Read Tshiluba Sira 43 Bible Online

Sira 43 - Tshiluba bible

Sira 43

¹Ndisanka kaayi patudi tumona bulenga bua tshibuashibuashi! Ndumu kayipu ludi nalu diulu patudi tuditangila!

²Padi butuku butshia, diba didi dipatuka ne lumu, dituleja mudi Muena Kulu muenze tshintu tshia dikema!

³Padi diba dibanda, difika munda munya, buloba budi buuma. Udi mua kutuila nkenke ya diba nkanana udiku anyi?

⁴Badi basonsola kapia mu tshikutu bua kulundukaku. Kadi diba didi diosha mikuna ndipite kapia ka mu tshikutu misangu isatu. Diba didi dituma luya lukole, diela nsese itua mu mesu.

⁵Maweja-Nangila udi mufuke diba, udi munene! Diba didi dilonda amu njila mudifundila kudiye!

⁶Ngondu udi ubala amu pa diba diende, uleja bikondu, utapulula tshidimu mu ngondu ne mivu.

⁷Ngondu ke udi ushindika matuku a bibilu. Dibulunge edi didi dienda dikepela padidi ditua ku tshibanda.

⁸Muenji onsu udi upeta dina diawu kudi ngondu wa kulu. Bukenke buende budi buenda budiunda ku dituku ku dituku, buleja tshiluilu tshia mulu njila wa kuyila, butokesha tshibuashibuashi tshia mu diulu.

⁹Mabulunge adi mulu ke butumbi bua tshibuashibuashi. Wowu ke adi adileja mulu mua Maweja-Nangila ne bukenke buawu.

¹⁰Adi enda malondangane bu mudi wa Tshijila muatumine diyi, kaena apangila nansha alala mu njila.

¹¹Tangila muanza-nkongolu, ela udi muufuke tuasakidila. Muanza nkongolu udi ubalakana bimpe.

¹²Udi muenze tshijengu tshia lumu mulu bu buta budi Maweja-Nangila unana.

¹³Maweja-Nangila udi ulokesha mvula wa neje bu mudiye wamba, udi utuma mikenya ya mvula bua kuenza tshidiye musue.

¹⁴Ke padi mabungu manene a mayi a mulu unzuluka, ke mavuba kubuuka bu nyunyi.

¹⁵Mavuba adi akuatakana ku bukole bua Maweja-Nangila, adi aloka mvula wa mabue.

¹⁷Mukungulu wa dikubakuba diende udi unyungisha buloba, padi mikuna imona bukole buadi idi izakala. Tshipepela tshia kuinshi kua ditunga tshidi tshituuta, mvula wa tshipupu wa ku mutu kua ditunga, ne mvunde mukole kabidi, bidi bienzeka bu mudiye musue. Maweja-Nangila udi ulokesha mvula wa neje, bu mudi nyunyi ikila panshi, neje udi umata panshi bu mudi mpasu imata.

¹⁸Butoke bua neje budi butua mu mesu, padiye umata panshi, muoyi udi usanguluka munda.

¹⁹Maweja-Nangila udi witshikija tubue tua mayi pa buloba, bu tusoka tua luepu, tudi tukuatakana ne mashika, tuenza bu meba adi atua bantu.

²⁰Padi tshipepela tshia mashika tshia ku mutu kua ditunga tshituuta, mayi adi akuatakana, enza dibue dia mashika pa mutu pawu ponsu, diabuikila bu kazaku ka tshiamu.

²¹Tshipepela tshidi tshiumisha mikuna, tshiosha tshipela, tshishidisha bisuku bu mudi kapia.

²²Kadi dibungi didi dipandisha ku kapia. Lumuma ludi lulonda luya lukole ludi lutupingajila disanka.

²³Maweja-Nangila kutekesha mayi manene malabale, kutekamu bidila.

²⁴Badi benda pa mayi badi batulondela njiwu idibu bamonapu, patudi tumvua bidibu batulondela, tudi tukema.

²⁵Mu mayi manene amu, mudi bintu bia dikema, mudi nyama mivule ya mishindu ne mishindu, nyama ya bidika minene idi ikuatshisha bowa.

²⁶Muntu yonsu udi Maweja-Nangila utuma, udi ufika muaba udiye uya. Bionsu bidi bienzeka mu diumvuangana bu mudiye wamba.

²⁷Tudi mua kuamba malu a bungi, katuyi mua kuajikija. Kadi tudi mua kuamba mu tshikosu ne: Bionsu bidi amu ku bumfumu bua Maweja-Nangila.

²⁸Katuena bakumbane mua kumutumbisha to. Bualu udi ku mutu kua bifukibua biende bionsu.

²⁹Maweja-Nangila ngua kutshina. Mmunene kayi ne ndekelu, bumfumu buende budi bukemesha.

³⁰Tumbishayi Maweja-Nangila, ne muenu muonsu, bualu udi mupite binudi mua kuamba. Mutumbishayi ne bukole buenu buonsu, kanupungidi, bualu kanuakufika ku ndekelu.

³¹Muntu ukadi mumumone bua kuamba mudiye, udiku anyi? Muntu udi mua kumutumbisha bu muende mudiye anyi?

³²Kudi bintu bivule bidiye muenze bitudi katuyi bamanye, kudi bikuabu bitudi katuyi tumona, bikale ne bunene bupite.

³³Bualu Maweja-Nangila ngudi muenze bionsu, kabidi uvua mupeshe bantu badi bamulamata meji.