Read Tshiluba Sira 24 Bible Online

Sira 24 - Tshiluba bible

Sira 24

¹TSHITUPA TSHISATU Meji adi aditua mena. Munkatshi mua bena Izrayele bantu bende, adi aditua makumbu.

²Adi akula munkatshi mua diku dia bantu ba Muena Kulu. Adi aditemba kumpala kua bantu ba Maweja-Nangila.

³Adi amba ne: “Ndi mupatuke mukana mua Muena Kulu; meme kubuikila buloba bu mudi dibungi.

⁴Mvua musombe mulu muamua, mushikame mu divuba dia mulu.

⁵Meme kuendakana nkayanyi mulu muamua muonsu, meme kuenda ne mu mayi manene malabale.

⁶Bumfumu buanyi buvua bumuangalake mu bisamba bionsu, ne mu matunga onsu, pa mavuala a mayi manene ne pa buloba bujima.

⁷Meme kukeba pa kuikishila mu bintu ebi bionsu, kadi muaba kaayi umvua mua kushindamena?

⁸Nenku Mufuki wa bintu bionsu, uvua mumfuke, kungambilaye ne: ‘Asa nzubu webe mu ndelanganyi ya Yakobe. Udie bumpianyi mu Izrayele.’

⁹Wakamfuka ku tshibangidilu kayi muanji kufuka tshintu nansha tshimue, nenshale ne muoyi tshiendelele.

¹⁰Meme ke uvua ukuatshila Mvidi Mukulu Muena Kulu mudimu, mu ntenta wende wa tshijila, pashishe meme kuasa pa mukuna wa Siyone.

¹¹Ke Maweja-Nangila kunsombesha mu Yerushalayime, tshimenga tshindi mupite kunanga. Meme kushala mukalenga.

¹²Meme kushindama mu thisamba tshidi ne butumbi, tshidi Maweja-Nangila musungule bu tshiende yeye.

¹³Meme kudiundilamu bu mutshi wa sedre wa mu Lebanone, bu mutshi wa siprese pa mukuna wa Ermone,

¹⁴meme kudiunda bu mutshi wa dibue wa mu Engedi, nansha bu mitshi ya rose ya mu tshimenga tshia Yeriko, bu mutshi wa olive mu mpata, meme kulepa amu bu mutshi wa platane.

¹⁵Meme kutuma mupuya bu manananshi a mishindu yonsu, kabidi bu mire muimpe ne ngalbanume, bu onikse ne storakse, bu dibungi dia muinshi wa kamonya, munda mua ntenta wa tshijila.

¹⁶Meme kuolola maboku bu matamba a mutshi wa lusanga, matamba anyi adi a lumu ne butumbi.

¹⁷Meme kupatula ntonga mimpe bu mutshi wa nwinyo. Bilongu bianyi kupatula bimuma bia mushinga mukole kabidi bia bungi.

¹⁹Vuayi kundi meme, nuenu badi banjinga, diayi bimuma bianyi bindi munupe nuukute.

²⁰Udi mumvuluke udi ne busheme bupite buitshi, udi nanyi udi ne disanka dipite bunene.

²¹Bantu badi bandabula badi kabidi ne nzala, badi bannua nebikale kabidi ne nyota.

²²Kadi muntu udi unteleja kakufua bundu, muntu udi ukuata nanyi mudimu kena mua kuenza bualu bubi to.”

²³Bionsu bidibu babala ebi, ke bidi mu mukanda wa ndondu, udi ututuangaja ne Mvidi Mukulu Muena Kulu; ke mikenji ivua Moshe mutuelele, ke bumpianyi bua ndelanganyi ya Yakobe mu meku abu.

²⁵Mikenji eyi idi miuwule ne meji tente, bu mudi musulu wa Pishone nansha wa Tigre miuwule mu tshikondu tshia mvula.

²⁶Mikenji eyi idi itangalaja lungenyi bu mudi musulu wa Perate muuwule, upasalaja mayi, nansha bu mudi musulu wa Yardene mu tshikondu tshia kunowa.

²⁷Mikenji eyi idi ilongesha malu mapite bungi, bu mudi musulu wa Nile uwula, nansha bu mudi musulu wa Ngikone mu tshikondu tshidibu batula tumuma tua nwinyo.

²⁸Ku muntu wa kumpala too ne wa ndekelu wa bantu badi babala mikenji, muntu nansha umue wa kudibu kena muanji kuyimanya mujikije, nansha mujandule buneme bonsu bua meji ayi.

²⁹Meji adi ne lungenyi lutampakana lupite lua mayi manene, mibelu yawu idi miondoke mipite mayi manene.

³⁰Kadi meme ndi tshiina tshidi mayi a musulu abuela, bu mukidi udi ufila mayi a musulu mu lupangu.

³¹Meme kuamba ne: “Ndi nya kumiamina mayi mu lupangu luanyi, ndi nya kuela mayi mu budimi buanyi.” Kadi tangilayi tshiina tshianyi atshi, kuandamukatshi musulu wa mayi, musulu awu kushala mayi manene.

³²Ndi musue kunulongesha patoke bindi mulonge, bua bitokeshe miaba yonsu bu mudi diba dienza.

³³Nentangalaje dilongesha bu mudi muambi wa Mvidi Mukulu wenza, nendifikishe kudi ndelanganyi idi itulonda.

³⁴Manyayi ne: nansha meme mutata, tshiena mukuate mudimu amu bualu buanyi meme nkayanyi, kadi ne bua bantu bonsu badi bakeba meji.