Read Tshiluba Sira 51 Bible Online

Sira 51 - Tshiluba bible

Sira 51

¹MALU MASAKIDILA Mukalenga Maweja-Nangila, ndi nkuela tuasakidila. Ndi nkutumbisha, wewe Mvidi Mukulu wanyi. Ndi nkuela amu wewe tuasakidila,

²bualu wewe uvua mundame, mungambuluishe, munsungidile, mumpatule mu mateyi avua bena bijanu ne bena dishima banteya. Uvua mungambuluishe pavua bantu bankina.

³Wewe kundeja muudi ne luse luvule. Uvua ne diyi anu dimue mu bionsu biuvua wamba bua bavua bamane kunkuata. Wewe kunsungidila kudi benzavi aba, bavua basue kunshipa. Mu makenga mavule avua mankuate, bavua bakeba kunsukumina,

⁴wewe kumpatula mu kapia kakole kavua kanjingila, ne mu ndimi ya kapia kamvua tshiyi mutemeshe.

⁵Wewe kumpandisha ku lufu, ne kudi bantu badi bakula meyi mabi a dishima,

⁶ku miketa idibu bela kudi muena mukosu. Muoyi wanyi uvua usemena ku lufu, nkavua mikolu ku tshiina,

⁷baluishi bavua bannyungulukila nseke yonsu, kakuyi muntu udi mua kungambuluisha. Meme kukeba muntu udi mua kungambuluisha, nansha kumupeta!

⁸Nenku, wewe Maweja-Nangila, ndi muvuluke ne: udi muakane, udi utuenzela matuku onsu bimpe, bualu udi upandisha bonsu badi bakutekemena, udi ubasungidila kudi bantu babi.

⁹Meme kukutendelela panu apa, kukusengelela bua umpandishe.

¹⁰Meme kukubikila bikole ne: “Maweja-Nangila, udi Tatu wanyi, kundekedi mu dikenga, pandi tshiyi ne muntu udi mua kungambuluisha kumpala kua bena ditambisha.

¹¹Nentumbishe dina diebe tshiyi ndekela, nengimbe misambu bua kukuela tuasakidila.” Udi mumane kuteleja kulomba kuanyi,

¹²wewe kumpandisha ku kabutu, kungumusha mu makenga. Ke pandi musue kukuela tuasakidila muvule, kutumbisha dina diebe, wewe Maweja-Nangila bua bilenga bionsu biudi muenze.

¹³Pantshivua muana, tshiyi muanji kumanya mudi panu, mvua nkeba meji patoke, ntendelela Maweja-Nangila.

¹⁴Kumpala kua nzubu wa Mvidi Mukulu, mvua ntendelela bua kuapeta, mvua muakebe muanyi muonsu,

¹⁵Diba adi, meji akola, bu mudi tumuma tua nwinyo tupia, kuenzawu mpokolu wa disanka dianyi. Meme kulonda njila muakane, biangatshile ku buana buanyi makasa anyi avua enda mu njila wa meji.

¹⁶Nansha meme muteye matshi kakese, mvua mpeta meji, meji avua andongesha malu manene.

¹⁷Ndi mulubuluke bualu buawu. Ke pandi mvuluka udi mundongeshe mua kupeta meji.

¹⁸Meme kupangadika kabidi bua kuenza tshidiwu angambila, meme kusuminyina dienza bimpe. Meji ki mmamfuishe bundu to.

¹⁹Mvua muluangane bikole bua kuapeta, mvua muenze muanyi muonsu bua kukumbaja diyi dia Mvidi Mukulu. Misangu mivule, mvua ntendelela muele bianza mulu, ntonda mumvua mulengulule meji.

²⁰Kadi meme kutuma muoyi wanyi kudiwu, meme kuapeta pamvua mutekele malu mabi onsu. Kutuadija ku mbangilu, meji kumpetesha lungenyi, ke pandi tshiyi mua kualekela kashidi.

²¹Muoyi wanyi mujima, uvua amu bua kulamata kudiwu, ke pandi mupete bilenga bia mushinga mukole ebi.

²²Maweja-Nangila kumpa dipa dia kuakula bimpe, meme kukuata nadi mudimu wa kumutumbisha.

²³Nuenu badi kabayi ne meji, semenayi kundi, nubuele mu kalasa ka Meji.

²⁴Nudi nuindila tshinyi bua kuakeba, panudi nawu dijinga?

²⁵Ndi nnujadikila ne: “Nudi mua kuapeta kanuyi baasumbe.

²⁶Kuatayi mudimu bikole, bua nuenu kuapeta. Meji adi pabuipi menemene.

²⁷Ndi nnujadikila ne: mvua mukuate mudimu mukese, kupeta disanka divule.

²⁸Longayi bindi mulongeshe, nubiangate ne mushinga, panudi nukuata nabi mudimu nenupete tshiamu tshia mpawungi tshipite bungi.”

²⁹Nusanke bua luse lua Maweja-Nangila, kanuikadi ne bundu bua kumutumbisha.

³⁰Kumbajayi midimu yenu, diba kadiyi dianji kupita. Maweja-Nangila neanufute pakumbana diba.