Read Tshiluba Sira 31 Bible Online

Sira 31 - Tshiluba bible

Sira 31

¹Kulala tshitabala bua kupeta biuma, kudi kudia mubidi. Kuelangana meji bua kupeta bintu, kakuena kuladika tulu.

²Kusumpaka bua biuma kudi kupangisha muntu mua kuikisha, bu mudi disama dikole dipangisha muntu mua kulala tulu.

³Muntu mubanji udi wenza mudimu mukole, bua kuvudija biuma, padiye ulekela, udi usanka ne bintu biende.

⁴Mupele udi wenza mudimu mukole bua kupeta bikese, padiye ulekela mudimu udi ubuela mu dikenga.

⁵Muntu udi unanga biuma kena mua kushala muntu muakane. Kadi udi ukeba mabuejila, neikale muntu mubi.

⁶Bantu ba bungi badi babutuka bua biuma. Dikenga didi dibakuata kabayi bamanye

⁷Biuma mbuteyi bua badi babikeba muabu muonsu. Bantu bonsu badi kabayi ne meji badi bapia mu buteyi buabi.

⁸Muena biuma udi kayi ne tshilema, udi kayi ukeba biuma muende muonsu udi ne disanka.

⁹Muntu wa nanku utudi mua kuela kalumbandi udi penyi? Udi pa buende, mmuenze malu a kukema munkatshi mua bantu!

¹⁰Muntu udi amu mua kuenza nanku kashidi anyi? — Padibi nanku, mbimpe kusanka. Bantu babala ku minu badi bafika ku dibenga bualu bubi.

¹¹Bantu ba mushindu awu nebashindame mu diakalenga, kabidi bantu nebambe malu mimpe avuabu benze.

¹²Pawikala musombe ku mesa bua kudia ne muntu udi ne muanzu, udinemeke mu diakula, kuambi ne: “Ebi mbipite bionsu bindi meme mua kudia.”

¹³Vuluka ne: padi mesu ebe ne lukuka ntshilema. Ku bifukibua bionsu, disu ndipite diodi ku bubi. Ke padidi didila pa bualu buonsu.

¹⁴Lekela kuangata tshintu tshidi muenyi webe utangila bua kuangata, bualu nudi mua kufuilakana nende mu dilongu.

¹⁵Tangila dijinga dia mukuebe bu diebe wewe, ela meji a malu onsu audi wenza.

¹⁶Diaku tshidibu bakupesha, ke mudi muntu mukolesha bimpe wenza. Kuikadi mudiavi, bualu bantu mbabenga budiavi.

¹⁷Leja muudi mukolesha bimpe, udianze kujikija kudia kumpala kua bantu bonsu. Lekela kudia ne budiavi bua bantu kabavu kukupenda.

¹⁸Pawikala ku mesa ne bantu tshisumbu, kuambudi tshiakudia kumpala kua bakuabu.

¹⁹Muntu mukolesha bimpe udi wanyisha biakudia bikese bidibu bamupesha! Nenku pikalaye mulale, udi umona mua kueyela bimpe.

²⁰Muntu udi udia pa ndiilu udi ulala tulu tuimpe, udi ujuka diba diakane, udiumvua ne dikanda! Kadi muntu muena mudi, kena ulala bimpe, udi uluka, umvua tshilunguilu!

²¹Pikalabu bakuenzeja bua kudia bintu bipite bungi, juka uya kuluka, upepeja tshifu.

²²Muananyi wa balume, teleja, kuena mua kumpepeja to. Neushishe kumvua bimpe bindi nkuambila. Mu bionsu biudi wenza, ikala ne meji, nenku kuakupeta bubeedi nansha bumue to.

²³Bantu ba bungi badi batumbisha muntu udi ubapesha biakudia bia bungi ne muoyi muimpe, lumu luende ludi lushala kashidi.

²⁴Muntu muena buiminyi, badi bamujana mu musoku mujima, bua tshilema tshiende.

²⁵Paudi unua maluvu kudileji muudi tshilobu. Bualu maluvu mmafikishe bantu ba bungi ku dikasa dibi.

²⁶Bu mudi nsenda uteta tshiamu pa kutshiela mu tshikutu tshia kapia, ke mudi maluvu asokolola bena ditambisha badi baluangana mvita.

²⁷Maluvu adi asankisha muntu, padiye uanua pa nnuinu. Muntu kayi munue maluvu udi mua kusanka anyi? Bualu Mvidi Mukulu uvua muafuke ku tshibangidilu bua kudisankisha.

²⁸Wewe munue maluvu pa diba kabidi pa nnuinu, udi ne disanka ne musangelu.

²⁹Kunua maluvu kupitshisha kudi kufikisha ku matandu, bantu batetukilangane pambidi.

³⁰Bunuavi budi buvudija lonji lua muntu mutshimbakane, too ne mudiye ulenduka. Budi bumulundula, budi bumutapisha ne mputa.

³¹Mu didia dia tshibilu, mudi maluvu a bungi, epuka mua kutandangana ne muena mutumba nebe, nansha mua kumupepeja, panudi bamana kunua, bashala nutshionkomoka. Kumuedi nsenda, kumupendi, kunanyi mabanza diba adi to.