu ku kabutu. Bena ditambisha nebabutuke ne bubanji buabu pamue ne meku abu.

⁵Dilomba dia mupele didi difika kudi Mvidi Mukulu, Mvidi Mukulu neamuambuluishe lukasa.

⁶Muntu udi ubenga mibelu, udi ulonda dikasa dia muenji wa bubi. Kadi udi utshina Maweja-Nangila, udi udilengeja ku bubi buende.

⁷Muntu udi wakula bimpe badi bamunanga kudi bantu bonsu. Kadi padiye utupakana, muntu wa meji udi umvua.

⁸Muntu udi wibaka nzubu ne lupetu lua bende, udi ufuanangana ne muntu udi wangula mabue bua kudibakila lukita.

⁹Bantu badi babenga mikenji ya Mvidi Mukulu, badi bonsu pamue bu bisosa bibi mu tshisumbu: bidibu mua kuosha mu kapia.

¹⁰Njila wa benji ba bibi udi mulandakane, kena ne nsoka, kadi ku ndekelu kuende kudi kandondu ka bafue.

¹¹Muntu udi ulama mikenji ya Mvidi Mukulu, udi uludika meji ende. Muntu udi utshina Maweja-Nangila udi ne meji.

¹²Kabena mua kulongesha muntu, udi ne meji ku tshintu nansha tshimue. Kadi kudi meji makuabu adi apetesha muntu kanyinganyinga kavule.

¹³Lungenyi lua muntu wa meji ludi bu musulu muwule mayi tente, mibelu yende idi bu mpokolu wa mayi mimpe.

¹⁴Muoyi wa muntu mutshimbakane udi bu dibungu difue. Muntu awu kena mua kulama bualu bua meji.

¹⁵Padi muntu wa meji, umvua diyi dia meji, udi udiangata ne mushinga, wenduluka nadi. Kadi padi muntu mutshimbakane udiumvua, kadiena dimulengelela, udi udibenga.

¹⁶Diyuki dia muntu mutshimbakane didi ne bujitu, bu mudi dibuki dia muena luendu. Kadi miaku ya muntu wa lungenyi misangu yonsu idi isankisha bantu.

¹⁷Padi bantu mu tshipangu, badi bajinga mua kuteleja diyi dia muntu wa meji, belangana meji ku bidiye wamba.

¹⁸Ku mesu a muntu mutshimbakane, meji adi bu nzubu mupuke, dimanya dia muntu udi kayi ne lungenyi didi anu bu diyuki didi kadiyi dibota.

¹⁹Muntu mutshimbakane udi umona mubelu bu makopa mamuela ku makasa, ne nkanu mimuela ku bianza.

²⁰Muntu mutshimbakane udi useka, ukedidia. Kadi muntu mudimuke udi usekela mu matama.

²¹Muntu mudimuke udi umona mubelu bu tshilenga tshia mpawungi, bu tshikupa tshiela ku diboku.

²²Muntu mupote udi ufuilakana bua kubuela mu nzubu, kadi muntu wa meji udi ubuela ne bukalanga.

²³Muntu mutshimbakane udi udingidila ku tshiibi, bua kumona mu nzubu, kadi muntu mukolesha bimpe udi windila pambelu.

²⁴Muntu udi uteya ditshi mu tshiibi, mmukolesha bibi, kadi muntu wa meji udi umvua bundu!

²⁵Muena tshiakulakula, udi wambulula bidi bakuabu bamba, kadi muntu wa meji udi upima meyi ende.

²⁶Muntu mutshimbakane udi udianza kuakula, ushisha wela meji. Kadi muntu wa meji udi udianza kuela meji, pashishe wakula.

²⁷Padi muntu mubi utshipa muluishi wende, udi uditshipa nkayende.

²⁸Muntu udi ujana bantu udi udienzela bibi yeye nkayende. Bena mutumba nende badi bamudiwula.