Read Tshiluba Sira 50 Bible Online

Sira 50 - Tshiluba bible

Sira 50

¹Simone, mutuangaji munene, uvua muana wa Onyase, uvua mulongolole nzubu wa Mvidi Mukulu patshivuaye panu, kulongololaye muaba wa tshijila.

²Yeye ke uvua mutuadije bitaku bia bimana bile bia nzubu wa Mvidi Mukulu, ne tshia lupangu lua nzubu awu.

³Mu tshikondu tshivuaye mutuangaji munene, bavua bumbula tshiina tshia mayi tshinene, bunene bu bua luesu lunene lua tshiamu tshikunze, luvua mu nzubu wa kale wa Mvidi Mukulu.

⁴Bu muvua Simone musue kuepula bantu bende ku kabutu, ke pavuaye mukoleshe tshimenga ne bimana bua baluishi kubabuedi nansha.

⁵Pavuaye upatuka mu muaba wa tshijila menemene, ukosolola mu nzubu wa Mvidi Mukulu, uvua umueneka ne lumu lunene!

⁶Uvua bu mutotu wa mu dinda udi ukenka mu mavuba, bu ngondu pakadiye mumane kubulunga mu matuku a tshibilu tshia Dipita dia Maweja-Nangila,

⁷bu diba ditokesha nzubu wa Muena Kulu, bu muanza-nkongolu ubalakana mu mavuba,

⁸bu tshilongu tshia rose mu mvulambedi, bu tshilongu tshimpe tshipite bikuabu tshidi tshimena pabuipi ne mpokolu wa mayi, bu mitshi ya mu Lebanone mu matuku a luya,

⁹bu musenga wa kamonya udi upia pa tshilambuilu bu dibungu dia mpawungi, dilengeja ne mabue a mushinga mukole a mishindu yonsu,

¹⁰bu mutshi wa olive mukuama bimuma, bu mutshi wa siprese udi mutumbuke mulu.

¹¹Pavua Simone uvuala muntumpu wa mutuangaji munene ne bilengejilu bia muanzu wende, ubanda ku tshilambuilu bua kulambula Mvidi Mukulu, uvua ne butumbi bua bungi mu nzubu wa Mvidi Mukulu.

¹²Pavuaye muimane pamue ne mbabula wa tshilambuilu, uvua wangata milambu kudi batuangaji, batuangaji nende bamuele munkatshi, bu mitshi ya sedre ya mu Lebanone, bamunyungulule bu mitshi ya mabue a ngaji.

¹³Batuangaji, ndelanganyi ya Arone, bavua bonsu muaba awu, bavuala bilamba bibalakana, bavua bakuata mulambu wa Maweja-Nangila mu bianza biabu, bimana kumpala kua bena Izrayele.

¹⁴Simone uvua ukumbaja midimu ya butendeledi, ulongolola mulambu wa Mvidi Mukulu Muena Kulu, muena bukole buonsu, pa tshilambuilu.

¹⁵Uvua wolola tshianza wangata dikopu, wela nwinyo mukunze tetetee, umumiamina kuinshi kua tshilambuilu. Ke mulambu wa muenya muimpe uvua usankisha Muena Kulu, Mukalenga wa buloba bujima.

¹⁶Diba adi, batuanganji bavua bela tunkunduluila, bela mpungi ya tshiamu, bavua bela mbila mikole, bua Mvidi Mukulu kuvuluka bantu.

¹⁷Diakamue bantu bonsu bavua biname, batua mpala panshi, bua kukukuila Maweja-Nangila muena bukole buonsu, Mvidi Mukulu Muena Kulu.

¹⁸Pashishe bena misambu bavua bimbe misambu mimpe, mu nzubu wa Mvidi Mukulu ne diyi dikole.

¹⁹Bantu bavua batekemena Maweja-Nangila, Muena Kulu, batendelela Muena Luse, too ne muvua mudimu onsu wa kutendelela ujika.

²⁰Nanku Simone kutuluka ku tshilambuilu, kuelaye bianza kulu, pa mitu ya bena Izrayele, bua kubela lupemba mu dina dia Maweja-Nangila. Ke muvuaye ne lumu lua kutela dina dia tshijila dia Maweja-Nangila.

²¹Ke bonsu kutua mpala panshi tshiakabidi, bua Muena Kulu abeele lupemba.

²²Kadi mpindiewu, elayi Mvidi Mukulu muena bukole buonsu tuasakidila, yeye ke udi muenze malu a dikema miaba yonsu. Ke udi mutusangule biangatshile ku buana buetu, udi utuenzela amu mudi luse luende.

²³Atusankishe mu mioyi yetu, atupe bupole patutshidi ne muoyi, ditalala dikale amu muvuadi mu Izrayele kashidi!

²⁴Luse luende luikale kutudi, atusungidile matuku onsu atudi tusomba panu!

²⁵Kudi bisamba bibidi bidi muoyi wanyi udiombola, kadi tshisatu tshiena mua kutshibala bu tshisamba to.

²⁶Ke bantu badi base pa mukuna wa Seyire, pashishe ne bena Peleshete, ne bantu batshimbakane badi basomba mu Shekeme.

²⁷Meme Yezu, muana wa Sira, muikulu wa Elazare wa mu Yerushalayime, ndi mufunde mukanda ewu ne malongesha, muwule ne meji ne dimanya ditue. Ndi mufundemu bionsu bindi mumanye, ne bionsu bindi mumone.

²⁸Muntu udi ulonga misangu yonsu malongesha aa, mmuena diakalenga, yonsu udi ulama malu aa munda muende neikale muena meji!

²⁹Bualu yeye mukumbaje neikale ne muoyi mukole mu bionsu bidi bimuenzekela, bualu padi muntu utshina Maweja-Nangila, udi upeta muoyi.