Read Tshiluba Sira 33 Bible Online

Sira 33 - Tshiluba bible

Sira 33

¹Muntu udi utshina Maweja-Nangila kena upeta dikenga. Maweja-Nangila neamusungidile mu dikenga.

²Muntu udi ubenga mikenji ya Maweja-Nangila kena ne meji. Kadi muntu udi ulonda mikenji ya Maweja-Nangila tshilondalonda, udi bu buatu budibu batshikakaja kudi lupepela.

³Muntu wa lungenyi udi utekemena kudi Maweja-Nangila, buende yeye, mikenji ya kudi Mvidi Mukulu idi bu malu mamba kudi mutuangaji.

⁴Paudi musue bua bateleje tshiudi musue kuamba, udilongolole bimpe ku diyuki diebe, uvuluke bionsu biudi mumanye, pashishe wandamuna ku nkonku idibu bakuela.

⁵Majinga a muntu mupote adi anyunguluka bu nkata wa ditempu. Meji adiye wela adi bu mulonda wa nkata wa ditempu, udi unyunguluka.

⁶Mulunda udi useka bantu bonsu udi bu nyama wa kabalu, udi ukekemena padi muntu yonsu umubanda.

⁷Mu tshidimu tshijima, diba ke didi ditokesha. Kadi mudi dituku kampanda dipite dikuabu mbishi?

⁸Bualu mu meji ende, Maweja-Nangila mmuafuke mashilangane, muasunguluje mivu ne bibilu bishilangane.

⁹Wakutumbisha amue matuku, kuajidilaye, kushiya makuabu kaayi majidile.

¹⁰Bantu bonsu kabidi mbafuke ne lupuishi, Mvidi Mukulu mmufuke Adame ne buloba.

¹¹Kadi mu meji ende Maweja-Nangila udi mubafuke bashilangane, udi mubateke mu milongu mishilangane.

¹²Uvua muele bamue lupemba, mubape mamfumu, uvua mujidile bamue bua bikale pamue nende. Kutshipaye bakuabu, kubapuekesha, kubatonkolaye pa nkuasa ivuabu basombe.

¹³Mudi mufumbi wa ngesu wenza ne diima mudiye musue, ufumba tshintu tshidiye musue, ke mudi bantu mu bianza bia Mubafuki, udi wenza nabu mudiye musue.

¹⁴Muaba udi bubi, buakane budipu, muaba udi lufu, muoyi udipu, muaba udi muntu muakane, muenji wa bibi udipu kabidi.

¹⁵Jooja midimu idi Muena Kulu muenze, idi yenda pamue ibidi ibidi, idi ipangakana ewu ne wawa.

¹⁶Meme, ke wa ndekelu udi mufike bua kukuata mudimu bu mudi muntu udi wangulula tumuma tua nwinyo, tuvuabu bamane kunowa kudi banowi.

¹⁷Kadi amu Maweja-Nangila kungela kabidi lupemba, meme kufika ku diuwuja tshikaminu tshianyi, bu bapumbuludi bakuabu.

¹⁸Tshiena ntata amu bualu buanyi nkayanyi to, kadi mbua bonsu badi bakeba mibelu, bayijinga.

¹⁹Nuenu balombodi ba matunga ntelejayi, nuenu baludiki ba bantu teyayi matshi enu numvue.

²⁰Pautshidi ne muoyi, kuanyishi bua muanebe wa balume, mukajebe, muanenu nansha mulunda webe ikale ku mutu kuebe. Kuena mua kupa munga bintu biebe, bualu wewe mupete kanyinganyinga udi mua kubilomba tshiakabidi.

²¹Muntu mukuabu kakutuminyi diyi, pautshidi ne muoyi apa to.

²²Mbilenga bana bebe bakulombe wewe bintu, kadi wewe kuikadi ubalomba diba dionsu to.

²³Ikala mfumu wa malu onsu audi wenza. Kudinyangidi lumu.

²⁴Pafika dituku diebe dia ndekelu, diba diebe dia lufu, wabanya bintu biebe bia bumpianyi.

²⁵Tudi tupa mpunde bisosa bia kudia, tumutuuta mutshi, tumuambuisha bujitu, kadi mupika, tudi tumupa diampa, tumunyoka kabidi tumuenzeja mudimu.

²⁶Enzeja mupika mudimu ne bulongame, nanku neupete dikisha. Kadi wewe mumulekelele wenza mudiye musue, neanyeme.

²⁷Mutshi udibu mua kuambula nawu bujitu pamue ne mionji, badi mua kuambuisha nawu ngombe bujitu, nenku bua kutekesha mupika badi bamutuuta mitshi.

²⁸Utume mupika webe ku mudimu bua kasombi mu lulengu,

²⁹bualu pashalaye mu lulengu neele meji mabi a bungi!

³⁰Muteka ku midimu idi mimuakanyine. Umuenzeje mudimu bualu mmupika. Kadi pikalaye kayi nkutumikila, umuele ku tshikunyi. Kadi wamanya kupitshishi, kuenji malu adi abengangana ne meyi a Mvidi Mukulu.

³¹Paudi ne mupika anu umue, umuangate ne mushinga wa momumue ne wewe. Bualu udi mumupete ku mashi ebe. Paudi ne mupika anu umue, umuenzele bimpe bu muanenu, bualu udi umukengela amu bu muudi ukengela muoyi webe wewe mene.

³²Wewe mumukengeshe, yeye neanyeme,

³³neuye kumukeba muaba kaayi?