Read Tshiluba Sira 22 Bible Online

Sira 22 - Tshiluba bible

Sira 22

¹Muena lulengu mmufuanangane ne dibue, didibu banyinyina mupondu wa tumvi, bantu bonsu badi badibenga.

²Udi mufuanangane ne mushiki wa tumvi, muntu udi utuapu tshianza, udi utshiowa mayi.

³Muana wa balume mukolesha bibi udi ufuisha tatuende bundu! Nansha yeye muana wa bakaji kena ne mushinga.

⁴Nsongakaji wa meji nebamusele, kadi nsongakaji udi ufuishangana bundu, udi ubungamija tatuende!

⁵Nsongakaji muena buakulavi udi ufuisha tatuende ne bayende bundu, tatuende nansha bayende nebamupepeje.

⁶Kumubela bidi bu kuimba misambu ya disanka mu madilu, kadi kuikala ne meji a kubela muana kabidi kumubela ne kakodi kudi kuimpe!

⁹Kulongesha muntu mupote kudi bu kulamakaja luesu lupandike, nansha bu kutabuluja muntu ku tulu tukole.

¹⁰Kuambila muntu mupote bualu, kudi bu kuyukila ne muntu mulale tulu, wewe mumane kujikija muyuki udi ukukonka ne: “Udi muambe tshinyi?”

¹¹Udile muntu mufue, bualu kena umueneka panu. Kadi udile kabidi muntu mutshimbakane: bualu kena ne lungenyi. Kuena mua kupita kudila muntu mufue, bualu mmuye kuikisha. Kadi muntu mutshimbakane muikale ne muoyi mmubi mupite udi mufile.

¹²Badi badila muntu mufue matuku muanda mutekete, kadi badi badila muntu mutshimbakane, nansha muntu udi kayi unemeka Mvidi Mukulu, matuku onsu atshidi muntu ewu ne muoyi.

¹³Lekela kulepesha mayuki ne muntu mutshimbakane, kuendakanyi ne muntu udi kayi ne lungenyi. Umubenge bua kuepela bilumbu, bua kuvu kunyanguka ne bubi buende. Umuepuke, neupete dikisha, bua butshimbakane buende kabukutondi.

¹⁴Ntshintu kaayi tshidi tshipita tshiamu tshia ntende ku bujitu? — Tshintu atshi dina diatshi: mmuntu mutshimbakane.

¹⁵Bidi bipepele bua kuambula tshibombi tshia lusenga, tshia luepu nansha tshiamu tshia bujitu, pa mutu pa kuanyisha malu a muntu mutshimbakane.

¹⁶Bu mudi musaka mukole wa nzubu kabayi mua kuutula kudi tshipepele tshikole, ke mudi muntu wa muoyi umue kayi mua kutenkakana, ku bualu bua meji budiye muipatshile.

¹⁷Muntu udi ushindika bualu bua lungenyi ne muoyi umue, udi bu tshimana tshia nzubu tshilanguluila bimpe.

¹⁸Bu mudi nsoka ya mabue milamika ku tshimana tshia nzubu, ilamuka lukasa padi lupepela lututa, ke mudi muntu mutshimbakane utshina malu makuabu adiye ufuanyikija!

¹⁹Padi muntu mukukume tshintu mu disu, didi dipatuka binsonji, padi muntu utumbula ku muoyi wa munda, udi upatula bionsu bidimu.

²⁰Muntu udi wela nyunyi mabue, udi uyipata, kadi muntu udi ujana mulunda wende, udi ushipa bulunda buabu.

²¹Wewe mutudile mulunda webe kele, tshilema atshi ki ntshijike to, udi mua kutshilongolola.

²²Nuenu batandangane ki mbualu to, nudi mua kumvuangana kabidi. Kadi tshidi mua kushipa bulunda buenu ke bipendu, kapetu, kunyanga lumu luende ne kumuelela tshitungu.

²³Padi mutumba nebe mupele, umunange; paudi umvuangana nende neupete bubanji. Padiye upeta biuma neupete pebe kabidi.

²⁴Kumpala kua kapia kutemaku, kadi kafuima muinshi ne dibungi, ke mudi kumpala kua bantu kutandangana ne kushipangana, badi banji kupendangana.

²⁵Tshiena mua kuikala ne bowa bua kusungidila mulunda wanyi to, kabidi tshiena mua kusokoma padiye nanyi dijinga.

²⁶Kadi pandi mpeta dikenga ku bubi buende, bonsu bumvua bualu abu, nebamubenge.

²⁷Ndi musue mulami udi uludika ludimi luanyi, udi ukanga ne nsapi mishiku yanyi yonsu, bua tshifiki ku diakula miaku mibi, tshibutuki ku bindi ngakula to.