Read Tshiluba Sira 42 Bible Online

Sira 42 - Tshiluba bible

Sira 42

¹Umvua bundu bua kuambulula biuvua mumvue, nansha bua kusokolola malu a bende. Umvua bundu bua malu a nanku, bantu bonsu nebakunemeke. Kadi kudi malu makuabu adi kaayi mua kukufuisha bundu, audi ne bua kuenza kuyi utua ku tshia muntu to.

²Kumvu bundu bua kulonda mikenji ya Mvidi Mukulu Muena Kulu, nansha bua kunemeka ndondu unuvua batue nende, nansha bua kuhingisha muntu muenyi padiye kayi muenze tshilema.

³Kufu bundu bua kubala bintu pamue ne mulunda webe, nansha ne muena mulongu nebe unudi nuenda nende mu njila, nansha bua kuabanyina bantu bintu biebe bia bumpianyi.

⁴Kufu bundu bua kupima, kujadika bujitu bua bintu amu pa bobu, bua kupeta bintu bivule nansha bikese.

⁵Kufu bundu bua kupeta makasa adi ngenda mushinga upeta padiye upana bintu. Kuikadi ne bundu bua kubela bana bebe misangu mivule, nansha bua kupianda mikaba idi mua kutapa bena mudimu babi mputa pambidi.

⁶Padi mukajebe kayi ushindika malu, paudi ne bantu ba bungi kuebe, kangila bintu biebe mu nzubu ne tshikuvu.

⁷Paudi upesha muntu lukanu lua mushinga mukole, mbimpe ulubale, ulupime, kufu bundu, pashishe ufunde biudi utula nansha bidibu bakufuta.

⁸Kufu bundu bua kubela muntu mutshimbakane nansha muntu mupote, nansha muntu mukulumpe udibu bamba ne: mmuena tshiendenda. Neumueneke bu muntu wa meji, bantu bonsu nebakuanyishe.

⁹Tatu muikale ne muanende wa bakaji, udi ne dipampakana mu muoyi, nansha kayi wamba, dipampakana adi didi dimupangisha tulu. Patshidi muanende awu nsongakaji, tatu udi udikonka ne: Nebamusele lukasa anyi? Padibu bamusela, nebamubenge anyi?

¹⁰Patshidiye kamama, badi mua kumutombola, kupetaye difu kumbelu kuanyi anyi? Padiye uya kudi bayende udi mua kuenza buenzayi anyi? Padi bayende umuangata udi mua kutantshisha diku anyi?

¹¹Pikala muanebe wa bakaji ne dikamakama, umutangile ne disu dikole, bua kakusekeshi kudi baluishi bebe. Udi mua kukufuisha bundu, ku mesu kua bantu, nanku bantu nebakujane mu bisangilu.

¹²Muanebe wa bakaji kena ne bua kuendakana ne muntu mulume nansha umue, nansha kutambakana ku nzubu kudi bakaji,

¹³bualu bakaji badi bapatula bubi buabu, amu bu mudi tuishi bipatuka mu tshinkutu.

¹⁴Lonji lua mulume ludi luimpe lupite bulenga bua mukaji! Kadi, nsongakaji udi ufuishangana bundu udi upepejija tatuende. TSHITUPA TSHITANU

¹⁵Mpindiewu ndi nnuvuluija bionsu bidi Maweja-Nangila muenze, ndi musue kunulondela bionsu bimvua mumone. Maweja-Nangila uvua mufuke bionsu ne diyi diende, bivuaye mumane kujadika bidi bikumbana bu mudiye musue.

¹⁶Diba didi dikenka, ditokesha buloba bujima. Butumbi bua Maweja-Nangila budi tente mu bionsu bidiye muenze.

¹⁷Nansha batumibue ba Maweja-Nangila kabena mua kutulondela bia dikema bionsu, bia Mvidi Mukulu Muena Bukole bonsu. Biobi ebi Mvidi Mukulu mmubishindike bua bifukibua bionsu bikaleku, bua butumbi buende.

¹⁸Maweja-Nangila udi ujingulula bidi mu mayi manene, ne bidi mu muoyi wa muntu, udi mumanye malu masokome adimu. Bualu Muena Kulu udi ne bua kumanya bionsu, udi mujingulule bimanyinu bidi bitapulula bikondu.

¹⁹Udi utandula malu onsu adi mamane kuenzeka ne atshidi kumpala. Udi usokolola malu onsu adi masokome.

²⁰Udi mumanye meji atudi tuela, nansha bitudi tuamba bidi patoke.

²¹Maweja-Nangila mmulongolole midimu yende yonsu ne meji. Udi amu momumue biangatshile kale. Mu bidiye muenze, kakuena tshia kusakidila nansha tshia kumusha. Kena ukengela muntu bua amupe lungenyi.

²²Midimu yende yonsu idi ikemesha, too ne ku kantolentole ka kapia katudi tumona!

²³Bionsu ebi bidi ne muoyi, nebishale kashidi, bitabe ku diyi dia Maweja-Nangila padiye ubikengela.

²⁴Bionsu bidi bienda bibidi bibidi, etshi tshiumvuangana ne tshikuabu; Maweja-Nangila kena mufuke tshintu mutshipangile mu njila.

²⁵Tshintu tshionsu tshidi tshikolesha dikanda dia tshikuabu. Udi mua kutangila lumu lujima lua Maweja-Nangila kulujikija nnganyi?