Read Tshiluba Sira 35 Bible Online

Sira 35 - Tshiluba bible

Sira 35

¹Muntu udi ulonda mikenji ya Mvidi Mukulu, udi bu muntu udi ulambula milambu ya bungi.

²Kulonda mikenji ya Maweja-Nangila kudi bu kulambula mulambu wa ditua ndondu.

³Kupa muntu tshintu, kudi bu kulambula mulambu wa bia pa madimi.

⁴Kuambuluisha bapele kudi bu kulambula Mvidi Mukulu mulambu wa kumuela nawu tuasakidila.

⁵Kubenga bubi kudi kusankisha Maweja-Nangila, kuepela bubi kudi bu kulambula mulambu wa kudikobolola nawu.

⁶Kufiki kumpala kua Mvidi Mukulu bianza bitupu.

⁷Bualu kulambula milambu yonsu eyi, nkulonda mikenji ya Maweja-Nangila.

⁸Mulambu wa muntu muakane udi muimpe, mupuya wawu udi ufika kudi Muena Kulu.

⁹Mvidi Mukulu udi wanyisha mulambu wa muntu muakane, uvuluka bidibu buosha pa tshilambuilu.

¹⁰Ikala muntu wa kalolu paudi unemeka Maweja-Nangila; umulambula bintu bia tshianyi bia mu budimi buebe, kumbushi bia ku biudi umupesha to.

¹¹Ikala ne disanka pa kufila milambu yebe yonsu. Fila kabidi tshia dikumi amu ne disanka.

¹²Pesha Muena Kulu bintu bilondeshile mudiye mukupeshebi. Umupeshe ne disanka bilondeshile biudi nabi.

¹³Bualu Maweja-Nangila neakupingajilebi, neakupe bintu bipite biebe bia kumpala misangu muanda mutekete.

¹⁴Kuena mua kubuejila Mvidi Mukulu, kena wanyisha mabuejila ebe.

¹⁵Kutekemenyi mulambu mubi, wa bintu biiba. Bualu Maweja-Nangila udi ukosa nsambu kayi kansungansunga.

¹⁶Kena utua kudi bantu banene bua kukengesha bapele. Udi uteleja dilomba dia muntu udibu bakengesha,

¹⁷kena ulengulula muana nshiya udi umutendekena, nansha mikemu ya mukaji mukamba.

¹⁸Udi umona binsonji bia mukamba bidi bipueka pa matama ende.

¹⁹Udi umvua miadi yende, padiye ufunda muntu udi umudidisha.

²⁰Maweja-Nangila udi wanyisha muntu udi wambuluisha bakuabu, dilomba diende nedifike too ne mu mavuba.

²¹Dilomba dia muntu mupuekele didi difika mu mavuba, ditungunuka ne kudi Maweja-Nangila, kadiena dimana, ndimane kumvuika, kadiyi dianji kufika kudi Muena Kulu.

²²Maweja-Nangila udi ubingisha bantu bakane, kena unengakana, kakuikala ne lutulu kudi badi bashipangana, ne badi kabayi ne luse, too ne pababutulaye bonsu.

²³Neanyoke bisamba bia benyi, neabutule bonsu badi baditambisha, neajikije bumfumu bua bantu babi.

²⁴Neapingajile muntu yonsu malu avuaye muenze, neafute muntu yonsu bilondeshile meji avuaye muele.

²⁵Nealumbuluishe tshilumbu tshia bantu bende. Neabasankishe bualu udi ne luse.

²⁶Bu mudi bantu banyishe mvula diba dia munanga, ke mudi luse lua Mvidi Mukulu lusankisha bantu diba dia dikenga.