Read Tshiluba Sira 27 Bible Online

Sira 27 - Tshiluba bible

Sira 27

¹Bua kupeta bintu bia bungi, bantu bavule badi benza bibi. Muntu udi musue kunema, kena musue kumanya tshintu tshikuabu to.

²Mudi kabaya kabuela mu mpandakanyi ya mabue abidi malamakana, ke mudi bubi bubuela munkatshi mua muntu udi upanyisha bintu ne mukuabu udi ubisumba.

³Pikala muntu kayi utshina Maweja-Nangila muende muonsu, nzubu wende neabutuke.

⁴Padibu basenga nseke mu munyingu, nseke idi ishala. Ke mudi bilema bia muntu bimueneka padiye wakula.

⁵Bu mudibu bateta ngesu ya mufumbi padibu bayosha mu kapia, ke mudibu bamanya dimanya dia muntu padibu bayukila nende.

⁶Badi bamanyina mutshi wa mu budimi ku bimuma biawu; ke mudibu bajingulula meji adi munda mua muntu ku miaku idiye wakula.

⁷Kuena mua kudianza kutumbisha muntu kuyi muanji kumvua mudiye wakula. Bualu tudi tuangata muntu ne mushinga ku bidiye wakula.

⁸Paudi udibamba bua kufika ku dienza buakane, udi mua kufikaku, neuvuale tshipeta tshimpe atshi bu tshinkutu tshia lumu.

⁹Nyunyi ya mushindu umue, bua kuikisha, idi idikungujila muaba umue; nenku buakane budi bulonda padi bukuabu.

¹⁰Mudi nyama wa ntambue walamina nyama udiye ukeba kudia, ke mudi bubi bualamina bantu badi benza bibi.

¹¹Muntu udi unemeka Mvidi Mukulu, udi wakula ne meji matuku onsu, kadi muntu mutshimbakane udi ukudimuka bu mudi ngondu.

¹²Paudi ufika munkatshi mua bantu kabayi ne lungenyi, kunengakanyi mu tshisumbu tshiabu, ulamata bantu badi bela meji.

¹³Diyuki dia bantu batshimbakane didi dikeba tshiji. Badi baseka padibu benza bualu bubi.

¹⁴Bantu badi baditshipa amu kuditshipa, kapayi bualu, badi bafikishangana munda. Padibu batandangana ne bantu bakuabu, bantu bonsu badi bajibika mu matshi.

¹⁵Matandu a bena ditambisha adi afikisha bantu ku lufu, bipendu biabu bidi bitutonda.

¹⁶Muntu udi usokolola malu a mulunda wende, udi unyanga diumvuangana diabu. Kena mua kupeta kabidi wende mulunda wa pa muoyi.

¹⁷Unange mulunda webe, umulamate, kadi pawikala musokolola malu ende, kumvuanganyi kabidi nende to:

¹⁸bulunda mbumane kufua, budi bu muntu mufuishe muanabu.

¹⁹Bu mudi nyunyi mukufinuke mu bianza, uya kuyi mua kumukuata tshiakabidi, ke muudi ujimija mulunda webe kuyi mua kumupeta kabidi.

²⁰Kuena mua kumuipatshila to, bualu ukadi kule. Mmumane kukunyema bu kabuluku katuka mu bukondu.

²¹Badi mua kuondapa mputa wa muntu, badi batandangana badi mua kulengejangana kabidi. Kadi muntu udi musokolola malu a mulunda wende, kena mua kumutekemena kabidi.

²²Muntu udi uvinya mukuabu disu, udi ukeba kuenza bibi. Paudi umutabalela, umuke muaba udiye.

²³Panudi nende, udi wamba bimpe, I usanka paudi wakula, ukatshila. Kadi paudi umbuka, udi wamba munga, wenduluka ne biuvua muambe bua kukubutula.

²⁴Yeye mmupite bionsu bindi ndiwula. Maweja-Nangila kabidi mmumudiwula.

²⁵Kuudi wela tshinkelenda nkuyaya kudishinda. Muntu udi wenzela mukuabu bibi, nebamuenzele kabidi bibi.

²⁶Muntu udi uteya mukuabu, umuimbila tshiina, umuelela bukondu, nebimuenzekele amu nanku.

²⁷Bubi budi muntu wenza budi amu bumupinganyina, kayi mua kumanya kudibu bufumina.

²⁸Muena diditambisha udi upenda bantu, ubaseka, dikenga ndimuindile, bu mudi nyama wa ntambue walamina bua kukuata nyama.

²⁹Bantu badi basanka padi bantu bakane bapeta dikenga, nebadishinde. Kabidi nebakenge bikole patshidibu ne muoyi.

³⁰Njiya ne tshiji mbibi, muenji wa bibi ke mfumuabi.