Read Tshiluba Sira 29 Bible Online

Sira 29 - Tshiluba bible

Sira 29

¹Muntu udi ne luse kudi bapele, udi usombesha mukuende tshintu. Udi umuambuluisha bimpe, udi ulonda meyi a Mvidi Mukulu.

²Anyisha bua kusombesha mukuenu tshintu padiye mu dikenga, kadi wewe umanye mua kupingaja pa diba tshiuvua musombe.

³Ukumbaje tshiudi mulaye, bua bantu bakuangate ne mushinga; nenku neupete mu malu onsu bionsu biudi ujinga.

⁴Bantu ba bungi badi bamona tshintu tshidibu babasomba bu tshintu tshiangula, tshidibu mua kushala balama bua kukengesha bantu bavua babambuluisha.

⁵Padi muntu usomba tshintu, udi utua mishiku ku bianza bia bantu, udi udipuekesha, ubasengelela bua bamupe bintu. Kadi diba dia kupingaja bintu, badi amu balaya, pashishe padibu babipingaja badi bakula meyi mabi, bamba ne: tudi mu tshikondu tshikole.

⁶Padi muntu uvua musombe bintu musue kubipingaja kudi mfumuabi, muena bintu abi udi usanka bua bimue bikese bidiye wanji kupeta. Kadi udi mua kushala kayi ne kantu kabidi, katshiyi umvuangana ne bantu. Bantu bakadi amu bamupenda, bamutshipa. Pa muntu pa kumunemeka, badi bamupenda.

⁷Nanku bantu bavule kabena basue kusombeshangana bintu. Katuena mua kuamba ne mbua lukinu to. Kadi badi badianza kutalama bua kabavu kubabutuila bintu biabu tshianana.

⁸Kadi ufuile bapele luse, kupitshishi kubindija bua kupetabu tshintu tshia pa luse.

⁹Bua kutumikila meyi a Maweja-Nangila, udi ne bua kuambuluisha bapele. Bualu kabena ne tshintu, kubipatshi bianza bitupu.

¹⁰Bua mulunda webe nansha muanenu, utuule makuta; kuena mua kuasokoka muinshi mua dibue bua anyanguke, abole to.

¹¹Ukuate mudimu ne mpetu yebe bu mudi mikenji ya Muena Kulu miambe, nenku neyikulengelele kupita bikole mpawungi.

¹²Ulamishe bintu biebe bia kupesha bapele mu mayeba, nebikusungidile diba dia dikenga.

¹³Nebiluishe muluishi webe, kupita ngabu mukole, nansha difuma dia bujitu.

¹⁴Muntu muimpe udi udieyeka bua kupikula mukuende. Kadi muntu udi ulengulula mukuende kena ne mushinga to.

¹⁵Muntu yeye mudieyeke bualu buebe, ntshintu tshiudi anu uvuluka, bualu uvua mufile muoyi wende bualu buebe.

¹⁶Amu muntu mubi kena mua kuvuluka malu mimpe a muntu uvua mudieyeke bualu buende.

¹⁷Amu muntu udi kayi wangata malu adibu bamuenzela ne mushinga, kena uvuluka muntu uvua mumusungidile to.

¹⁸Kadi tshieya ntshibutule bantu bakane bavule, tshibatekakaja bu mudi tshipepela tshikole. Ke muvua bantu bakuabu bamuangala mu matunga abu, kadi bashala batambakana mu matunga a bende.

¹⁹Padi muntu mubi uzakila bua kudieyeka, nebamuase tshilumbu, nansha muntu udi ukeba kupeta makasa a mushinga kupitshisha, nebamuase tshilumbu.

²⁰Wambuluisha muanenu bilondeshile biebe biudi nabi, kadi udimuke bua kuteketshi mu maboku.

²¹Bua kuikala ne muoyi, muntu udi ujinga diambedi: mayi, biakudia, bilamba ne nzubu wa kulala, mudi ende malu ashala masokome.

²²Mbimpe kudia ne bupele ku nzubu kuebe, pa mutu pa kudia bimpe ku nzubu kua bende.

²³Nansha wewe ne bintu bikese nansha bia bungi, usanke bua biudi nabi, nenku kuakumvua bakujane kudi bena mutumba ne udi udiila kua bantu.

²⁴Kuya kua kampanda, kumuka kuya kua kansanga ndikenga! Bualu kuena ne kaba kasunguluke, kabidi kuena mua kuikala uyukila ne bantu to.

²⁵Udi upesha bantu biakudia ne biakunua kabayi bakuela tuasakidila, nenku neumvue amu bakusendeka bamba ne:

²⁶“Wewe muenyi, semena ulongolole mesa! Umpeshe biakudia biudi muenze…

²⁷Kuena wa apa to! Ndi mmubikila muntu munene, patuka ku nzubu! Muanetu udi ulua kummona, ndi ne dijinga dia nzubu!”

²⁸Ke malu adi atonda muntu wa meji bikole: bamuamba mudiye muenyi, bamupenda bu muena mabanza.