Read Tshiluba Sira 28 Bible Online

Sira 28 - Tshiluba bible

Sira 28

¹Bantu badi basue kudisombuela, nebabasombuele kudi Maweja-Nangila. Maweja-Nangila neavuluke bubi buabu buonsu.

²Fuila mukuenu luse bua bubi buvuaye mukuenzele, nenku pawalomba Maweja-Nangila neakufuile luse bua bubi buebe.

³Pawikala ulamina muanenu tshiji, muudi mua kulomba Maweja-Nangila bua akufuile luse mbishi?

⁴Paudi kuyi ufuila mukuebe luse, muudi mua kulomba Maweja-Nangila bua mibi yebe mbishi?

⁵Paudi ulama njiya, wewe udi kuyi unenga panu, kadi udi mua kumusha mibi yebe nnganyi?

⁶Lekela malu mabi, vuluka ne: neufue, neubole, nenku lama meyi a Mvidi Mukulu.

⁷Vuluka meyi a Mvidi Mukulu, kulaminyi mukuenu njiya. Vuluka ndondu unudi batue ne Muena Kulu, nanku ufuile mukuenu luse bua bibi bidiye mukuenzele.

⁸Epuka matandu, nenku kuakuenza bibi to. Bualu muntu udi ne tshiji udi ulundula matandu.

⁹Muntu mubi udi ujula matandu munkatshi mua balunda, udi ushipa diumvuangana pankatshi pa bantu badi basombe bimpe.

¹⁰Kapia kadi kalunduka padibu bakasonsola. Matandu adi akola padibu baalundula. Muntu udi ufika munda, padiye utangila bukole budiye nabu, udi ulundula tshiji, padiye utangila biuma bidiye nabi.

¹¹Matandu a tshimpitshimpi adi alundula tshiji, matandu a tshimpalatanta adi ashipesha bantu.

¹²Paudi wela mupuya mu makala a kapia, kadi kalakuka; kadi paudi ukela mate, kadi kajima. Bionsu bibidi ebi bidi bifumina amu mukana muebe.

¹³Muntu udi usongakajangana, kabidi ne muntu udi ushima, mbena diakabi! Bualu mbajimije bantu ba bungi bavua basombe bimpe.

¹⁴Biambamba biakatekesha bantu bavule mu maboku, mbitangalaje bantu, baya mu bisamba ne bisamba; mbibutule bimenga bivua biasa ne bimana bikolesha, mbishimbule meku a bamfumu mene.

¹⁵Biambamba mbipatshishe bakaji ba nsongu ku mabaka. bipangishisha ne bipeta bionsu bia ku midimu yabu.

¹⁶Muntu udi uteleja biambamba kena upeta dikisha, kena mua kusomba ne ditalala.

¹⁷Lukodi lutuuta muntu ludi lutapa mputa, kadi muntu mukuamba diyi dibi mmukubutule.

¹⁸Mbashipe bantu ba bungi ku miele ya mvita, kadi bapite bungi mbafile amu ku biambamba bia bantu.

¹⁹Muena diakalenga mmuntu udi umuka ku malu a biakulakula, tshimvundu tshijula kudi ludimi katshiyi tshimulenga. Muena diakalenga mmuntu udi kayi ubuela mu bupika bua ludimi, kabayi bamusuika ne nkanu yalu.

²⁰Bualu ludimi ludi ne bujitu bua tshiamu, nkanu idilu lusuika bantu idi ya tshiamu tshikunze!

²¹Biambamba bidi bifikisha bantu ku lufu, lufu amu lubi, bidi bimpe kufua pa mutu pa kuenda ne biambamba!

²²Kadi biambamba kabiena mua kutshimuna bantu badi banemeka Mvidi Mukulu, kabiena mua kubosha mu kapia.

²³Bantu badi ne biakulakula mbadi babenga Maweja-Nangila, biakulakula biabu bidi bilundula kapia kadi kakayi kajima; bidi bu nyama wa ntambue, bidi bu tshisumpa ntambue, nebibabutuishe!

²⁴Bu muudi wela lupangu lua meba ku budimi buebe, ukanga kabidi mukana muebe ne nsapi. Bu muudi ulama tshiamu tshiebe tshitoke mushinga mukole ne mpawungi yebe, ke muudi mua kupima biudi wakula.

²⁶Udimuke bua kuakudi meyi mabi ne ludimi luebe, bua kuponyi mu bianza bia baluishi bebe badi bakukeba.