Read Tshiluba Sira 47 Bible Online

Sira 47 - Tshiluba bible

Sira 47

¹Samuwele mumane kufua, Natane kutuadija mudimu wa buambi, mu tshikondu tshia Davide.

²Bu mudibu basungula minyinyi ya manyi bua kulambula Maweja-Nangila mulambu wa ditua ndondu, ke muvuabu basungula Davide munkatshi mua bena Izrayele.

³Uvua unaya ne ntambue bu udi unaya ne mbuji unaya ne nkashama bu udi unaya ne tuana tua mikoku.

⁴Patshivua Davide nsongalume uvua mushipe muntu wa mpolondu, bua kujikija bundu buvua nabu bena tshisamba tshiende. Uvua muambule dibue kudiela mu ndundu wa nyunyi. Kushipaye Ngoliyate uvua uditemba.

⁵Diba adi, kubikilaye Maweja-Nangila Muena Kulu, uvua mumupeshe bukole bua kushipa muntu uvua mumanye mua kuluangana nwita bikole, bua bena matunga makuabu banemeke tshiakabidi bukole bua tshisamba tshiende.

⁶Ke kumutuabu makumbu muvuaye mubutule bantu binunu dikumi. Kumupabu lumu bela kabidi Maweja-Nangila tuasakidila, pashishe kumuasabu nsala wa lumu.

⁷Bualu Davide uvua mubutule baluishi bavua babanyungulule. Uvua mubutule butubutuu baluishi bende bena Paleshete, mubatekeshe teketee.

⁸Mu bionsu bivuaye muenze, Davide uvua wela Maweja-Nangila wa tshijila tuasakidila, utumbisha Muena Kulu. Uvua mumusake mu misambu kabidi munange Mufuki wende ne muoyi wende onsu.

⁹Uvua muteke bisumbu bia bena misambu pabuipi ne tshilambuilu. Uvua ubimbisha misambu ya meyi mimpe.

¹⁰Davide uvua mulongolole bibilu ne matuku a kutendelela bimpe. Bantu bavua batumbisha dina dia tshijila dia Maweja-Nangila, bimba misambu mu nzubu wa Mvidi Mukulu ne dinda dionsu.

¹¹Maweja-Nangila kumufuila luse bua bubi buende, kushindikaye bumfumu buende kashidi. Maweja-Nangila kutua ndondu ne Davide, kumulaya ne: ndelanganyi yebe neisombe mu bukalenga bua Izrayele kashidi.

¹²Davide umuka mu bukalenga, ke muanende wa balume wa meji mavule kumupingana. Maweja-Nangila uvua munange Davide, ke muvuaye mupeteshe muanende diakalenga.

¹³Bukalenga bua Shelomu buvua buanji kuikala ne bupole; Mvidi Mukulu kumupa ditalala ku bena mutumba nende. Ke Shelomu kumona mua kuashila Maweja-Nangila nzubu wa tshijila, muaba udi bantu mua kumutendelela kashidi.

¹⁴Shelomu muana uvua mumane kuikala muntu wa meji! Uvua muwule ne lungenyi bu mudi musulu upasalala.

¹⁵Lungenyi luebe ndubuikile buloba bujima. Miaba yonsu mbamanye nsumuinu yebe ne malongesha ebe.

¹⁶Bantu bonsu badi batumbisha dina diebe too ne mu bidila bia kule. Mbakunange kabidi bua ditalala didi bantu bapeta.

¹⁷Bantu bonsu badi bakema, bua misambu yebe, nsumuinu, mianu ne diumvuija diebe dia malu.

¹⁸Bavua bakutela pavuabu bamane kusamuna dina dia butumbi, dia Mvidi Mukulu uvua mujidile bena Izrayele. Uvua mukunguje mpawungi ne tshiamu tshitoke tshia mushinga mukole, bu mudibu bakunguja tshiamu tshia kabanda ne tshia ntende.

¹⁹Kadi wewe kudienza mupika wa bakaji, kuditua ne kasuki.

²⁰Wewe kunyanga lumu luebe, kupepeja ne lua ndelanganyi yebe. Ke Mvidi Mukulu kubafikila munda, bobu kubuela mu dikenga!

²¹Bukalenga kupanduluka mu bitupa bibidi, bukalenga butomboke kufumina mu tshisamba tshia Efrayime.

²²Kadi Maweja-Nangila uvua mufuile bantu bende luse, bua malaya ende akumbane. Kavua mujimije ndelanganyi ya musungula wende, kavua mubutule lulelu lua uvua mumunange. Kadi uvua mushiye bamue bantu ba ku ndelanganyi ya Yakobe, kupatulaye muntu mupiamupia mu diku dia Davide.

²³Pashishe Shelomu kufua, bamujika, umue wa ku ndelanganyi yende kubuela mu bukalenga, diende Robowame, uvua muntu mutshimbakane bikole, kayi ne lungenyi. Uvua mupangadike malu avua mafikishe bantu ku dimutombokela. Yerobowame, muana wa Nebate uvua mupambule bisamba bia ku mutu kua ditunga mu njila muakane, uvua mufikishe bena mu bukalenga bua Efrayime ku bubi.

²⁴Bantu aba kuvua kuenza malu mabi mavule, kubuelabu mu bupika, kubumushabu mu ditunga diabu.

²⁵Kuenzabu malu mabi mapite bungi, too ne mudi Mvidi Mukulu ufika ku dibanyoka.