Read Tshiluba Sira 48 Bible Online

Sira 48 - Tshiluba bible

Sira 48

¹Muambi kujuka panshi, ukenka bu kapia. Miaku yende ivua yosha bu tshimunyi tshia kapia.

²Kutuminaye bantu tshiyole. Muvuaye munange Maweja-Nangila bikole ne disuminyina, bantu ba bungi kufua.

³Bu muvua Maweja-Nangila mumuambile, Eliya kukandika bua mvula kaloki. Kulokeshaye kapia misangu isatu.

⁴Wewe Eliya, udi ne lumu bua bishima biuvua muenze! Udi mua kuditemba kufuanangana nebe nnganyi?

⁵Wewe ke uvua mubishe muntu mufue ku bafue, amu ku diyi dia Muena Kulu.

⁶Wewe uvua mufikishe bakalenga ku kabutu, bantu bavua ne mianzu, uvua mubapeteshe masama, bafika ne ku lufu.

⁷Wewe uvua mumvue tshivua Mvidi Mukulu mukuambile pa mukuna wa Sinayi bua kukubela, pa mukuna wa Orebe, pavuaye musue kunyoka baluishi bende.

⁸Wewe uvua mujidile bakalenga mu dina dia Maweja-Nangila, bua kupinganabu bakuabu mu mudimu, kabidi ne bambi bua kukupingana.

⁹Wewe ke uvuabu bambula mu mvunde wa kapia pa ditempu divuabu bakoka kudi tubalu tua kapia.

¹⁰Mukanda wa Tshijila udi wamba ne: Wewe ke uvua Maweja-Nangila musungule, bua kutuyisha tshiji tshia Maweja-Nangila, padiye kayi muanji kufika munda. Wewe ke udi ne bua kufuisha tatu ne muana ndondu, ne kulongolola bisamba bia bena Izrayele.

¹¹Bantu badi bakumona, kabidi bafua ne dinanga dia Mvidi Mukulu, mbena diakalenga! Tuetu kabidi netuikale ne muoyi bulelela!

¹²Pavua Eliya mumane kujimina mu mvunde, Elisha kuwula ne Mueyelu wende. Patshivua Elisha panu, mfumu nansha umue kavua umukuatshisha bowa to. Muntu nansha umue kavua mua kumuenzeja bualu ku bukole.

¹³Tshintu nansha tshimue katshivua mua kumukolela. Yeye mumane kufua, tshitalu tshiende tshivua tshiamba malu bu muambi.

¹⁴Patshivuaye ne muoyi uvua wenza malu a dikema, nansha pavuaye mumane kufua, bivuaye wenza bivua bikemesha bantu.

¹⁵Nansha biobi nanku, bena Izrayele kabavua bitaba Mvidi Mukulu to. Kabavua balekela njila wa mibi to, too ne muvuabu baye nabu mu bupika, bashiye ditunga diabu. Bayua babatangalaja pa buloba bonsu. Kushalaku bantu amu bakese ba tshisamba tshia Yuda, balombola kudi mukalenga wa mu diku dia Davide.

¹⁶Bamue ba ku bakalenga aba mu diku dia Yuda kuenzabu bivua bilengelela Mvidi Mukulu, kadi bakuabu bavua benza amu kuenza malu mabi.

¹⁷Izkiya kukolesha tshimenga tshiende ne bimana, kufikishaye kabidi ne mayi munda muatshi. Kupandishaye mbuebue ne tshiamu, kuibaka bidia binene bia kulamina mayi.

¹⁸Mu tshikondu tshiende ke muvua mukalenga Senakeribe, mmufike bua kuluisha tshimenga tshia Siyone. Mumuambuluishi wende uvua uditambisha, usendeka tshimenga.

¹⁹Nenku bena Yerushalayime kuteketa mu maboku, kuzakala. Kukengabu bu bakaji pa lulelu.

²⁰Kadi kutendelelabu Mvidi Mukulu Muena luse, bamuoluela bianza. Mvidi Mukulu wa tshijila, wa diulu ne buloba kubateleja diakamue. Kubasungidilaye ne diambuluisha dia Yeshaya.

²¹Mvidi Mukulu kuluisha bena Ashure. Mutumibue wende kubabutula.

²²Bualu Izkiya uvua wenza bivua bilengelela Maweja-Nangila. Uvua ulonda amu mu dikasa dia nkambua wende Davide, divuabu bamuleja kudi Yeshaya, muambi munene, uvua umona, wamba amu malu pa wowu.

²³Mu tshikondu atshi, Yeshaya kupingaja diba tshianyima, kuvudija matuku avua mukalenga ne bua kulala panu.

²⁴Ku bukole bua Mueyelu wa Mvidi Mukulu, kumonaye bivua ne bua kuenzeka ku nshikidilu kua bionsu, kusambaye bavua basomba babungama mu Siyone.

²⁵Uvua umanyisha malu masokome avua ne bua kuenzeka too ne ku nshikidilu. Uvua uleja malu masokome avua kaayi manji kuenzeka.