Read Tshiluba Sira 5 Bible Online

Sira 5 - Tshiluba bible

Sira 5

¹Kutekemenyi biudi nabi, kuambi ne: meme nkayanyi ndi muasakaje bionsu.

²Kukebi bionsu bidi muoyi webe ujinga, bualu nebikusake mua kulonda majinga a tshianana a mu muoyi webe.

³Lekela kuamba ne: “Muntu nansha umue kena mua kuntumina diyi”, bualu Maweja-Nangila neakunyoke.

⁴Kuambi ne: “Mvua muenze bibi, bualu nansha bumue ki mbungenzekele!” Kuena mua kupua muoyi ne: Maweja-Nangila mmulengulule.

⁵Paudi utungunuka amu ne kuenza bibi, kuedi meji ne: “Maweja-Nangila neamfuile luse!”

⁶Kuambi ne: “Luse lua Maweja-Nangila ndupite bunene, neamfuile luse nansha bilema bianyi biobi bungi munyi!” Bushuwa, Maweja-Nangila udi ne luse, kadi udi kabidi ne tshiji, neakengeshe benji ba bubi ne tshiji tshiende.

⁷Pingana kudi Maweja-Nangila, kuindidi to. Lekela kuladikija. Bualu tshiji tshia Maweja-Nangila tshidi mua kumueneka diakamue. Ke bualu kayi wewe udi mua kubutuka dituku dia dinyoka adi.

⁸Kutekemenyi biuma bipeta mu bubi. Kabiena mua kukuambuluisha dituku dia dikenga.

⁹Lekela kutua eku ne eku. Kubuelakanyi mu tujila tuonsu, amu bantu babi ke badi benza nanku.

¹⁰Ushindame mu malu audi muitabe. Wikale muena diyi dimue.

¹¹Umvua lukasa. Utukije bangabanga ne kuandamuna.

¹²Andamuna muntu bualu buudi mumanye. Paudi mubupange, upuwe.

¹³Muntu udi wakula udi mua kupeta lumu nansha kufua bundu. Meyi adi muntu wakula adi mua kumubutula.

¹⁴Kuena mua kuangata lumu lua muntu bua kumusendeka. Biudi wakula bikale pa biobi! Bu mudibu bapisha muivi bundu, ke mudibu banyoka muena dishima bikole.

¹⁵Epela bilema binene nansha bikese.