Read Tshiluba Sira 8 Bible Online

Sira 8 - Tshiluba bible

Sira 8

¹Kutandianganyi ne muntu udi ne muanzu, bua kavu kukukuata.

²Kutandianganyi ne muena biuma, bualu udi amu bu kasosa ku mesu kuende. Bantu bavule badi babuejilangana mpawungi. Mpawungi mene mmulenduishe bakalenga.

³Kutandianganyi ne muena mutoyi, bualu bidi bu kumusonsola.

⁴Kuedianganyi bilele ne muntu mukolesha bibi, bualu udi mua kupenda baledi bebe.

⁵Lekela kutandisha muntu udi ukeba kudilengeja ku bubi buende. Vuluka ne bonsu badi bena tshibawu.

⁶Kupepeji muntu mukulakaje, bualu bamue ba kutudi badi benda bakulakaje kabidi.

⁷Kusanki bua lufu lua mukuenu, vuluka ne tuetu bonsu netufue.

⁸Kupepeji muambamba bakulu. Longa nsumuinu yabu ne disuminyina, bualu kudibu ke kuudi mua kupetela meji, ne kulongela muudi mua kukuatshila bamfumu mudimu.

⁹Kulenguludi muambamba banunu, bualu malu awu ngavuabu bumvue kudi babu baledi. Amu kudibu ke kuudi ulongela mua kumanya malu, kabidi ne mua kuandamuna ku nkonku idibu bakuela.

¹⁰Kulundudi tshiji tshia muntu mubi, bualu udi mua kudibutuisha.

¹¹Lekela kufunyinangana ne muena dikamakama, bualu udi mua kukufikisha ku diakula bibi.

¹²Kuena mua kusombesha muntu mukupite ku muanzu lupetu luebe. Pawikala mumusombeshe ututangile bu lujimine.

¹³Kuena mua kudieyeka ku bintu biudi kuyi mua kupeta. Pawikala muenze nanku, udikengeshe amu bua kufuta.

¹⁴Kubundi tshilumbu ne ndumbulula, bualu nebatue ku tshiende, bu mudiye ndumbulula.

¹⁵Kuena mua kuya ku luendu ne muena dikamakama, bualu udi mua kukukebela malu mabi mapite bungi. Yeye neenze amu bidi ku muoyi wende, bupale buende nebukufikishe ku lufu.

¹⁶Kutandi ne muntu wa tshiji. Kanuyi nende babidi muaba udi kauyi bantu. Bualu kakuena tshidi mua kumukandika bua kushipa muntu. Udi mua kukushipela muaba udi kauyi muntu udi mua kukusungidila.

¹⁷Kuambidi muntu mupote bualu buebe busokome, bualu kena mua kubulama.

¹⁸Panudi ne muenyi pamue, kuenji bualu bua musokoku to, bualu kuena mumanye mudiye mua kubinduluka.

¹⁹Kuambidi muntu yonsu malu adi munda muebe, bualu kabena mua kukunemeka to.