Read Tshiluba Sira 46 Bible Online

Sira 46 - Tshiluba bible

Sira 46

¹Yoshuwa, muana wa Nume, uvua tshilobu tshia mvita. Uvua mupingane pa muaba wa Moshe mu mudimu wa buambi. Bilondeshile mudi dina diende, kuvuaye mupandishi munene, kupandishaye bantu bavua Maweja-Nangila musungule. Kutshimunaye baluishi bavua bamukanyine, bua amone mua kupa bena Izrayele buloba buabu.

²Ndumupu kaayi luvuaye nalu pavuaye wela bianza mulu, utula muele bua kuluisha baluishi!

³Kakuvua muntu mua kutua nkanana kumpala kuende. Bualu uvua uluila Maweja-Nangila mvita!

⁴Uvua mumanyike diba ki nyeye anyi? Diba adi, dituku dimue kadivua dinenga dienza matuku abidi anyi?

⁵Pavua baluishi bamutshinta nseke yonsu, kubikilaye Muena Kulu, muena bukole buonsu. Ke Maweja-Nangila mulu kumumvua, kulokeshila baluishi bende mabue a mvula a bukole bupite.

⁶Yoshuwa kuluangana mvita muende muonsu ne baluishi bende. Kubundaye baluishi bavua bapueka pa kapulumuku ka mukuna wa Betorone. Nanku ke bena matunga a benyi kumanyabu bukole bua bia lufu bivua Yoshuwa nabi, bualu bavua baluisha Maweja-Nangila. Yoshuwa uvua ulonda mikenji ya Mfumu.

⁷Yoshuwa uvua mumane kulamata Mvidi Mukulu mu tshikondu tshia Moshe. Nansha Kalebe muana wa Yefune, uvua kabidi nanku. Bavua babenga bivua bantu bamba mu tshisangilu, babakandika bua bantu kabatombokedi Mvidi Mukulu, bapuwisha bavua banungana bamba bibi.

⁸Ke bobu babidi kupanda nkayabu, munkatshi mua bena Izrayele binunu nkama isambombu. Amu bobu nkayabu kubuelabu mu buloba bulaya, budi buwule mabele ne buitshi tente.

⁹Ke Maweja-Nangila kupa Kalebe bukole bua mubidi. Kushalaye nabu ne ku bukunda buende. Nansha yeye mukulakaje uvua mukuate matunga a ku mukuna, avua ndelanganyi yende mipiana.

¹⁰Ke muvua bena Izrayele bonsu bamona ne: bidi bimpe bua kulonda mikenji ya Maweja-Nangila.

¹¹Bidi bimpe kuyukila kabidi bua balombodi, kutua onsu wa ku Balombodi ende makumbu. Bualu kabavua babenga Maweja-Nangila bua kutendelela nwidie to. Tubavulukayi. Kabidi tuelayi Maweja-Nangila tuasakidila.

¹²Nansha mifuba yabu mikale mu nkita, yele ntonga isase, isanguke mu bana babu ba balume.

¹³Maweja-Nangila uvua munange muambi wende Samuwele. Uvua ubanjija bukalenga mu dina dia Maweja-Nangila, ulaba bamfumu manyi bua baludike bantu ba Maweja-Nangila.

¹⁴Uvua ukosa nsambu ya bantu amu muvua diyi dia Maweja-Nangila. Nanku Maweja-Nangila uvua ulama bena Izrayele bimpe.

¹⁵Samuwele uvua umueneka muambi mulelela bualu uvua mulamate Mvidi Mukulu. Bantu bavua bamuitaba bu muntu udi umona malu a Mvidi Mukulu pa wowu bua meyi avuaye wamba.

¹⁶Pavua baluishi bende bamutshinta nseke yonsu, uvua ubila Maweja-Nangila muena bukole buonsu, umulambula muana wa mukoku.

¹⁷Pavua Maweja-Nangila wakula mu diulu, utonoka, diyi diende divua diumvuika, bu dikubakuba dikole.

¹⁸Uvua umubutuila bamfumu bavua bamuluisha, kabidi ne bana bonsu ba bakalenga ba bena Peleshete.

¹⁹Pakavua Samuwele upunga ne lufu, uvua wela lusanzu kumpala kua Maweja-Nangila, ne kua mukalenga wa ditunga, wamba ne: “Meme tshiena muangate tshintu tshia muntu, nansha tshisabata tshiende mene.” Muntu nansha umue kena muanji kumufunda ku tubadi.

²⁰Diba divuaye mumane kufua, uvua amu wenza mudimu wa buambi. Uvua mumanyishe mukalenga mushindu uvuaye ne bua kufua. Yeye mu lukita uvua amu wakula bu muambi bua kukobolola bantu ku mibi yabu.