Read Tshiluba Sira 23 Bible Online

Sira 23 - Tshiluba bible

Sira 23

¹Maweja-Nangila, Tatu ne Mfumu wa muoyi wanyi, kuanyishi bua mishiku yanyi inkokeshe, imfikishe ku bubi.

²Ukokeshe meji anyi ualengeje, ulongeshe ne meji muoyi wanyi. Kuanyishi ntupakanyi yanyi, nansha bubi bundi ngenza ku bukole,

³Nanku bilema bianyi kabiena mua kuvula, tshiena mua kuenza amu kuenza bubi kabidi, mibi yanyi kayena mua kupita bungi. Nansha tshiena mua kupona mu bianza bia baluishi banyi, bua kuntshimunabu, basanka.

⁴Maweja-Nangila, Tatu ne Mvidi Mukulu wa muoyi wanyi, kuanyishi bua ngikale ne diditambisha.

⁵Ungumushile bijingajinga bionsu mu muoyi wanyi.

⁶Muoyi wa buendenda ne majinga a tshianana kabimpitshi bukole! Kutangiji muoyi wanyi ku majinga mabi.

⁷Bana banyi, telejayi munudi mua kudilama ku buakulavi. Muntu udi ukumbaja dilongesha edi kena mua kuenza bubi nansha.

⁸Muenji wa bibi badi bamukuatshila amu ku meyi ende, mbia momumue bua muena bijanu ne muena diditambisha.

⁹Lekela tshibidilu tshia kuditshipa, nansha tshia kuteletela dina dia Mvidi Mukulu wa tshijila,

¹⁰Mupika udibu balondeshisha kudi mfumuende, matuku onsu udi ne bibangu bivule. Ke mudi muntu udi uditshipa utela amu kutela dina dia Mvidi Mukulu wa tshijila, misangu yonsu upia tshibawu.

¹¹Muntu udi uditshipa misangu mivule, udi udiomekela bubi, bipupu kabiena biumuka mu nzubu muende. Padiye kayi ukumbaja mitshipu yende udi muena tshibawu. Padiye uditshipa amu ku mishiku, udi muena tshibawu tshinene. Padiye utshipa kapayi bualu, udi amu mupile, bipupu nebiuwule mu nzubu muende.

¹²Kudi meyi makuabu a lonji adi muntu wakula, adi akeba lufu (kabavua mua kumvua bena Izrayele bakula meyi a mushindu wa nanku!) Bantu badi balamata Mvidi Mukulu badi bumuka mu njila ya nanku, kabena mua kudibonda mu malu mabi.

¹³Kuidikiji mukana muebe bua kuakula miaku ya bundu, bualu idi ifikisha muntu ku malu mabi.

¹⁴Vuluka baledi bebe, paudi musombe munkatshi mua bakulumpe; tshipuamuoyi katshikukuatshi bua kubela bilela, bua kupatudi miaku ya butatakane. Dituku dia nanku adi, kuakusanka mudibu bamane kukulela, neutshipe too ne dituku mene divuabu bakulela.

¹⁵Muntu udi ne tshibidilu tshia kuakula meyi mabi, kena mua kupeta meji.

¹⁶Kudi bantu mishindu mivule badi bavudija bubi, kudi bamue badi bakeba Mvidi Mukulu tshiji mushindu wa pa buawu. Abu majinga a tshianana adi osha bu kapia, kabena balekela too ne padiwu akumbana. Muntu udi ufila mubidi wende ku malu mabi, kena udianza kulekela padi kapia kakayi kamuosha.

¹⁷Muena tshiendenda mmusue kubuelela bakaji bonsu mu nzubu, kena mua kulekela kayi muanji kufua.

¹⁸Kudi kabidi mulume udi ne buenzayi kudi mukajende, udi wamba ne: “Udi mummone nnganyi? Tudi butuku. Ndi musokome mu nzubu! Muntu kena mua kummona. Tshindi mua kupampakena ntshinyi? Nansha meme muenze bubi, Muena Kulu kena mua kungasa tshilumbu to.”

¹⁹Muntu wa nanku udi utshina amu mesu a bantu. Kena mumanye ne: mesu a Maweja-Nangila adi matue bikole, mapite diba, adi amona malu onsu adi bantu benza, adi afika too ne mu miaba misokome.

²⁰Mvidi Mukulu uvua mudianze kumanya bintu bionsu kayi muanji kubifuka. Udi mubimanye kabidi padibi bimane kubutuka.

²¹Muena tshibawu nebanunyoke patoke munkatshi mua bantu, nebanukuate diba didiye kayi mutekemene. (b) mukaji muena tshiendenda

²²Bidi bia momumue ne bua mukaji muena buendenda, udi utuadila bayende muana wa mu tshiendenda, bua amupiane.

²³Bangabanga udi mushipe mukenji wa Muena Kulu. Pashishe tumuenzele bayende bibi. Kabidi padibu bamuangata kudi balume bakuabu, udi mumane kuikala muena buendenda, kabidi mmulele bana ne mulume mukuabu.

²⁴Nebamulumbuluishe kumpala kua bantu, nebalondolole bua bana bende.

²⁵Bana aba nebabipate mu diku, ndelanganyi yabu kayakutanta to. Bana aba nebabipate mu diku, ndelanganyi yabu kayakutanta to.

²⁶Tshilema tshia mukaji ewu, katshiena mua kujika, yeye mumane kufua nebamutshipe bua malu ende avuaye muenze.

²⁷Bantu bonsu badi bashala ne muoyi nebamanye ne: amu kutshina Maweja-Nangila ke kudi kupita bionsu, kulama mikenji ya Mvidi Mukulu kudi kutamba buimpe.