Read Tshiluba Sira 36 Bible Online

Sira 36 - Tshiluba bible

Sira 36

¹Mfumu, Mvidi Mukulu wa buloba bujima, utufuile luse.

²Enza bua bisamba bionsu bikumanye ne udi Mvidi Mukulu.

³Olola tshianza tshiebe, bua uluishe bisamba bia bende, bua bimone ne: wewe ke mfumu!

⁴Uvua utunyoka bua bilema bietu bua kuleja bena bisamba bikuabu muudi wa tshijila. Nanku, mpindiewu ubakengeshe bua kutuleja bumfumu buebe.

⁵Bena bisamba bikuabu bakumanye, bu mutudi tuetu kabidi bakumanye ne: kakuena nwidie mukuabu amu wewe Maweja-Nangila!

⁶Enzulula kabidi bishima, ne malu ebe a kukema.

⁷Utuleje bukole bua bumfumu buebe.

⁸Lundula tshiji tshiebe, utshileje kudi bantu.

⁹Jimija badi netu lukuna, butula baluishi betu!

¹⁰Mpindiewu ela ngonga wa ku nshikidilu, uvuluka biuvua mumane kulaya. Pashishe bantu nebalondelangane bia dikema biudi muenze.

¹¹Kapia ka tshiji tshiebe kabutule badi bashala ne muoyi. Bonsu badi bashipa bantu bebe bajimine!

¹²Zaaza mitu ya bamfumu ba baluishi betu! Badi bamba ne: “Kakuena banga bantu bu tuetu to.”

¹³Sangisha bisamba bionsu bia bena Izrayele!

¹⁶Ubapingajile buloba buuvua mubalaye ku tshibangidilu.

¹⁷Maweja-Nangila, fuila tshisamba tshiebe luse, tshidibu binyika dina diebe. Fuila Izrayele uudi utangila bu muana a bute webe luse.

¹⁸Yerushalayime, muaba uudi wikishila, tshimenga tshidi ne nzubu webe wa tshijila, utshifuile luse.

¹⁹Bantu bavulangane pa mukuna wa Siyone, bakutumbishe ne misambu! Uwuje nzubu webe ne butumbi buebe.

²⁰Kuvidi tshisamba tshiebe tshiuvua mudianjile kufuka. Kumbaja bivua bambi batuambile mu dina diebe.

²¹Badi bakutekemena bapete difutu, bua bantu bajadike ne bambi bebe bavua bamba malu malelela.

²²Maweja-Nangila teleja malomba adi bena mudimu bebe bakulomba. Bua bantu bonsu badi pa buloba bamanye ne: udi Maweja-Nangila Mvidi Mukulu wa tshiendelele.

²³Biakudia bionsu bidi biya mu tshifu, kadi bimue bidi bilenga bipite bikuabu.

²⁴Mudi tshilakalaka tshisunguluja minyinyi ya tshisuku, tshiumvua mishindu idiyi, ke mudi muena lungenyi utandula miaku ya dishima.

²⁵Muntu wa muoyi mubi udi ubungamija bantu! Kadi muntu mumonamona mianda udi munange mua kumuenzela bidi bimukumbanyine.

²⁶Mukaji udi ne bua kuanyisha mulume yonsu udi umusela. Kadi kudi imue nsongakaji idibu mua kusela, idi mimpe mipite mikuabu.

²⁷Mukaji wa mpala muimpe udi usankisha bayende, mmupite bionsu bidi mulume ujinga.

²⁸Pikala mukaji ewu muikale ne malu mimpe, ne lutulu, bayende udi ne disanka mupite balume bonsu.

²⁹Muntu udi mupete mukaji mulenga wa nanku, ukadi ne tshiuma tshidi tshipite bikuabu bionsu, ukadi ne muntu udi mua kumuambuluisha ne udiye mua kueyemena.

³⁰Nzubu udi kayi ne lupangu, bivi badi bamupawula. Mulume udi kayi ne mukaji, mmuena diakabi, udi wendakanangana kayi ne kudiye uya.

³¹Nganyi udi mua kutekemena kudi muivi, udi wendakana mu tshimenga etshi, diadia. Ke mudi muntu udi kayi nzubu, ulala muaba onsu udi butuku bumuidila.