Read Tshiluba Sira 7 Bible Online

Sira 7 - Tshiluba bible

Sira 7

¹Paudi kuyi wenza malu mabi, malu mabi kaena mua kukupinganyina nansha.

²Epuka kansungansunga, kansungansunga nekakuepuke.

³Paudi umiamina bubi, neubumone misangu muanda mutekete mu njila yebe.

⁴Kuena mua kulomba kudi Maweja-Nangila bumfumu bua kuludika bantu, nansha kulomba mukalenga nkuasa wa bumfumu.

⁵Kudileji bu muakane kumpala kua Maweja-Nangila, nansha bu mutalame kumpala kua mukalenga.

⁶Kukebi mua kuikala ndumbulula, paudi kuyi ne bukole bua kujikija kansungansunga. Bualu, bumue udi mua kuhingisha muntu munene, wewe kunyanga buakane buebe.

⁷Kuena mua kutatshisha bana benu, kuenzela bantu bonsu ba mu tshimenga bibi, bualu neudipuekeshe milongu ku mesu kua bantu bonsu!

⁸Kuenji bubi bua momumue misangu ibidi, bubi bua kumpala abu, mbumane kukuvuija muena tshilumbu.

⁹Kuambi ne: “Bu mundi mfila milambu yanyi kudi Mvidi Mukulu. Muena Kulu neanganyishe bua bungi buayi!”

¹⁰Kutekeshi mu maboku paudi utendelela. Kulenguludi bua kupa bapele tshia pa luse.

¹¹Kuseki muntu udi ne kanyinganyinga, bualu Maweja-Nangila udi upuekesha muntu, udi mua kumubandisha kabidi.

¹²Kuena mua kushima muanenu to, nansha mulunda webe kashidi.

¹³Lekela dishima, kutungunuka ne dishima kakuena kupetesha muntu bualu bua nsongu nansha bumue.

¹⁴Diba diudi mu tshipangu tshia bakulu, kuakudi biakulakula. Paudi utendelela, lekela kuvudija miaku idi kayiyi ne mushinga.

¹⁵Kupetudi mudimu mukole, nansha mudimu wa budimi, bualu Mvidi Mukulu Muena Kulu ke udi mutufukileyi.

¹⁶Kudisangi kudi bantu babi to. Uvuluke ne Mvidi Mukulu udi pabuipi, neakunyoke!

¹⁷Udipuekeshe bikole. Bualu tshidi tshindila muntu, mbua bamudie kudi misanda.

¹⁸Kupangidi mulunda webe bua kupeta biuma, nansha muanenu menemene bua kupeta mpawungi muimpe.

¹⁹Ukebe mushinga wa kusela mukaji wa meji ne malu mimpe. Bualu bienzedi biende, mbipite tshiamu tshia mpawungi kule.

²⁰Kuena mua kukengesha mupika udi ukukuatshila mudimu muende muonsu, nansha muena mudimu udi munange mudimu wende.

²¹Paudi ne mupika wa lungenyi, umunange bu muudi mudinange wewe. Wanyisha bua kumupatula mu bupika pakumbana tshikondu.

²²Paudi ne bimuna, ubikube. Padibi bikuambuluisha, ubilame bimpe.

²³Paudi ne bana, ubakoleshe. Padibu bana, ubalongeshe tshikadilu tshimpe.

²⁴Udi ne bana ba bakaji anyi? Ubatabalele bua bikale amu tumama. Kubafuidi luse nansha.

²⁵Useleshe muanebe wa bakaji, nenku udi mumane kujikija mudimu webe! Kadi bamusele kudi muntu wa lungenyi.

²⁶Paudi ne mukaji wa pa muoyi webe kumubengi nansha. Kadi kuena mua kulamata mukaji uudi kuyi munange to.

²⁷Nemeka tatuebe ne muebe muonsu, kadi kupu muoyi bua makenga avua mamuebe mukumvuile.

²⁸Vuluka ne: ke bavua bakulele. Udi mua kubafuta tshinyi bua bionsu bidibu bakuenzela?

²⁹Utendelele Maweja-Nangila ne lungenyi luebe luonsu, unemeke kabidi ne batuangaji bende.

³⁰Nanga Mukufuki ne bukole buebe buonsu. Kulenguludi bantu badi balombola mudimu wende.

³¹Tshina Maweja-Nangila, unemeke mutuangaji. Umupeshe tshiende tshintu tshia mulambu bu mudi Mvidi Mukulu muambe: bintu bia tshianyi bia mu budimi, mulambu wa dinua tshibalu, maboku a nyama mimana kulambula, bivua bishale ku milambu ya bintu bia tshianyi bia tshijila, ne bintu bivuabu balambula Mvidi Mukulu.

³²Wikale ne muoyi wa kalolu kudi mukengi, bualu Maweja-Nangila menemene neakuele lupemba.

³³Ambuluishe ne bintu, bantu batshidi ne muoyi, ujike bimpe badi bafue.

³⁴Udile ne badi badila, ubungame ne badi babungama.

³⁵Kuelakanyi bua kusamba babeedi. Ku bia nanku ke kudibu bakunangila.

³⁶Mu bionsu biudi wenza, vuluka ne: neufue, nenku kuakuenza bibi nansha.