Read Tshiluba Sira 4 Bible Online

Sira 4 - Tshiluba bible

Sira 4

¹Muananyi, kuena mua kupala mupele bidiye nabi dikenga, kuena mua kuindija muntu udi bianza bitupu tshintu.

²Kuena mua kukengesha muntu udi ne nzala. Kufikishi muena dikenga munda.

³Kuena mua kupita kumutatshisha; udi ukengela tshintu kampanda, umupeshetshi lukasa, kumuindiji to.

⁴Kuipatshi muntu udi ulomba tshintu bua dikenga. Kulenguludi mupele to.

⁵Kulenguludi muena dikenga, lekela kumubuidia,

⁶bualu yeye mukuele mulawu ne kanyinganyinga kuonsu, Mvidi Mukulu uvua mumufuke neateleje dilomba diende.

⁷Bidi bimpe bua bantu ba muaba uudi bakunange, uleje muudi utumikila bamfumu.

⁸Teleja tshidi mupele ukuambila, umuandamune ne bukalanga, kabidi ne diyi dimpe.

⁹Sungidila muntu udi mu bianza bia bantu badi bamukengesha. Paudi ukosa nsambu, uyikose kuyi ne bowa.

¹⁰Bana ba nshiya bakumone bu tatuabu. Mamuabu akutekemene bu bayende. Nanku newikale bu muana wa Mvidi Mukulu Muena Kulu. Yeye muena Kulu neakunange bipitshile ne pa dinanga didi mamuebe mukunange.

¹¹Meji adi afikisha bana bawu ku dikasa dimpe dipite, adi ambuluisha badi baakeba.

¹²Muntu udi munange Meji, mmunange muoyi. Bantu badi baakeba bituadije mu dinda badi ne disanka dinene.

¹³Muntu udi wapeta neikale ne butumbi; Maweja-Nangila udi umuela lupemba kuonsu kudiye uya.

¹⁴Badi bakuatshila Meji mudimu, badi batendelela Mvidi Mukulu wa tshijila. Maweja-Nangila udi unanga bantu badi bananga Meji.

¹⁵Muntu udi uteleja Meji udi ukosa nsambu pa yoyi. Udi ulonda tshidi Meji amba, udi usomba ku matshi talalaa.

¹⁶Padiye utekemena kudiwu udi wapiana. Ndelanganyi yende neyisanke nawu kashidi.

¹⁷Kaena adianza kukulombola buludi to, adi akufikisha ku bowa, akutshinyisha, adi akukengesha mudiwu masue, too ne muwikala ukadi muatekemene; neakuelele mikenji amu bua kukuteta.

¹⁸Pashishe meji adi apingana tshiakabidi kuudi, akutanduila malu avua masokome.

¹⁹Kadi pikala muntu mupambuke mu njila wa Meji, adi amushiya, amufikisha ku kabutu!

²⁰Tangila muyaya malu, wepela bubi, kuena mua kuikala ne bowa bua mushindu uudi.

²¹Bualu kudi bundu budi bufikisha muntu ku bubi, ne bukuabu budi bumupesha butumbi ne diakalenga.

²²Kuena mua kuditemba bu tshilobu, bualu bia nanku nebikutatshishe. Kadi kuena mua kufua bundu to.

²³Kuena mua kuikala utshintshila pa kuakula paudi ne bualu bua kuamba to,

²⁴bualu badi bamanya meji a muntu ku bidiye wakula, dimanya diende ku bidiye wamba.

²⁵Lekela kubenga malu malelela, kuena mua kuamba biudi kuyi mumanye.

²⁶Lekela kufila bundu bua kusokoka mibi yebe. Kabena mua kukandika musulu bua kaupueki.

²⁷Kuena mua kudipotesha kudi muntu mutatakane to nansha kutshina muntu udi ne bukole.

²⁸Uditatshishe bua kuenza malu makane too ne ku lufu. Nanku Maweja-Nangila Mvidi Mukulu neakuambuluishe.

²⁹Kuikadi wakula ne dikamakama to, kuikadi muena lulengu nansha mufube pa kuenza ebe malu.

³⁰Ku nzubu kuebe, kuikadi bu nyama wa ntambue, munkatshi mua bena mudimu bebe, kuikadi muputuke bu nzolu mubole masala ne mayi.

³¹Kuikadi muena lubombu, paudi kuyi mumanye pebe mua kupangana.