Read Tshiluba Sira 25 Bible Online

Sira 25 - Tshiluba bible

Sira 25

¹Kudi malu asatu adi muoyi wanyi ujinga, adi Maweja-Nangila ne bantu banyishe kabidi: diumvuangana dia bena muntu, bena mutumba badi basomba bu balunda, ne diumvuangana dia mulume ne mukaji.

²Kudi bantu mishindu isatu bandi ndiwula, bua malu adibu benza, adi amfikisha munda: ke mupela udi uditambisha, muena biuma udi musue dishima, kabidi ne muntu mukulakaje katshiyi lungenyi, muditue mu tshiendenda.

³Pawikala kuyi mupete tshintu mu bunsonga buebe, mmunyi muwatshipeta mu bukulakaje buebe?

⁴Mudi bantu ba nsuki mitoke bamanya mua kusunguluja malu, bamanya mua kubela bantu, mbualu bua mushinga mukole!

⁵Padi bantu bakulakaje ne meji, ne bantu badi ne muanzu ne lungenyi, mbualu bua mushinga mukole.

⁶Nsala wa lumu wa bakulumpe, mpadibu bamonemone mianda, kadi butumbi buabu bunene, mpadibu batshina Maweja-Nangila.

⁷Kudi malu tshitema andi mmona ansankisha, kudi kabidi bua dikumi bundi mua kutela. Ke muntu udi upeta disanka mu bana bende, ne muntu udi umona kabutu ka baluishi bende patshidiye ne muoyi!

⁸Muntu udi ne mukaji wa lungenyi udi ne disanka, muntu udi umvuangana ne mukajende bimpe, udi bu ngombe ne mpunde! Muntu udi kayi wakula meyi mabi, udi ne disanka, muntu udi kayi ukuatshila mfumu mushadile kudiye mudimu, udi ne disanka!

⁹Muntu udi ne mulunda udi ne lungenyi, udi ne disanka! Muntu udi uyukila ne bantu bamuteleja ne ntema, udi ne disanka!

¹⁰Muntu udi mupite bantu bonsu abu, ngudi ne Meji, kadi kakuena muntu udi upita muntu udi utshina Maweja-Nangila to.

¹¹Muntu udi utshina Maweja-Nangila mmupite bantu bonsu. Kakuena muntu wa kumufuanyikija nende.

¹³Mputa yonsu mmibi, kadi ya pa dinanga mmibi mipite. Bubi buonsu budi nankunanku, kadi bua mukaji mbupite.

¹⁴Kakuena lutatu ludi lubi bu lua ku lukinu, nansha disombola dikukebela kudi muena lukuna.

¹⁵Kakuena lulenga ludi lupite bubi, bu lulengu lua nyoka, nansha tshiji tshidi tshipite bubi bu tshiji tshia mukaji!

¹⁶Bidi bimpe kusomba mu nzubu pamue ne nyama wa ntambue nansha wa tshidika, pa mutu pa kuikala ne mukaji mubi.

¹⁷Bubi bua mukaji budi buandamuna mpala wende, umunyenga, umueneka bu nyama wa lonji!

¹⁸Bayende udi uya kudia ku bena mutumba, kadi nansha nanku udi amu udiabakena bikole.

¹⁹Katuena mua kufuanyikija dikenga nansha dimue, ku makenga adi mukaji mua kukukebela. Badi mua kumunyoka mudibu banyoka benji ba bibi!

²⁰Muntu wa ditalala udi usela mukaji wa mutoyi, udi ukenga bikole, amu mudi mukuna wa lusenga ukengesha muntu mukulukaje padiye ukeba kuubanda.

²¹Buimpe bua mukaji kabukukoki nansha, kualakanyi mukaji to.

²²Mulume udibu badiishe kudi mukajende, nebamuseke, bamupenda, kabidi nebamufuishe bundu kudi mukaji awu.

²³Mukaji mubi udi unyingalaja bayende bikole, umuendesha ne mpala wa dibungama, umutapa mputa ku muoyi. Mukaji mubi udi kayi usankisha bayende, udi umutekesha mu maboku ne mikolu.

²⁴Bubi buakatuadija kudi mukaji. Amu bua bubi buende tudi tufua bonsu.

²⁵Kulekedi mayi apatukila mu tshiina tshia mayi. Kuanyishi bua mukaji mubi ayukile mudiye musue.

²⁶Pikalaye kayi witaba mu diyi diebe, nubengangane nende, umuipate.