Read Tshiluba Sira 34 Bible Online

Sira 34 - Tshiluba bible

Sira 34

¹Muntu mutshimbakane udi utekemena malu a tshianana adi kaayi mua kuenzeka. Bantu batshimbakane badi beyamena bilota.

²Muntu udi utekemena ndota, udi bu muntu udi musue kukuata mundidimbi, nansha kuipatangana ne lupepela.

³Mu ndota badi bamona amu tshimfuanyi, amu bu mudibu bamona tshimfuanyi tshia patupu, tshia mpala wa muntu mu lumuenu.

⁴Ku tshintu tshipia mikiya kudi mua kupatuka tshidi katshiyi ne mikiya anyi? Mudi bualu bua dishima mua kupatula bualu bulelela mbishi?

⁵Kubuka mbuku, kutshinka malu adi mua kuenzeka, kulota bilota, bionsu ebi bidi tshianana, bidi bu mukaji ulotakana padiye ne difu ukeba kulela!

⁶Kuangatshi ndota ne mushinga, pa kumusha idi Muena Kulu ukutumina.

⁷Bualu ndota mmipambule bantu ba bungi, bantu bonsu bavua bayitekemena ki mbapete tshintu.

⁸Mikenji ya Maweja-Nangila kayena ne dishima nansha kakese. Meji adi menemene munda mua bantu badi balamata Mvidi Mukulu.

⁹Muntu udi muendakane mu ngendu ya bungi udi ne mamanya a bungi. Muntu udi mumonamona malu udi wamba bidiye mumanye ne lungenyi.

¹⁰Muntu udi kayi muanji kukenga, kena mua kumanya dikenga,

¹¹kadi muntu udi muendakane mu ngendu, udi mushikuluje malu bikole.

¹²Ndi mumone bivule mu ngendu imvua muye. Bindi mumanye mbipite bindi mua kuamba.

¹³Misangu ya bungi mvua ne njiwu ya lufu, mvua mupandukemu amu bua malu amvua mumonamona.

¹⁴Bantu badi batshina Maweja-Nangila nebalale matuku mavule panu.

¹⁵Bualu mbatekemene kudi udi mua kubapandisha.

¹⁶Muntu udi utshina Maweja-Nangila kena utshina tshintu. Kena uzakala, bualu mmutekemene amu kudi Maweja-Nangila.

¹⁷Muntu udi utshina Maweja-Nangila, mmuena diakalenga.

¹⁸Mudiye kayi mua kumutekemena mbishi? Mudi Mvidi Mukulu kayi mua kumulama mbishi?

¹⁹Mvidi Mukulu udi utangila bantu badi bamunanga. Udi ubalama bu mudi ngabu, udi tshipanda wa nshindamenu, udi muaba wa kusokomena dia mvunde. Udi dileji dia kuikishila munda munya, udi ulama bena diende mu njiwu. Udi ubambuluisha bua kabadishindi.

²⁰Udi ubashikika, ubela lupemba, ubapesha bukole bua mubidi, bapeta muoyi ne disanka.

²¹Kulambula Maweja-Nangila mulambu wa nyama mipeta ku bubi, nkupetula Mvidi Mukulu.

²²Mvidi Mukulu kena wanyisha milambu ya bantu badi bashipa mikenji yende.

²³Muena bukole buonsu kena wanyisha milambu ya bantu badi kabayi bamutendelela. Kena ubafuila luse bua bungi bua nyama idibu bamushipela.

²⁴Kulambula Mvidi Mukulu bintu binyenga bapele, kudi bu kukosa mutu wa muana wa balume tatuende mutangila.

²⁵Bapele badi basanka bua tshiakudia tshikese tshidibu natshi, muntu udi ubanyengatshi udi ubashipa.

²⁶Muntu udi unyenga mukuabu tshiakudia tshiende, udi bu muntu udi ushipa mukuende.

²⁷Kubenga kufuta muena mudimu difutu diende nkumushipa.

²⁸Tshiudi mua kupeta ntshinyi, padi ewu ufinga, mukuabu upulula? Nuenu bonsu babidi nudi nupungila patupu.

²⁹Padi muntu umue ujingila mukuende diakalenga, mukuabu umutshipa, ku bonsu babidi aba, udibu mua kuteleja kudi mfumu udiku anyi?

³⁰Muntu mumane kuowa mayi, mudilongolola bua pavuaye mulenga tshitalu, kadi utshilenga tshiakabidi, kadi uvua mowa mayi bua kudikobolola bua tshinyi?

³¹Padi muntu ujila biakudia bua bamufuile luse ku mibi yende ivuaye muenze, pashishe udi uya kuenza tshiakabidi bibi abi, kudi udi mua kumuteleja anyi? Didikengesha diende nedimulengelele ku tshinyi?