Read Tshiluba Sira 32 Bible Online

Sira 32 - Tshiluba bible

Sira 32

¹Pikalabu bakusungula bua kulongolola tshibilu tshia didia, kudiangatshi bu muntu munene. Tangila badibu babikila bonsu bu bena mulongu nebe, anji kubapesha bia kusomba, pashishe uye kusomba pebe.

²Pawajikija midimu yebe yonsu, uye kusomba webe muaba, bua kusanka nabu, bobo nebakuele kalumbandi bua mudimu webe mulenga uudi mubenzele!

³Wewe muikale mukulumpe mupite bakuabu ku bidimu, udi mua kuyukila. Kadi udi mua kulonda amu biudi mumanye, kupangishi mua kuimbabu misambu to.

⁴Padi bantu bateleja misambu, lekela kutungunuka ne mayuki. Kuleji bantu dimanya diebe diba didi kadiyi dia kudileja.

⁵Misambu idibu bimba mu didia dinene, idi mimpe bu dibue dia mushinga mukole, dilengeja ne tshiamu tshia mpawungi.

⁶Biombelu bidibu bimba padibu banua maluvu mimpe, bidi bu dibue dia mushinga mukole dia mayi a matamba, dilengeja ne mpawungi.

⁷Paudi nsongalume, udi mua kuyukila paudi ne bualu bua kuamba, kadi udi mua kuakula musangu umue anyi ibidi, anu padibu bakuebeja bualu.

⁸Amba malu a bungi mu tshikosu, ikala bu muntu udi mumvue bualu, kadi enza bu udi kuyi mubumvue.

⁹Paudi usomba munkatshi mua bantu, kukebi bua bakuteleje amu wewe to, muaba udi bakulakaje kuena mua kubayukidila miyuki kuyi wela meji to.

¹⁰Bu mudi muela wa mvula udianjidila dikubakuba, ke mudi lumu lua muntu udi udinemeka lumudianjidila.

¹¹Padi diba dikumbana, juka uye kuebe lukasa, kunengakanyi to.

¹²Pawafika kuebe, wikisha, wenza bionsu biudi musue, kadi kuenji bibi, kuakudi meyi a ditambisha.

¹³Kadi tumbisha Mukufuki bua bionsu ebi, bualu yeye ke udi mukupe bilenga bionsu bivule ebi. TSHITUPA TSHINAYI

¹⁴Muntu udi utshina Maweja-Nangila udi wanyisha mibelu yende. Badi bamukeba biangatshile ku dinda, badi bamupeta ubatokela ku muoyi.

¹⁵Muntu udi ukeba mua kujingulula mikenji ya Maweja-Nangila, neayimanye bimpe. Kadi mikenji eyi idi ilenduisha muena mpala ibidi.

¹⁶Badi batshina Mvidi Mukulu badi bamanya tshidiye musue. Malu abu malenga neakenke bu muendu.

¹⁷Muntu udi wenza bibi udi ubenga mibelu, udi ukeba pa kubingila bua kuenza muende mudiye musue!

¹⁸Muntu wa meji udi uvuluka bionsu bidibu bamba, wela meji, kadi muena tuseku, ne muena diditambisha kena utshina bualu nansha bumue.

¹⁹Kuena mua kuenza bualu kuyi muanji kuela meji, bua kuvu kunyingalala bua biuvua muenze!

²⁰Lekela kuenda mu njila wa njiwu, bua kututshi dikasa ku dibue!

²¹Lekela kuyila mu njila udi kayi mumanyike.

²²Udimuke bua bidi mua kukuenzekela.

²³Mu bionsu biudi wenza anji kudikonkonona, kuenza nanku nkulonda meyi a Mvidi Mukulu.

²⁴Muntu udi ulonda mikenji ya Maweja-Nangila udi wenza tshidiyi yamba, udi utekemena kudi Maweja-Nangila kabena mua kumutuisha bundu.