Read Tshiluba Sira 6 Bible Online

Sira 6 - Tshiluba bible

Sira 6

¹Kuikadi muluishi wa unudi badia nende bulunda, bualu muntu udi ne lumu lubi udi ufua bundu, bantu badi bamupepeja. Abi ke bidi bienzekela muena mpala ibidi.

²Majinga ebe kaena mua kukutshimuna, bualu bukole buebe buonsu budi mua kuvingutuka bibi.

³Bualu neushale bu mutshi mume, udi mupopoka mabeji, kauyi ukuama bimuma.

⁴Majinga mabi adi afikisha muntu ku kabutu, amusekesha kudi baluishi bende.

⁵Miaku mimpe idi ivudija bulunda, muntu udi wakula bimpe udi upeta mandamuna mimpe kudi bantu.

⁶Nansha badi bakuela muoyi bikale bavule, kadi munkatshi mua bantu tshinunu, usungula mibelu ya muntu amu umue.

⁷Pawasua kupeta mulunda, wanji kumanya mudiye, kuanji kumunanga musangu umue to.

⁸Bualu, kudi balunda ba diba dia disanka diabu, kadi, padi dikenga dikukuata, muntu nansha umue wa kudibu kena ufika to.

⁹Kudi mulunda udi wandamuka muluishi, padiye ukupepeja, udi ukukeba matandu, bua kukufuisha bundu.

¹⁰Kudi balunda badi bakulamata diba dia kudia, kadi, paudi mu dikenga, muntu nansha umue wa kudibu kena ufika paudi to.

¹¹Mu matuku audi ne bubanji, balunda abu badi bu wewe. Kabidi badi batumina bena mudimu bebe diyi.

¹²Kadi dituku dia dikenga, badi bakuluisha, ushala kuyi ubamona kabidi to.

¹³Epuka baluishi bebe. Udimukile bantu badi baditemba ne tudi balunda bebe.

¹⁴Mulunda muimpe udi bu muaba mushindame utudi mua kunyemena. Muntu udi mupete mulunda wa nanku, mmupete mabue a busanga a mushinga mukole.

¹⁵Mulunda wa bushuwa, udi upita biuma bionsu Katuena mua kumutuila mushinga to.

¹⁶Mulunda muimpe udi bu buanga bukole, budi Maweja-Nangila upetesha bantu bende badi bamutshina.

¹⁷Muntu udi utshina Maweja-Nangila udi mumanye mua kusungula bende balunda. Bualu mudiye ke mudi kabidi mulunda wende.

¹⁸Muananyi, longa malu bituadije ku bunsonga buebe. Newikale ne Meji too ne pawatoka nsuki.

¹⁹Keba Meji bu mudi tshidime ne mumiaminyi wa maminu benza. Tekemena ne lutulu dikasa dimpe didiwu akututshisha. Bualu pautshidi wakeba newanji kukenga, kadi papita matuku, neusanke ne bipeta biawu

²⁰Meji adi akolela bantu bavua kabayi babuela mu kalasa kawu. Muntu udi kayi ne lungenyi kena wakeba ne dinanukila to.

²¹Muntu awu udi utangila meji amu bu dibue dia bujitu, dia kuteta nadi bukole buende. Kena ujingakana bua kudishiya panshi.

²²Meji adi makole bua kuapeta. Bantu ba bungi kabena nawu.

²³Muananyi wa balume, teleja, kabidi umvua tshindi ngamba. Kuena mua kubenga pandi nkubela.

²⁴Bueja makasa ebe mu tshikunyi tshia Meji. Fila nshingu webe mu nshinga wawu wa tshiamu.

²⁵Inama bua kuambula pa makaya, nkanu yawu kayikutondi.

²⁶Uye kudiwu ne muoyi webe mujima. Ulonde mudiwu aya ne muebe muonsu.

²⁷Ualonde, wakeba, nenku newamanye. Kadi, pawapeta kualekedi nansha.

²⁸Bualu kunshikidilu neupete dikisha pawikala nawu, dikenga diebe nediandamuke disanka.

²⁹Nanku bikunyi biawu nebikulame bimpe. Nshinga wawu wa tshiamu neashale tshitampi tshiebe tshia lumu.

³⁰Bujitu budiwu akuambuisha, budi bu tshifulu tshia mpawungi, nkanu yawu idi bu mukaba wa mushinga mukole.

³¹Neuvuale meji bu mudibu bavuala tshilamba tshia lumu, kabidi neuase bu mudibu base tshifulu tshia bumfumu.

³²Muananyi, pawikala musue, newalonge. Pawikala ne disuminyina, newikale muntu wa dimanya dikumbane.

³³Neulonge malu pawikala musue kuteleja. Paudi ne ntema neupete meji.

³⁴Utantshile amu kutantshila bantu bakadi bamana kumona mudi panu, ulamate meji adibu bakulongesha.

³⁵Teleja ne muoyi webe onsu diyuki dia pa malu a Mvidi Mukulu. Kujimiji kasumuinu nansha kamue kadi mua kukulongesha malu.

³⁶Wewe mumone muntu wa lungenyi, uye kudiye diakamue. Tuuta misesu ku nzubu kuende.

³⁷Vuluka mikenji ya Maweja-Nangila. Kumbaja amu kukumbaja meyi ende matuku onsu. Yeye mene neakoleshe muoyi webe. Neakupe meji audi ujinga.