Read Tshiluba Sira 38 Bible Online

Sira 38 - Tshiluba bible

Sira 38

¹Unemeke munganga bua midimu idiye wenza, bualu Maweja-Nangila ke udi mumufuke.

²Bukole bua kujikija disama budi bufuma kudi Muena Kulu, munganga udi ubupeta bu dipa dia kudi mukalenga.

³Badi batumbisha munganga bua dimanya diende, nansha bamfumu badi bamukatshila.

⁴Manga adi afumina mu bifukibua, Maweja-Nangila ngudi mubifuke. Muntu wa meji kena mua kubipetula.

⁵Numanye ne amu tshitupa tshia mutshi, ke tshivua Moshe mutalaje natshi mayi, bua kuleja bantu bukole bua Mvidi Mukulu.

⁶Maweja-Nangila wakapa bantu lungenyi lua kumanya bintu ebi bionsu, bua bamutumbishile ku bia dikema bidiye wenza.

⁷Ku biobi ebi, ke kudi muntu udi ukuata mudimu wa manga wangata bintu ubisambakaja, pashishe munganga udi wondapa mabeedi. Bidi Mvidi Mukulu mufuke kabiena ne ndekelu, pa buloba bujima, bukole bua mubidi budi bufumina kudiye.

⁹Muananyi, paudi usama kutombokedi Maweja-Nangila, kadi umutendelele, neakondape, neajikije disama diebe.

¹⁰Benga bilema biebe, enza malu makane, udikobolole bubi budi mu muoyi webe.

¹¹Paudi ne mushindu, ulambule Mvidi Mukulu milambu ya muenyi muimpe, ya bukula, musenga wa kamonya ne mafuta.

¹²Pashishe uye kudi munganga, bualu amu Maweja-Nangila ke udi mumufuke. Munganga kena ukushiya to, bualu wewe udi nende dijinga.

¹³Kudi misangu mikuabu idi bamunganga mua kujikija disama diebe.

¹⁴Bualu bobu kabidi badi batendelela Maweja-Nangila bua abambuluishe, bua bamone mua kujikija disama diebe, upande.

¹⁵Padi muntu wenzela Mumufuki wende bibi, ndi mmujingila bua asame.

¹⁶Muananyi, dila muntu mufue, umudile ne kanyinganyinga, wimba misambu ya madilu, ujike tshitalu tshiende mu lukita ludi lumuakanyine, kulenguludi ku lukita luende to.

¹⁷Udile bikole, udituute pa tshiadi ne kanyinganyinga, umuenzele madilu adi mamuakanyine. Ashale dituku dimue nansha abidi bua kuepela bijanu. Pashishe ulekele kunyingalala.

¹⁸Kanyinganyinga kadi mua kufikisha muntu ku lufu; dibungama didi dikepesha dikanda dia mubidi.

¹⁹Padi muntu ne dikenga ne kanyinganyinga, udi udiumvua bu muntu udi mumane kutshipa, udi ushala bu mupele.

²⁰Kuanyishi bua muoyi webe wikale ne kanyinganyinga, ukalekele, vuluka matuku ebe atshidi kumpala.

²¹Kupu bualu ebu muoyi: muntu mumane kufua kena upingana kabidi panu. Kanyinganyinga kebe kakena ne tshidiku mua kuenzela muntu mumane kufua, amu wewe nkayebe ke udiku mua kuenzela bibi.

²²Vuluka ne: tshivua tshienzekela muntu awu netshikuenzekele kabidi, makelela lufu luvua luende, lelu nduebe.

²³Padi muntu mumane kufua, lekela kabidi kumuvuluka, yeye mumane kuya, ukole amu muoyi.

²⁴Bua kuikala muena meji ne mulongeshi wa meji, mbiakane kuikala ne diba dikumbane diudi mua kulonga. Muntu udi kayi ne midimu mivule udi upeta meji.

²⁵Kadi mudi tshidime mua kufika ku dipeta meji mbishi? Udi ne disanka dia kusaka ngombe, ne dia kuyitshingulula mu mitshi, kukuata nayi mudimu, kabidi ne dia kuyukila pa tuana tua ngombe.

²⁶Udi muteke muoyi wende amu ku diela mabula. Udi utshisha butuku bua kupa tuana tua ngombe biakudia.

²⁷Nenku ke mudi muibaki wa nzubu ne muena mudimu wa bianza, udi wenza mudimu butuku ne munya, udi uzola pa biamu, usonga bimfuanyi bishilangane, muoyi wende udi ku bimfuanyi bia mishindu mivule bia kuenza. Udi utshisha butuku amu bua kukumbaja mudimu wende onsu.

²⁸Ke mudibi ne bua nsenda udi muzonzame ku ngindu, udi ujooja tshiamu tshidiye ufula. Luya lua kapia ludi lumutudisha luanga, udi ukuata mudimu bikole, ukopakana ne luya lua mu ditanda. Ngindu udi udila amu kudila ku matshi ende, ne mesu kabidi mmatuile ku tshiamu tshidiye ufula, muoyi wende udi ku tshiamu tshiende atshi, ulala tshitabela bua kutshilengeja.

²⁹Bidi bia momumue ne mufumbi wa ngesu, padiye usopa dima ne tshiamu tshia kunyungulula ne dikasa, meji ende onsu adi amu ku mudimu wende awu, bua apete ngesu mimpe, bungi budiye ukengela.

³⁰Udi ufumba dima ne bianza biende, udi udibotesha ne makasa. Udi wenza muende muonsu bua kulaba bintu biende tshilabu tshimpe. Udi utshisha bua kukomba mu diku didiye oshila ngesu.

³¹Bantu bonsu aba badi bamanye mua kuenza bintu ne bianza biabu, muntu yonsu udi ne lungenyi lua mudimu wende.

³²Bena midimu ya bianza aba kabayiku, bantu kabena mua kuasa tshimenga, kabena mua kusombamu, kabena nansha mua kuendakanamu. Kadi, padi bantu basangila mu tshipangu tshia mu tshimenga, kabena mua kuebeja bena mudimu wa bianza kalu.

³³Bena mudimu wa bianza kabena mua kupeta mianzu mibandile, mu tshisangilu tshia bantu, kabena mua kushala bandumbulula, kabena bamanye meyi ne mikandu bia ditunga. Kabena bamanye mua kulongesha nansha kubela bantu. Kabena nansha balonge nsumuinu, mbalamate amu ku bia panu.

³⁴Kadi midimu yabu idi ilengelela buloba, badi balomba kudi Mvidi Mukulu amu bua bamone mua kuenza midimu yabu bimpe. Kadi bidi bishilangane ne muntu udi welangane meji a mikenji ya Mvidi Mukulu Muena Kulu.