Read Tshiluba Sira 30 Bible Online

Sira 30 - Tshiluba bible

Sira 30

¹Muntu udi unanga muanende wa balume, udi umutuuta lukodi misangu ne misangu. Pashishe muanende wa balume ewu neamusankishe.

²Muntu udi ukolesha muanende bimpe, udi upetela disanka kudi muana ewu. Munkatshi mua bantu badi bamumanya neikale ne lumu bua muana ewu.

³Muntu udi ulongesha muanende wa balume bimpe, baluishi bende nebamumvuile mukawu, kadi neikale ne disanka kumpala kua balunda bende.

⁴Nansha tatuende wa muana mufue, kena bu udi mufue, bualu mmushiye muntu udi mufuanangane nende.

⁵Pavua tatu ne muoyi, uvua ne disanka, pavuaye umona muanende, nansha dituku dia lufu luende kena mua kunyingalala to.

⁶Bualu mmushiye muntu udi mua kumusombuela kudi baluishi bende, ne muntu udi mua kupingajila balunda bende bilenga bivuabu bamuenzela.

⁷Muntu udi wengeleka muanende wa balume, udi umuenzela bibi. Padi muana udila kakese, tatu udi uzakala.

⁸Nyama wa kabalu kayi mutekesha, kabena mua kumubanda, muana wa balume muengeleka, mbikole mua kumubela kabidi.

⁹Paudi wengeleka muana wa balume, neakuenzele malu mabi. Wewe munaye nende neakubungamije.

¹⁰Wewe mukenye nende menu, neakukengeshe, ku ndekelu neudie dinu.

¹¹Kumulekedi wenza tshidiye musue patshidiye muana, umunyoke bua bilema biende.

¹²Biangatshile patshidiye muana, umuenzeje, akutumikile, umunyoke patshidiye muana, tshianana neikale muena tshitunu, neakutombokele, Munyingalale.

¹³Kolesha muanebe wa balume bimpe, umulongeshe bua kakufuishi bundu!

¹⁴Mbimpe kuikala muntu mupele wa mubidi mukole ne dikanda, pa mutu pa kuikala muena biuma udi ukengakana ne mabeedi!

¹⁵Bukole bua mubidi mbupite mpawungi yonsu ya mu buloba bujima, ke mudi muoyi mukole mupite biuma bionsu.

¹⁶Kakuena bubanji budi bupite bukole bua mubidi. Kakuena tshintu tshia mushinga mukole tshidi tshipite disanka didi mu muoyi.

¹⁷Mbimpe kufua pa mutu pa kukenga, mbimpe kuya mu dikisha dia kashidi pa mutu pa kushala ne mabeedi adi kaayi ajika!

¹⁸Biakudia bidibu bapesha mubeedi katshiyi ne nzala ya kubidia. bidi bu biakudia bidibu balambula nwidie.

¹⁹Biakudia bilambula nwidie bidi biambuluisha ku tshinyi? — Kabiena biambuluisha to. Bualu kena ubidia nansha umvua mupuya wabi! Ke mudi muntu udi Maweja-Nangila ukengesha nanku.

²⁰Udi utangila biakudia ne mesu, upuyakana, bu mudi muntu mutungu wenza padiye upukila nsongakaji utshidi kamama.

²¹Lekela kubungama. Kukebi malu adi akupampakaja.

²²Disanka ke muoyi wa muntu. Disanka didi nadi muntu didi dilunguluja matuku ende a panu.

²³Sanguluka, kolesha muoyi, lekela kubungama. Dibungama ndibutule bantu ba bungi, kadiena dipetesha muntu kantu.

²⁴Lubabu ne tshiji bidi bikepesha matuku a muntu, kusumpakana ne muoyi kudi kukulakajija muntu lukasa.

²⁵Muntu udi ne disanka udi umvua nzala, udi utabalela biakudia biende.