Read Tshiluba Sira 3 Bible Online

Sira 3 - Tshiluba bible

Sira 3

¹Bana banyi, telejayi mibelu yanyi meme tatuenu, nuyilonde bua kanufiki ku njila mibi.

²Bualu Maweja-Nangila udi utumbishila tatu mu bana bende. Udi unemesha mamu mu bana bende ba balume.

³Muntu udi unemeka tatuende udi udijimijila mibi yende.

⁴Muntu udi unemeka mamuende, udi bu muntu udi ukunguja biuma.

⁵Muntu udi unemeka tatuende, neapete disanka mu bende bana. Maweja-Nangila neateleje milombu yende.

⁶Muntu udi unemeka tatuende nealale matuku a bungi pa buloba. Udi utumikila Maweja-Nangila neasankishe mamuende mumuledi.

⁷Muntu wa nanku neakuatshile baledi bende mudimu, bu mudi mupika ukuatshila bamfumu bende mudimu.

⁸Nemeka tatuebe mu bionsu biudi wamba nansha wenza. Nenku yeye neakuele lupemba.

⁹Lupemba ludi baledi bela bana babu, ludi lushindika nzubu ya bana babu. Kadi mulawu udi baledi abu mua kuela, udi ushimbula nzubu ya bana.

¹⁰Kuena mua kuditumbisha pa bualu budi bupula tatuebe lumu, bualu bundu buende ki ndumu luebe to.

¹¹Butumbi bua muntu budi bufuma ku kanemu kadiye uleja tatuende. Kadi mamu udibu kabayi banemeka udi ukuatshisha bana bende bundu.

¹²Muananyi, ambuluisha tatuebe mu bukalakaje buende. Kumukengeshi patshidiye ne muoyi.

¹³Nansha lungenyi lua tatu luenda luteketa, umufuile luse. Kuena mua kumupepeja bualu utshidi wewe ne dikanda dionsu to.

¹⁴Bualu Maweja-Nangila kakupua muoyi bimpe biudi wenzela tatuebe, biobi abi nebikupikule ku malu ebe mabi.

¹⁵Maweja-Nangila neakuvuluke dituku diebe dia dikenga. Malu ebe mabi neajimine bu mudi mabue a mayi a mvula enguluka padi munya utema.

¹⁶Muntu udi ulengulula tatuende udi bu muntu udi usendeka Maweja-Nangila. Udi ufikisha mamuende munda, Maweja-Nangila udi umuela mulawu.

¹⁷Muananyi, enza malu ebe onsu ne bupuekele. Nebakunange kudi bantu badi Mvidi Mukulu muanyishe.

¹⁸Paudi wenda upeta mianzu ke paudi mua kutamba kudipuekesha. Nanku Maweja-Nangila neakutokele ku muoyi.

²⁰Bualu Maweja-Nangila nkayende ke udi ne bukole bupite. Bantu bapuekele badi bamutumbisha.

²¹Lekela kukeba mua kumanya tshidi tshikupita, nansha kujingulula tshidi tshikutamba bukole.

²²Keba mua kumanya mikenji idi Mvidi Mukulu mukuelele. Kukebi mua kumanya malu adi Mvidi Mukulu mukusokoke!

²³Lekela kuipatshila malu adi makupite, malu adibu bamane kukuleja mmapite adi lungenyi lua muntu mua kumanya.

²⁴Bantu ba bungi mbapambuke ku meji avuabu belangana, bualu meji abu mabi mmanyange lungenyi luabu.

²⁶Muntu wa malu makole udi muena diakabi. Muntu udi ukeba njiwu neafuilemu.

²⁷Muena malu makole udi udikebela makenga. Kabukebakeba nkabumonamona.

²⁸Dikenga dia muena ditambisha kabena mua kudijikija. Bualu bubi mbumane kuasa miji munda muende.

²⁹Muntu wa lungenyi, nsumuinu idibu bamuelela idi imutua ku muoyi. Muntu udi ukeba meji udi uyiteleja ne ntema.

³⁰Bu mudi mayi ajima kapia kadi kalunduka, ke mudi dipa dia pa luse dijimija mibi.

³¹Muntu udi wenzelangana bimpe udi wela meji ku matuku ende adi kumpala, neapete diambuluisha pikalaye mubuele mu dikenga.