Read Tshiluba Sira 26 Bible Online

Sira 26 - Tshiluba bible

Sira 26

¹Muntu udi musele mukaji muimpe udi ne disanka, nealale panu matuku mulongulongu.

²Mukaji wa bukitu udi usankisha bayende, bayende neasombe ne ditalala bidimu biende bionsu bia panu.

³Mukaji muimpe udi dipa dia pa buadi didi Maweja-Nangila upesha badi bamutshina!

⁴Nansha muntu awu muikale mubanji, nansha mupela, udi ne disanka, uleja mpala wa disanka matuku onsu.

⁵Kudi malu asatu adi angenza bowa, kudi kabidi buinayi bundi ntshina: ke mayuki a dishima, bisangilu bia mua bantu, kufundangana ku tubadi kapayi bualu. Bionsu ebi mbibi bipite lufu.

⁶Kadi dikenga dibi dipite ke dia mukaji udi ukuatshila mukenende mukawu, muikale kabidi ne buakulavi.

⁷Mukaji mubi udi ne buenzayi bu ngombe musuika bibi udi ukoka ditempu; paudi musue kumutekesha udi bu muntu udi ukuata kaminyiminyi.

⁸Mukaji udi ukuatshika maluvu udi ufikisha bantu munda, uleja bubi buende muonsu mudibu.

⁹Mukaji wa bibidilu bibi badi bamumanyina ku lutangilu luende, ne ku kutekesha kuende kua mesu

¹⁰Pikala muanebe wa bakaji udienzela malu, umutangile ne disu dikole, bualu neakunyeme paudi ne ditanaja.

¹¹Umutangile ne disu dikole ku mesu adiye ulengula awu, padiye ukushima kuena mua kukema to.

¹²Bu mudi muena luendu udi ne nyota, unua mayi onsu adiye upeta, ke mudi mukaji ewu, udi wenda ne balume bonsu, udi ufila mubidi wende ku tshiendenda.

¹³Mukaji mulenga udi usankisha bayende, nsombelu wende mulenga udi ukolesha bayende mu mikolu.

¹⁴Mukaji udi wamba miaku mikese udi dipa dia kudi Maweja-Nangila, mukaji mukolesha bimpe udi upita bintu bionsu ku mushinga.

¹⁵Mukaji udi ne bupuekele kena ne udibu mua kumufuanyikija nende, kakuena udi mua kumupita ku mushinga.

¹⁶Mukaji mulenga tshishiki mu nzubu mulengeja bimpe udi mufuanangane ne diba didi dibanda mulu menemene.

¹⁷Bu mudi muendu ukenkela pa tshitekelu tshiawu tshia tshijila, ke mudi mpala wa mukaji mufuke bimpe wengelela.

¹⁸Mudi makunji a mpawungi mashikame pa tshiamu tshitoke, ke mudi mikolu mimpe ya mukaji mishindame pa bikankanya biende.

²⁸Kudi malu abidi adi antonda, kudi kabidi buisatu budi bumpetesha tshiji: muntu mudianza kupeta disanka udi ubuela mu dikenga, pashishe bantu ba lungenyi badi babapetula kudi bantu bakuabu, kadi nangananga muntu udi ubenga njila muakane, musue kubuela mu njila mubi. Maweja-Nangila neashipeshe muntu wa nanku!

²⁹Muntu udi usumba bintu bia kuenda nabi mushinga, misangu mivule kena wepuka buenzayi. Ngenda mushinga misangu mivule badi mua kumupisha.